The Blind Side (rolprent)
| The Blind Side | |
|---|---|
| Regisseur | John Lee Hancock |
| Vervaardiger |
|
| Draaiboek | John Lee Hancock |
| Geskoei op | The Blind Side: Evolution of a Game deur Michael Lewis |
| Met |
|
| Musiek deur | Carter Burwell |
| Kinematografie | Alar Kivilo |
| Ateljee | Alcon Entertainment |
| Verspreider | Warner Bros. Pictures |
| Uitgereik | 20 November 2009 |
| Speeltyd | 128 minute |
| Land | VSA |
| Taal | Engels |
| IMDb-profiel | |
.jpg)
The Blind Side is ’n Amerikaanse biografiese sport-dramarolprent van 2009, geskryf en geregisseer deur John Lee Hancock. Dit is geskoei op 'n boek van 2006 met dieselfde naam deur Michael Lewis,[1] en gaan oor Michael Oher, ’n aanvallende lynman in Amerikaanse voetbal, wat sy armoedige grootwordjare oorkom en in die Nasionale Voetballiga (NFL) gespeel het met die hulp van Leigh Anne en Sean Tuohy.
In die hoofrolle is Sandra Bullock as Leigh Anne te sien, Tim McGraw as Sean en Quinton Aaron as Oher.
Ondanks gemengde resensies is Bullock se toneelspel algemeen geprys. Sy het 'n Oscar, 'n Golden Globe en 'n Screen Actors Guild Award gewen. Die prent het ook 'n hele paar ander pryse gewen.
Die fliek was in 2023 die onderwerp van omstredenheid toe Oher beweer het die Tuohys het hom mislei om ’n kuratorskapooreenkoms te onderteken pleks daarvan om hom wettig aan te neem, en dit het hom verhinder om tantième te ontvang[2] terwyl die familie indirek miljoene verdien het.[3]
Rolverdeling
[wysig | wysig bron]- Sandra Bullock as Leigh Anne Tuohy, Michael se aanneemma
- Tim McGraw as Sean Tuohy, Michael se aanneempa
- Quinton Aaron as Michael Oher
- Brandon Rivers as 'n jong Mike
- Kathy Bates as Miss Sue
- Jae Head as Sean "S.J." Tuohy jr., Michael se jonger aanneembroer
- Lily Collins as Collins Tuohy, Michael se aanneemsuster
- Ray McKinnon as Coach Cotton
- Kim Dickens as Mrs. Boswell
- Adriane Lenox as Denise Oher, Michael se biologiese ma
- IronE Singleton as Alton, 'n bendeleier/dwelmhandelaar
- Sharon Conley as die ondersoekbeampte Granger
Verskeie voetbalafrigters en -werwers verskyn kortliks as hulleself: Phillip Fulmer, Lou Holtz, Tom Lemming, Houston Nutt, Ed Orgeron, Pepper Rodgers, Nick Saban en Tommy Tuberville.[4] Oher se afrigter op hoërskool, Hugh Freeze, het ’n ongekrediteerde kameeverskyning as ’n afrigter wat wedstrydmateriaal kyk.[5]
Storielyn
[wysig | wysig bron]Die 17-jarige Michael "Big Mike" Oher is weens sy biologiese ma se dwelmverslawing by verskillende pleeggesinne in Tennessee geplaas, maar elke keer wanneer hy in ’n nuwe huis geplaas word, loop hy weg terug na haar toe. Sy vriend se pa, op wie se rusbank Michael geslaap het, vra Burt Cotton, die afrigter van Wingate Christian School se sokkerspan, om te help om sy seun en Michael by die skool ingeskryf te kry. Cotton, wat beïndruk is deur Mike se grootte en atletiese vermoë, kry hom toegelaat ondanks sy swak akademiese rekord. Michael raak bevriend met ’n jonger leerling genaamd Sean Tuohy jr. ("S.J."). S.J. se ma, Leigh Anne, is 'n binnenshuise ontwerper met ’n sterk persoonlikheid en die vrou van die welgestelde sakeman Sean sr.
Ná 'n vlugbalwedstryd van Leigh Anne en Sean se dogter, Collins, sien Sean Michael tel kos op wat op die paviljoene weggegooi is. Op die vooraand van Thanksgiving merk Leigh Anne dat Michael alleen langs die pad loop en van die koue bewe sonder voldoende klere. Toe sy hoor hy beplan om die nag opgekrul buite die geslote skoolgimnasium deur te bring, bied Leigh Anne aan dat hy op die rusbank in die Tuohy-huis slaap.
Die volgende oggend vra Leigh Anne Michael om Danksegging saam met haar gesin deur te bring. Later ry Leigh Anne vir Michael na sy biologiese ma se huis. Hy sien ’n uitsettingskennisgewing aan die deur, wat daarop dui dat sy ma weg is. Geleidelik word Michael ’n lid van die Tuohy-familie; Nadat Leigh Anne se vriendinne dit bevraagteken, vra sy vir Collins hoe sy daaroor voel. Collins antwoord dat hulle Michael nie sommer net kan uitskop nie.
