The Four Seasons (TV-reeks)
| The Four Seasons | |
| Genre | Komediedrama |
|---|---|
| Geskep deur | Tina Fey & Lang Fisher & Tracey Wigfield Gebaseer op The Four Seasons (1981), Alan Alda |
| Met |
|
| Oorsprong | VSA |
| Taal | Engels |
| Aantal seisoene | 2 |
| Aantal episodes | 16 |
| Uitvoerende vervaardiger(s) |
|
| Vervaardiger(s) |
|
| Kinematografie | Tim Orr |
| Produksiemaatskappy |
|
| Uitsending | |
| Oorspronklike kanaal | Netflix |
| Oorspronklike lopie | 1 Mei 2025 |
.jpg)
.jpg)
The Four Seasons is 'n Amerikaanse komediedrama vir televisie wat deur Tina Fey, Lang Fisher en Tracey Wigfield vir Netflix geskep is. Akteurs sluit in Fey, Steve Carell, Colman Domingo en Will Forte. Dit is 'n verwerking van die 1981-rolprent met dieselfde naam wat deur Alan Alda geskryf en geregisseer is. Alda vertolk 'n gasrol in die reeks.
Die eerste seisoen se première was op 1 Mei 2025 op Netflix. In dieselfde maand is die reeks vir 'n tweede seisoen hernu. Die pemière daarvan was op 28 Mei 2026.
Hoofakteurs
[wysig | wysig bron]- Steve Carell as Nick, Anne se toekomstige eksman
- Kerri Kenney-Silver as Anne, Nick se toekomstige eksvrou
- Will Forte as Jack, Kate se man
- Tina Fey as Kate, Jack se vrou
- Colman Domingo as Danny, Claude se man, 'n argitek
- Marco Calvani as Claude, Danny se man
- Erika Henningsen as Ginny, 'n 32-jarige mondhigiënis met wie Nick utgaan ná sy egskeiding
Storielyn
[wysig | wysig bron]Bederwingswaarskuwing: Die storielyn en/of storie se einde volg hieronder.
Seisoen 1
[wysig | wysig bron]In die lente kom ses vriende – Nick, Anne, Kate, Jack, Danny en Claude – by Nick en Anne se huis aan die meer bymekaar vir 'n naweek. Op 'n staptog onthul Nick aan Danny en Jack hy is van plan om van Anne te skei ná 'n huwelik van 25 jaar. Dié aand vertel Jack vir Kate daarvan. Die volgende oggend hoor Kate, Jack en Danny dat Anne 'n herbevestiging van haar en Nick se huwelik reël. Hulle kan nie vir haar vertel wat Nick beplan nie en besluit om aan die seremonie deel te neem.
In die somer gaan die groep sonder Anne na 'n tropiese eko-oord. Die vakansie is beplan deur Ginny, Nick se jong, avontuurlustige nuwe meisie. Nick klim 'n rotsmuur uit om Ginny te beïndruk, maar trap op 'n seekastaiing en beseer sy voet. Hy probeer Jack en Kate oorreed dat hy gelukkig is. Op sy versoek probeer Jack and Kate met Ginny vriende maak. Intussen voel Danny versmoor deur Claude wat hom heeltyd versorg ná 'n operasie. Kate en Jack wonder wanneer hulle opgehou het om pretdinge saam te doen.
In die herfs gaan die groep na Jack, Kate en Danny se alma mater vir 'n familienaweek. Beide Kate en Jack se dogter, Ashlyn, en Anne en Nick se dogter, Lila, loop daar klas. Nick stel Ginny aan Anne bekend. Lila is ontsteld dat Nick vir Ginny saamgebring het, en Anne is nie opgewonde daaroor om haar te ontmoet nie. Kate en Jack besluit om huweliksberading te ondergaan om hulle huwelik te probeer red.
In die winter gaan Nick op oujaarsdag op 'n skivakansie saam met Ginny en haar vriende. Kate, Jack, Danny, Claude en Anne is op 'n ander skivakansie wat Anne gereël het. Anne bring haar nuwe kêrel, Terry, saam. Dis vir Nick moeilik om by Ginny se vriende aansluiting te vind en hy en Ginny baklei toe sy uitvind hy kruip in hulle kamer weg om haar vriende te vermy. Kate en Jack baklei oor die feit dat Kate alles vir hom moet doen. Daarna kry Kate 'n oproep van Ginny wat haar meedeel dat Nick in 'n motorongeluk gesterf het.
