The Beast in Me
| The Beast in Me | |
| Genre |
|
|---|---|
| Geskep deur | Gabe Rotter |
| Met |
|
| Temamusiekkomponis | Sean Callery |
| Oorsprong | VSA |
| Taal | Engels |
| Aantal episodes | 8 |
| Uitvoerende vervaardiger(s) |
|
| Vervaardiger(s) | Sean Fogel |
| Kinematografie | Lyle Vincent |
| Uitsending | |
| Oorspronklike kanaal | Netflix |
| Oorspronklike lopie | 13 November 2025 |
The Beast in Me is 'n Amerikaanse sielkundige riller en misdaaddrama van Netflix wat as minireeks vir televisie vervaardig is. Die hoofkarakters is Claire Danes en Matthew Rhys. Dit is deur Gabe Rotter geskep en gaan oor 'n skrywer (Danes) wat 'n boek begin skryf oor haar nuwe buurman (Rhys), die uitvoerande beampte van 'n eiendomsmaatskappy wat na bewering sy vrou vermoor het. Uitvoerende vervaardigers sluit in Jodie Foster en Conan O'Brien. Die première was op 13 November 2025.
The Beast in Me het positiewe resensies gekry en die reeks, Danes en Rhys is vir drie groot Golden Globes benoem.
_(cropped).jpg)
Rolverdeling
[wysig | wysig bron]Hoofakteurs
[wysig | wysig bron]- Claire Danes as Aggie Wiggs, 'n skrywer wat oor die dood van haar seun rou en sukkel om haar volgende boek te skryf.
- Matthew Rhys as Nile Jarvis, die seun van 'n eiendomsmagnaat wat in die huis langs Aggie s'n intrek om 'n meer afgesonderde lewe saam met sy tweede vrou te lei nadat hy na bewering sy eerste vrou vermoor het.
- Brittany Snow as Nina Jarvis, Nile se tweede vrou wat in 'n kunsgalery in Manhattan werk.
- Natalie Morales as Shelley Morris, Aggie se eksvrou, 'n skilder.
Byspelers
[wysig | wysig bron]- Jonathan Banks as Martin Jarvis, Nile se pa en 'n roekelose eiendomsmagnaat.
- David Lyons as Brian Abbott, 'n FBI-agent wat die Jarvis-familie voorheen ondersoek het.
- Tim Guinee as Rick "Wrecking Ball" Jarvis, Nile se oom wat die familie beskerm.
- Deirdre O'Connell as Carol McGiddish, Aggie se letterkunde-agent en vriendin.
- Bubba Weiler as Teddy Fenig, 'n jong dronkbestuurder wat die dood van Aggie se seun veroorsaak het.
- Hettienne Park as agent Erika Breton, 'n FBI-agent wat Abbott se hoof en minnares is.
- Aleyse Shannon as Olivia Benitez, 'n lid van die stadraad wat Nile se sakeplanne teenstaan.
- Amir Arison as Frank Breton, FBI-agent Erika Breton se eksman.
Storielyn
[wysig | wysig bron]Bederwingswaarskuwing: Die storielyn en/of storie se einde volg hieronder.
Die skrywer Agatha “Aggie” Wiggs sukkel om haar volgende boek te skryf terwyl sy rou oor die dood van haar agtjarige seun, Cooper, wat deur 'n dronkbestuurder veroorsaak is. Intussen hoor sy haar nuwe buurman is Nile Jarvis, 'n eiendomsontwikkelaar wat daarvan verdink word dat hy sy eerste vrou, Madison, vermoor het. Aggie ontmoet Nile en sy tweede vrou, Nina. Aggie gaan eet later saam met Miles. Hy sê vir haar die boek wat sy skryf, klink vervelig en sy moet eerder oor hom skryf. Sy vertel vir hom van Cooper se dood en sê sy het eens gewens die dronkbestuurder, Teddy, is dood. Daardie nag besoek die FBI-agent Brian Abbott vir Aggie en waarsku haar teen Nile; Abbot het die ondersoek na Madison se dood gelei. Die volgende oggend hoor Aggie Teddy het skynbaar selfmoord gepleeg, maar sy lyk word nie gevind nie. Aggie ontmoet Abbott in Central Park en sê sy dink Nile het Teddy dalk vermoor.
Aggie stem later in om 'n boek oor Nile te skryf. Sy sê vir hom dis sy kans om sy onskuld te bewys. Die volgende oggend nooi Nina haar om te gaan stap en onhul sy was Madison se persoonlike assistent. Intussen deursoek Nile se oom, Rick, Aggie se huis en vind Abbot se naam op 'n stukkie papier geskryf. Rick lig sy broer, Martin – Nile se pa en die eienaar van Jarvis Yards – in oor die boek wat Aggie skryf. Aggie voer haar eerste onderhoud met Nile. Toe hy Abbey later konfronteer omdat sy Abbott sien en hy haar dreig, sê Aggie hy is bloot 'n bron vir haar boek. Later gaan Aggie na 'n Jarvis-familiebyeenkoms terwyl Abbott by Nile se huis inbreek om lêers van sy rekenaar te kopieer.