Toe Leigh Anne probeer om Michael se wettige voog te word, verneem sy dat hy op sewejarige ouderdom van sy dwelmverslaafde ma weggeneem is en dat niemand weet waar sy is nie. Daar word ook aan haar gesê dat hy, hoewel hy swak gevaar het in ’n loopbaanaanlegtoets, in die 98ste persentiel vir "beskermingsinstinkte" geplaas is. Michael verbeter uiteindelik sy punte genoeg om Amerikaanse voetbal by die skool te speel. Hy lyk egter huiwerig om sy krag en grootte tydens oefeninge te gebruik. Leigh Anne sê vir hom hy as ’n aanvallende lynman moet sy spanlede soos sy familie beskerm. Van daardie oomblik af verbeter Michael drasties, goed genoeg om op universiteitsvlak te speel. Om dit te kan doen, moet hy egter die minimum graadpuntgemiddeld behaal om aanvaar te word. Daarom huur die Tuohys ’n privaat tutor vir hom, die uitgesproke en vriendelike Miss Sue.
Leigh Anne voer ’n gesprek met Michael se ma, Denise, oor die aanneming van hom. Hoewel sy aanvanklik onwillig voorkom, wens Denise Michael eindelik alles van die beste toe. Michael word deur talle gesogte skole gewerf. S.J. praat met afrigters en onderhandel namens sowel Michael as homself. Toe Michael sy punte hoog genoeg kry, besluit hy om die Universiteit van Mississippi (in die volksmond bekend as "Ole Miss") by te woon. Maar omdat Sean sr. by Ole Miss basketbal gespeel het en Leigh Anne en Miss Sue rasieleiers daar was, kry die ondersoeker Granger van die nasionale universiteitsatletiekverenigng opdrag om die saak te ondersoek en vas te stel of die Tuohys hom onregmatig beïnvloed het sodat hy vir hulle alma mater sou speel.
Michael storm weg voordat die onderhoud afgehandel is en konfronteer Leigh Anne oor haar motiewe om hom in te neem. Daarna gaan soek hy sy biologiese ma in Hurt Village. ’n Bendeleier verwelkom hom terug, bied hom ’n bier aan en maak seksueel aanstootlike insinuasies oor Leigh Anne en Collins. Toe Michael kwaad word, dreig die bendeleier om hulle aan te vat, en Michael baklei gevolglik met hom en ander. Nadat hy oor alles nagedink het en Leigh Anne ondervra het, vertel Michael aan Granger dat hy Ole Miss gekies het omdat "dit is waar my familie op universiteit was". Michael word tot die universiteit toegelaat en neem afskeid van die Tuohy-familie. Die prent eindig met inligting oor die werklike Tuohy-familie en Michael Oher, wat eindelik in die Nasionale Voetballiga gespeel het, en foto's van hulle.
Ontvangs
[wysig | wysig bron]Sandra Bullock se vertolking het enorme lof van resensente ontvang. Op Rotten Tomatoes was 66% van 204 resensies positief, met 'n gemiddelde punt van 6,3/10. Die webtuiste se konsensus lui: "Dit kom dalk vir sommige kykers ’n bietjie te voorspelbaar voor, maar The Blind Side trek voordeel uit sterk bronmateriaal en ’n sterk vertolking deur Sandra Bullock." Op Metacritic het dit 'n telling van 53 uit 100 gekry op grond van 29 resensies, wat dui op 'n "gemengde of gemiddelde" ontvangs.[6]
A.O. Scott van The New York Times het oor die vertolkings kommentaar gelewer: "Me. Bullock is oortuigend genoeg as ’n energieke vrou van die Nuwe Suide wat verskeie dinge tegelyk doen, wat haar eie mening ken en gewoonlik haar sin kry. En Tim McGraw, as Leigh Anne se gemoedelike man, Sean, speel sy karakter gemaklik en weet hoe om uit me. Bullock se pad te kom wanneer dit nodig is." Hy het bevind die prent "bestaan byna geheel en al uit keerpunte en tog, vreemd genoeg, is dit van drama of spanning ontbloot". Hy het dit beskryf as ’n "lewendige, werklikheidsgebaseerde weergawe van ’n Disney-spotprent: Dit is die hartverwarmende verhaal van ’n vondeling wat deur vreemdelinge ingeneem word, wat hom aanvaar al is hy anders en hom soos een van hulle behandel."[7]
