The Upside
| The Upside | |
|---|---|
| Regisseur | Neil Burger |
| Vervaardiger |
|
| Draaiboek | Jon Hartmere, geskoei op The Intouchables deur Éric Toledano en Olivier Nakache |
| Met | |
| Musiek deur | Rob Simonsen |
| Kinematografie | Stuart Dryburgh |
| Ateljee | Escape Artists |
| Verspreider |
|
| Uitgereik | 8 September 2017, Toronto- Internasionale Rolprentfees |
| Speeltyd | 126 minute[2] |
| Land | VSA |
| Taal | Engels |
| IMDb-profiel | |
.jpg)
.jpg)
.jpg)
_(cropped).jpg)
The Upside is 'n Amerikaanse komediedramarolprent wat deur Neil Burger geregisseer en deur Jon Hartmere geskryf is. Dit is 'n nuwe weergawe van die Franse prent van 2011 The Intouchables, wat geïnspireer is deur die lewens van Abdel Sallou en Philippe Pozzo di Borgo.
Die prent gaan oor 'n verlamde miljardêr (Cranston) wat 'n onwaarskynlike vriendskap aanknoop met 'n gevangene wat onlangs op parool uit is (Hart). Hy huur hom om hom te versorg. Ook in die prent is Nicole Kidman, Golshifteh Farahani en Julianna Margulies.
Dit is die derde weergawe van The Intouchables ná die Indiese film Oopiri en die Argentynse Inseparables.[3]
Die Engelse nuwe weergawe is in Julie 2011 aangekondig. Verskeie akteurs sou na bewering in die prent speel, soos Chris Rock, Idris Elba, Colin Firth en Jessica Chastain. Die verfilming het in Januarie 2017 in Philadelphia begin.
The Upside se première was op 2017 se Toronto- Internasionale Rolprentfees.[4] Die prent het gemengde resensies gekry wat die chemie tussen Hart en Cranston en hulle toneelspel prys, maar die storielyn kritiseer omdat die prent "voorspelbaar en 'n cliché" is.[5]
Hoofakteurs
[wysig | wysig bron]- Kevin Hart as die oudgevangene Dell Scott
- Bryan Cranston as die miljardêr Philip Lacasse
- Nicole Kidman as Yvonne Pendleton, Philip se persoonlike assistent
- Golshifteh Farahani as Maggie, Philip se fisioterapeut
- Aja Naomi King as Latrice, Dell se eksvrou
- Tate Donovan as Carter, Philip se buurman
Storielyn
[wysig | wysig bron]Bederwingswaarskuwing: Die storielyn en/of storie se einde volg hieronder.
Dell Scott en die kwadrupleeg Philip Lacasse jaag in 'n Ferrari deur New York se strate en word deur die polisie afgetrek. Dell oortuig die polisiemanne dat hy met Philip hospitaal toe jaag. Philip speel saam en die polisie vergesel hulle na die hospitaal.
Ses maande vroeër ontmoet Dell sy paroolbeampte en dié sê hy het handtekeninge nodig om te bewys hy soek werk, anders oortree hy sy paroolvoorwaardes. Hy gaan in die dakwoonstel in van Philip, 'n ryk kwadrupleeg, wat sy lus om te lewe verloor het. Philip en sy assistent, Yvonne Pendleton, doen onderhoude met kandidate vir die pos as sy inwonende versorger. Dell storm in en eis 'n handtekening vir sy paroolbeampte. Philip bied hom die pos aan omdat hy dink sy onbekwame houding sal sy dood veroorsaak. Yvonne maak beswaar, maar Dell wys die pos van die hand.
Dell besoek sy eksvrou, Latrice, en hulle seun, Anthony, in hulle armoedige woonstel, maar nie een wil hom in hulle lewe terughê nie. Hy gee Anthony 'n boek wat hy uit Philip se biblioteek gesteel het.
Uiteindelik aanvaar Dell Philip se aanbod. Hy besoek sy eksvrou om sy eerste salaris vir haar te gee en vra die gesteelde boek terug, maar sy weier om dit vir hom te gee. Toe Philip aan Dell sy sreng beleid verduidelik dat hy onder geen omstandighede kunsmatige asemhaling wil hê nie, besef Dell hy het sy lus vir die lewe verloor. Toe hy hom kry waar hy sukkel om asem te haal, weier hy egter om hom te laat sterf. Dell neem Philip op 'n uitstappie in die stad, waar hulle dagga rook vir Philp se pyn. Hulle begin 'n band vorm en Philip vertel vir Dell hy is in 'n valskermsweefongeluk beseer. Hy vertel ook vir hom van die pyn toe hy sy vrou verloor het. Dell pas aan by die versorging van Philip en verander selfs sy rolstoel. Hy word bekend gestel aan opera en moderne kuns. Hy begin sy eie skilderye skilder en Philip stal dit in sy dakwoonstel uit.
Dell vermoed Yvonne het gevoelens vir Philip, maar sy vertel hom Philip is in 'n "skriftelike verhouding" met 'n vrou genaamd Lily. Hulle het nog nooit met mekaar gepraat nie en skryf net briewe aan mekaar. Met Dell se aanmoediging los Philip vir haar 'n stemboodskap. Toe sy terugbel, spreek hulle af om die Saterdagaand te gaan uiteet.
Philip gaan saam met Dell en sy seun uit vir die dag. Alles loop reg, totdat Dell vir Anthony die boek terugvra; Anthony, wat teleurgesteld in sy pa is, gee die boek aan Anthony terug en loop weg.