Aggie besoek Madison se ouers en is verbaas toe sy hoor hulle dink Mile is onskuldig en hulle haar vertel hulle dogter het vroeër probeer selfmoord pleeg weens haar bipolêre gemoedsteuring. Hulle gee haar 'n afskrif van Madison se selfmoordbriefie en sê Nile het haar lewe gered.
Abbott kry Nile se gekodeerde lêers terug en is geskok toe hy beelde sien van Teddy Fenig, wat nog lewe, maar gevange gehou word. Abbott volg Nile na 'n pakhuis en konfronteer hom met 'n wapen, maar Nile oorrompel hom en slaan hom met sy eie wapen dood. Die volgende dag neem Nile sy motor, met Abbott se lyk in die bagasiebak, na 'n skut, waar sy motor ineengefrommel word.
Madison se broer, Christopher, kontak Aggie en sê sy ouers se finansies hang af van Jarvis Yards se sukses, en dit laat hulle glo Nile is onskuldig. Hy gee haar 'n boks met Madison se besitings. Toe sy 'n dagboek bestudeer, sien Aggie 'n bladsy is daaruit geskeur en kom ooreen met die selfmoordbriefie – wat daarop dui die briefie is voor Madison se vorige selfmoordpoging geskryf en nie voor haar werklike dood nie. Aggie breek by Abbott se woonstel in omdat sy niks van hom haar nie. Net toe kom Erika, 'n FBI-agent wat Abbott se hoof en minnares is, daar aan en Aggie vertel haar van die selfmoordbriefie. Saam ontdek hulle 'n opname van Teddy in gevangenskap op Abbott se rekenaar.
Aggie kom by die huis aan, waar Nile haar inwag. Hy nooi haar om saam met hom in die woud te gaan stap en vra haar of sy glo hy het Madison vermoor, maar danksy 'n oproep van haar uitgewer ontsnap sy terug in haar huis in. Die polisie omsingel Aggie se buurt ná 'n oproep oor 'n beweerde ontvoering. Aggie sien aantekeninge aan haar manuskrip oor Nile en besef hy het in haar huis ingebreek. In Cooper se kamer kom sy op Teddy se lyk af.
In 'n terugflits na 2019 neem Abbott se FBI-span een van Nile se helpers in hegtenis en Nile-hulle besef iemand in hulle binnekring gee hom inligting. Nile vemoed Nina is die mol, maar sy onthul Madison het Abbott ontmoet. By die galery slaan Mile vir Madison dood.
Aggie vlug terwyl die owerhede Teddy se lyk in haar huis kry. Sy breek by Nina se galery in en bel die polisie om haar oor te gee. Voordat hulle daar aankom, vertel sy vir Nina van haar bewys dat Nile vir Madison vermoor het. Daardie aand konfronteer Nina tuis vir Nile; hy ontplof eindelik en erken alles. Hy sê Madison en Teddy het "verdien" wat hulle gekry het. Die volgende dag onthul Nina sy het haar gesprek met Nile opgeneem, en die polisie arriveer om hom in hegtenis te neem. Nile word drie keer lewenslange tronkstraf opgelê. Hy word later deur medegevangenes vermoor wat deur Rick gehuur is. Aggie publiseer haar boek oor Nile, The Beast in Me, en erken haar eie rol in die saai van trauma en vergelding.
Ontvangs
[wysig | wysig bron]Op Rotten Tomatoes was 83% van die 66 resensies positief. Die webtuiste se konsensus lui: "The Beast in Me is beter as die gewone moordraaisel; dit bevat 'n sielkundige tweegeveg, wat vol spanning is danksy die uitstekende spel van Claire Danes en Matthew Rhys."[1] Op Metacritic het dit 'n punt van 71 uit 100 gekry, gebaseer op 29 resensies, wat dui op 'n "algemeen gunstige" ontvangs.[2]
The Beast in Me is onder meer vir drie Golden Globes benoem (vir beste beperkte TV-reeks, Rhys en Danes), asook vir 'n Directors Guild of America Award (beperkte reeks). Rhys en Danes is vir verskeie ander pryse ook benoem.
Verwysings
[wysig | wysig bron]- ↑ "The Beast in Me: Season 1". Rotten Tomatoes. Besoek op 13 Desember 2025.
- ↑ "The Beast in Me: Seisoen 1". Metacritic. Fandom, Inc. Besoek op 13 Desember 2025.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