Volgens Michael Rechtshaffen van The Hollywood Reporter is Bullock se karakter ’n "onweerstaanbare grapjas in skrywer-regisseur John Lee Hancock se andersins deur en deur konvensionele verwerking van Michael Lewis se boek, wat op feite gegrond is". Ondanks haar "vurige" en "energiese" vertolking het hy gevoel daar is ’n gebrek aan ontwikkeling rakende Michael se karakter: "Eers teen die einde van die prent kry ons die kans om werklik te sien wat in Oher se kop aangaan – hoe hy voel oor sy uitverkiesing, nadat hy uit die armoedige behuisingsprojekte van Memphis gepluk en in hierdie beskermde, nieliberale bevoorregte omgewing gegooi is."[8] Peter Bradshaw van The Guardian het Bullock se vertolking as "vreemd genoeg humorloos" beskryf en gevoel "daar is iets vreemds afwesig daaraan." Hy het afgesluit: "Daar is ’n ryk, komplekse verhaal oor Michael Oher en sy mentor, Leigh Anne Tuohy, wat vertel kan word. Maar hierdie wasbeeldoptog is dit nie."[9]
.JPG)
Die film is gekritiseer omdat dit die "wit verlosser"-beeld voortsit. Jeffrey Montez de Oca van die University of Colorado – Colorado Springs skryf in die uitbeelding van aanneming funksioneer "welsyn as ’n tekenende daad van witheid wat die sosiale magsverhoudinge verdoesel wat nie net welsyn moontlik maak nie, maar ook ’n stedelike onderklas skep wat welsyn nodig het."[10] Melissa Anderson van die Dallas Observer voer aan die "stom, gedwee" uitbeelding van Oher onderskryf in werklikheid die stereotipe van Afro-Amerikaanse onderwerping aan wit gesag.[11]
Michael Oher het ook sy misnoeë oor die prent uitgespreek en veral beswaar gemaak teen die uitbeelding van sy intelligensie. In sy boek van 2012, I Beat the Odds: From Homelessness, to the Blind Side, and Beyond, het Oher geskryf: "Ek het gevoel asof dit my as dom uitbeeld eerder as ’n kind wat nooit konsekwente akademiese onderrig gehad het nie en uiteindelik floreer het toe hy dit kry."[12][13][14] Die prent se bewering dat hy nie Amerikaanse voetbal verstaan het nie, is nog ’n irritasiepunt vir Oher. Toe hy gepraat het oor hoe sy aanneemfamilie hom geleer het, het hy gesê: "Nee, dit is glad nie ek nie! Ek bestudeer – bestudeer regtig – die spel al vandat ek ’n kind was!"[12][14] Ondanks sy misnoeë met sy uitbeelding, het Oher gesê hy hou van die fliek se boodskap van volharding en die algemene uitbeelding van die Tuohy-familie. "Hulle is my familie en sonder hulle sou ek nie hier gewees het nie." [15]
Verwysings
[wysig | wysig bron]- ↑ Dave McNary (27 Maart 2009). "Kathy Bates to star in 'Blind Side'". Variety. Besoek op 7 Junie 2009.
- ↑ Fletcher, Michael A. (14 Augustus 2023). "'Blind Side' subject Oher alleges Tuohys made millions off lie". ESPN. Besoek op 14 Augustus 2023.
- ↑ Kaplan, Anna (15 Augustus 2023). "The Blind Side family now What happened to the Tuohys after the movie came out". NBA News. The Today Show. Besoek op 26 April 2024.
- ↑ Schlabach, Mark (29 Junie 2009). "Prominent coaches turn actors for film". ESPN. Besoek op 1 Julie 2009.
- ↑ Johnson, Richard; Kirk, Jason (21 Julie 2017). "Hugh Freeze, Houston Nutt, and Michael Oher just made 'The Blind Side' super weird". SB Nation. Besoek op 27 Desember 2018.
- ↑ "The Blind Side". Metacritic. Besoek op 30 April 2022.
- ↑ Scott, A. O. (20 November 2009). "Steamrolling Over Life's Obstacles With Family as Cheerleaders". The New York Times (in Engels). ISSN 0362-4331. Besoek op 24 November 2021.
- ↑ Michael Rechtshaffen (15 November 2009). "'The Blind Side': Film Review". The Hollywood Reporter.
- ↑ Peter Bradshaw (25 Maart 2010). "Film review: The Blind Side". the Guardian.
- ↑ Montez de Oca, J. (2012). White Domestic Goddess on a Postmodern Plantation: Charity and Commodity Racism in The Blind Side. Sociology Of Sport Journal, 29(2), 131–150.
- ↑ Anderson, Melissa (19 November 2009). "The Blind Side: What Would Black People Do Without Nice White Folks?". Dallas Observer.
- 1 2 Oher, Michael (2012). I Beat the Odds: From Homelessness, to The Blind Side, and Beyond. Avery. ISBN 978-1592406388.
- ↑ "Michael Oher Says 'The Blind Side' Has Ruined His Football Career". Shadow and Act. 20 April 2017. Besoek op 21 Augustus 2020.
- 1 2 Linda, Holmes (8 Februarie 2011). "Beyond 'The Blind Side,' Michael Oher Rewrites His Own Story". NPR. Besoek op 21 Augustus 2020.
- ↑ Person, Joseph (29 Januarie 2016). "Super Bowl 50: 'The Blind Side' Michael Oher feels wanted at Carolina Panthers". The Sydney Morning Herald. Besoek op 28 November 2017.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