Nick se begrafnis is 'n ramp. Anne wil nie hê Ginny moet deel van die diens wees nie en kan nie op die begrafnis praat nie weens haar gemengde gevoelens oor Nick. Ná die begrafnis is Ginny ontsteld oor hoe die diens afgeloop het, en oor Anne wat haar en Nick se verhouding afmaak asof dit niks beteken het nie. Sy storm uit in die sneeu en die groep gaan na haar soek. Anne sien Ginny alleen op die stoep sit en huil. Sy vra verskoning oor haar gedrag. Intussen val Kate in die bevrore meer en Jack red haar. Terug in hulle kamer besluit hulle om aan hulle huwelik te werk. Kate verklaar vir die eerste keer Jack is haar sielsmaat. Tydens aandete kondig Anne aan dat Ginny swanger is met Nick se kind.
Seisoen 2
[wysig | wysig bron]In die lente sluit 'n hoog swanger Ginny by Anne, Kate, Jack, Danny en Claude aan toe hulle Nick se as op 'n berg wil strooi wat vir hom spesiaal was. Intussen het Anne en Ginny regsprobleme sonder dat die ander daarvan weet, omdat Anne en Nick se skeisaak nie voor sy dood afgehandel is nie. Een aand onthul Ginny sy verwag 'n seuntjie. Die eerste dag is daar kinders waar die groep die as wil strooi, en hulle keer onverrigter sake terug na die hotel. Die volgende dag loop hulle weer met die berg op, maar dié keer vergeet Danny die as in sy hotelkamer. Toe die vriende die motel wil verlaat, daag die polisie op en sê hulle kan nie gaan nie weens 'n skieter in die omtrek. Terwyl hulle in die hotel ingehok sit, kom baie geheime uit. Hulle vind byvoorbeeld uit van Anne en Ginny se probleme. Nadat die skieter aangekeer is, gaan hoor Anne of Ginny oukei is. Die volgende dag, net voor die groep vertrek, besluit hulle om eers Nick se as te gaan strooi. Terwyl hulle op die berg is, onthul Anne dat Ginny by haar gaan intrek.
In die somer gaan Anne, Jack, Danny, Claude, Ginny en Kate op 'n seevakansie saam met Ginny se seun, Eugene, wat die groep besluit om Gino te noem. Kate sê vir Danny Jack mis 'n mansvriend soos Nick. Anne sê sy is klaar daarmee om uit te gaan en sy gaan haar nou toespits op Ginny en die baba. Kate is opgewonde toe sy sien Jack maak 'n nuwe vriend op die strand. Sy naam is Mark Brett. Toe Jack Mark die volgende aan vir aandete nooi, besluit die ander om hom langs Anne aan die tafel te laat sit. Anne bring tyd saam met Mark en keer laatnag na hom terug vir seks.
Kate raak ontsteld en sê dis omdat die vakansie einde se kant toe staan, maar Jack kom agter dit is weens sy houding. Kate vind uit Jack het dié somer elke dag gevape, en dit laat haar besluit om dit ook uit te toets. Terwyl sy onder die invloed is, onthul sy sy voel elke dag miserabel. Anne en Mark besluit hulle gaan mekaar nooit weer sien nie. Ginny raak moeg vir Anne se inmengery toe sy sê sy moenie die baba in die see inneem nie. Sy neem hom later see toe en laat hom sy voete natmaak, soos sy vroeër wou.
In die herfs hou Anne 'n partytjie op Dankseggingsdag en nooi baie mense. Jack is ontsteld, want hy wou allerhande Nick-dinge gedoen het. Danny onthul dat hy en Claude Italië toe gaan trek. Anne hoor hoe Ginny vir haar dogter sê sy gaan dalk die vakansie aanbly, en Anne skop haar uit die huis. Jack val buite en dit bring 'n einde aan sy hoop om aan die maraton deel te neem.
In 'n terugflitsepisode kom eers Claude en Danny, en daarna Jack, Kate en hulle dogter, Beth, by Nick en Anne aan vir die vakansie. Jack is senuweeagtig oor Covid, maar die ander voel goed omdat hulle al die riglyne nagekom het. Dié aand hou hulle 'n talentkompetisie. Deur die aand kry Nick teksboodskappe van 'n jonger vrou. Sy kom later in haar motor by die huis aangery en gee vir Danny 'n pastei om vir Nick te gee. Nick erken aan Danny hy het die vrou voor Covid gesoen, maar die grendeltyd het hom daarvan gered om sy vrou verder te verkul. Later die aand gaan Anne, wat snuf in die neus oor 'n verhouding het, deur Nick se selfoon. Nick gooi die pastei in die vullisblik en belowe Anne hy het die vrou net gesoen. Anne sê sy weet hy het haar al verkul en dat hy dit weer sal doen. Sy storm uit die huis, maar toe sy nie haar motorsleutel kan kry nie, keer sy terug.