Dell en Philip keer terug huis toe en vind uit daar is 'n verrassingspartytjie vir Philip se verjaarsdag wat Yvonne teen sy wil met sy bure gereël het. Dell en Philip rook weer dagga en Dell oorreed hom om by die gaste aan te sluit. Carter, 'n buurman van wie Philip nie hou nie, nader hom oor Dell se misdaadrekord, maar Philip ignoreer hom.
Die Saterdagaand by die restaurant onthul Philip dat Carter Dell se skildery vir $50 000 gekoop het, wat hy vir hom gee om sy eie besigheid mee te begin. Toe Lily aankom, sê sy Dell hoef nie te bly nie, want sy het Philip se toestand voor die tyd nagevors. Later raak sy egter angstig en oorstelp. Philip is seergemaak en beëindig die afspraak skielik. Hy keer terug huis toe, waar hy tekere gaan en Dell afdank.
Die tyd gaan verby. Dell koop vir Latrice en Anthony 'n nuwe huis en begin 'n besigheid wat gemotoriseerde rolstoele vervaardig. Maggie kom vra Dell om Philip te help, want hy het swaarmoedig geraak en Yvonne weggedryf. Dell neem Philip uit vir 'n rit, en dit lei tot die voorval aan die begin van die prent. Hulle vlug van die hospitaal af en herstel hulle vriendskap. Dell verras Philip met 'n valskermsweefuitstappie en is geskok toe hy gedwing word om mee te doen. Dell bring Philip terug huis toe om Yvonne te ontmoet, waarna hy hulle alleen los om hulle verhouding te herstel terwyl hy teruggaan na Latrice en Anthony.
Ontvangs
[wysig | wysig bron]Lede van die gehoor wat by CinemaScore ondervra is, het die prent 'n A gegee (op 'n skaal van A+ tot F), terwyl PostTrak berig fliekgangers het dit 4,5 sterre uit 5 gegee en die meeste "beveel dit beslis aan" (66%).[6]
Op Rotten Tomatoes het die prent 'n goedkeuringsyfer van 43%, gebaseer op 191 resensies, en 'n gemiddelde punt van 5,3/10. Die webtuiste se konsensus lui: "Prekerig, manipulerend en frustrerend vol clichés."[7] Op Metacritic het die prent 'n punt van 46 uit 100 gekry, gebaseer op 40 resensies, wat dui op 'n "gemengde of gemiddelde" ontvangs.[8]
Richard Roeper van die Chicago Sun-Times skryf: "Hart lewer 'n opregte en relatief beskeie vertolking as Dell, maar hy speel 'n alte bekende fliekstereotipe."[9]
Scott Tobias van Variety het dit gekritiseer omdat dit nie op die oorspronklike prent verbeter nie. "So min is gedoen om The Intouchables vir die Amerikaanse kultuur of 'n nuwe gehoor by te werk of varser te maak dat The Upside geen integriteit as 'n aparte stuk werk het nie."[10]
Peter Bradshaw van The Guardian skryf: "Die hele affêre is misreken en sieklik soet", en hy gee dit een ster uit vyf.[11]
Verwysings
[wysig | wysig bron]- ↑ Wiseman, Andreas (14 Februarie 2019). "Amazon Prime Video Picks Up All Int'l SVOD Rights For 'The Upside', Will Debut The Film In Key Markets". Deadline Hollywood. Besoek op 2 Julie 2021.
- ↑ "The Upside (12)". British Board of Film Classification. Besoek op 16 Februarie 2023.
- ↑ Meunier, Emilie (6 September 2017). "Remake américain d'Intouchables : Eric Toledano et Olivier Nakache ont vu les premières images... et ils ont été étonnés ! (VIDÉO)". Télé-Loisirs.fr (in Frans). Yahoo. Geargiveer vanaf die oorspronklike op 28 Junie 2022. Besoek op 4 Januarie 2019.
- ↑ "Toronto Film Festival 2017 Unveils Strong Slate". Deadline Hollywood. 25 Julie 2017. Besoek op 25 Julie 2017.
- ↑ Libbey, Dirk (11 Januarie 2017). "The Upside Reviews Are In, Here's What Critics Are Saying". CinemaBlend. Besoek op 12 Januarie 2019.
- ↑ D'Alessandro, Anthony (13 Januarie 2018). "'Upside' Set To Be STX's First No. 1 Opener With $19M+; 'Aquaman' Flips Over $1B WW; Keanu Reeves Hits B.O. Low With 'Replicas'". Deadline Hollywood. Besoek op 13 Januarie 2019.
- ↑ "The Upside (2019)". Rotten Tomatoes. Fandango Media. Besoek op 6 Februarie 2021.
- ↑ "The Upside reviews". Metacritic. Besoek op 17 Januarie 2019.
- ↑ Roeper, Richard (10 Januarie 2019). "'The Upside' puts up pointless obstacles on two men's path to betterment". Chicago Sun-Times.
- ↑ Tobias, Scott (16 September 2017). "Film Review: 'The Upside'". Variety.
- ↑ Bradshaw, Peter (10 Januarie 2019). "The Upside review – Bryan Cranston heads up horrific odd-couple disability drama". The Guardian – via www.theguardian.com.
Skakels
[wysig | wysig bron]- The Upside op IMDb
Hierdie artikel is in sy geheel of gedeeltelik uit die Engelse Wikipedia vertaal.