In die winter gaan kuier Kate, Jack en Anne by Claude, Danny en Claude se familie in Italië. Anne sê dalk ontmoet sy daar 'n Gianpiero. Jack raak beserker tydens 'n sokkerwedstryd saam met Claude en 'n paar plaaslike mans. Claude neem Jack daarna uit vir 'n drankie en bespreek sy woedeprobleme met hom. Danny erken aan Kate dat hy nooit na Italië moes verhuis het nie. Kate is verbaas, want Danny vertel haar heeltyd hoe wonderlik dit daar is. Dié aand kry Danny 'n oproep van sy ma. Sy is in die hospitaal nadat sy geval het en Danny gaan terug na Philadelphia om haar te gaan help. Hy bel later vir Claude en sê hy sal dalk langer moet bly. Kate vind uit van 'n marathon die volgende dag en oorreed Jack om deel te neem. Sy help Jack oor die eindstreep nadat hy wou tou opgooi. Toe Danny sy ma probeer oorreed om saam met hom terug te gaan Italië toe, weier sy. Claude vlieg Amerika toe en kom daar met 'n voorstel vorendag: Hy en Danny sal by sy ma intrek om haar te help. Anne besluit om in Italië agter te bly en hulle huis op te pas. Toe Nick en Kate wegry, kom die nuwe buurman, Gianpiero, daar aan en ontmoet Anne.
Ontvangs
[wysig | wysig bron]Die reeks het 'n meestal goeie reaksie van resensente ontlok.[1][2] Op Rotten Tomatoes het die eerste seisoen 'n goedkeuringsyfer van 77% gehad, gebaseer op 62 resensies. Metacritic het dit 'n telling van 61 uit 100 gegee, gebaseer op 30 resensies, wat dui op 'n "algemeen gunstige" reaksie.
In The Guardian het Lucy Mangan die reeks 4 uit 5 gegee en geskryf: "The Four Seasons is Fey en haar medeskrywers en -akteurs op hulle stukke, en alles is beïnvloed deur haar intelligensie, humorsin en ondervinding."[3] Alan Sepinwall van Rolling Stone het geskryf: "Daar is 'n paar snaakse oomblike, maar oor die algemeen voel dit dun – dis minder van 'n televisieprogram as 'n verskoning vir 'n klomp talentvolle mense, van wie verskeie ou vriende is, om saam uit te hang op 'n verskeidenheid mooi plekke."[4]
Op Rotten Tomatoes was 88% van die tweede seisoen se resensies positief, met 'n gemiddelde punt van 7,2/10. Die konsensus lui: "Deur hernieude doelgerigtheid te vind ná ’n groot verlies, balanseer The Four Seasons lag en hartseer met die selfvertroue van 'n reeks wat gemaklik in sy eie ritme gevestig raak.”[5] Op Metacritic het dit 'n telling van 75 uit 100 gekry op grond van 14 resensies, weer eens 'n "algemeen gunstige" ontvangs.[6]
Verwysings
[wysig | wysig bron]- ↑ Ardrey, Taylor (1 Mei 2025). "'The Four Seasons,' adapted from 1981 movie, now on Netflix: Cast, trailer, what to know". USA Today. Besoek op 5 Mei 2025.
- ↑ "The Four Seasons on Netflix: Cast, Plot, and Breakdown of the Show". Hollywood.com. 1 Mei 2025. Besoek op 5 Mei 2025.
- ↑ Mangan, Lucy (1 Mei 2025). "The Four Seasons review – Tina Fey's midlife comedy is properly funny and heartbreaking". The Guardian. Besoek op 3 Mei 2025.
- ↑ Sepinwall, Alan (1 Mei 2025). "'The Four Seasons' Brings Middle-Age Malaise on Vacation". Rolling Stone. Besoek op 3 Mei 2025.
- ↑ "The Four Seasons: Season 2". Rotten Tomatoes. Besoek op 3 Junie 2026.
- ↑ "The Four Seasons: Seisoen 2". Metacritic. Fandom, Inc. Besoek op 3 Junie 2026.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
