Theo Kleynhans

in Wikipedia, die vrye ensiklopedie
Jump to navigation Jump to search

Theo Kleynhans is ’n Afrikaanse skilder, beeldhouer en dramaturg.

Lewe en werk[wysig | wysig bron]

Theo Kleynhans is op 30 November 1965[1] in Welkom gebore, waar hy groot word en skoolgaan aan Goudveld Hoërskool en Welkom Gimnasium. Hy studeer aan die Universiteit van Pretoria, University of Houston in Texas, Universiteit van Suid-Afrika en die Randse Afrikaanse Universiteit. Benewens sy kunsstudies is hy ook ’n opgeleide maatskaplike werker. Die Klein Karoo Nasionale Kunstefees (KKNK) wys hom vir drie jaar aan as koördineerder van die visuele kunste en later is hy kurator van die Woordfees se kunsroete op Stellenbosch. Vir sowat agt jaar is hy betrokke by die Aardklop-Kunstefees op Potchefstroom, waarna hy in 2013 aangestel word as feeskurator vir die kunste vir hierdie fees. Hy lê hierdie pos neer na die fees van 2014 om meer tyd te hê om aan sy eie kuns te wy. Verder is hy ook betrokke by die kunsregie vir internasionale televisie-advertensies. Vir ’n tyd dien hy as Wes-Kaapse voorsitter van die South African National Association for Artists. Hy is vryskut kunsresensent vir Die Burger en voorsitter van die Bellville Kunsvereniging. Hy is ’n beeldhouer en skilder en hou uitstallings van sy werk in San Francisco, New York en Houston in die Verenigde State van Amerika, Edinburgh in Skotland, Londen in Engeland en Johannesburg, Kaapstad, Pretoria, Grahamstad, Oudtshoorn, Bellville, Bloemfontein en Stellenbosch in Suid-Afrika. Sy solotentoonstelling by die KKNK van 2009 heet “Onthou / Vergeet” en hierin besin hy oor die mens se onvermoë om herinneringe volledig terug te roep. Sy werk is opgeneem in vele private en openbare versamelings in Suid-Afrika en in die buiteland. In 2014 stal hy negentig verskillende erdeware-borde uit by die Cape Town Art Fair. Vir sy kuns verower hy vele pryse, waaronder die Dreams Award, die Plascon Skilderprys en die SA Breweries Sculpture Award. Hy was ook ’n finalis vir die Absa Atelier-toekennings, die Momentum Life Awards en die APSA Ceramic Awards. Aanvanklik verkies hy om in nywerheidsgebiede te woon weens sy ongereelde werkure en sy voorliefde vir klipharde musiek terwyl hy werk. Hy bly vir ’n tyd in Bellville-Suid in ’n massiewe woonstel bo-op ’n gebou se dak, maar koop dan ’n bouvallige huis in Boston in die noordelike voorstede van Kaapstad. Hierdie huis restoureer hy en versier dit met sy kuns en talle ander kunswerke.

Skryfwerk[wysig | wysig bron]

Sy dramas “Drie tannies en ’n tert” en “Skottelgoed” word onder andere by die Klein Karoo Nasionale Kunstefees opgevoer en “Bloedsuiker” word in 2005 by die Aardklop-kunstefees in Potchefstroom opgevoer. “Drie tannies en ’n tert” is die verhaal van vier verskillende vroue: die kleindorpse troubeplanner, die middelklas skemerkelkie gasvrou, die televisie-aktrise en die kleurlingvrou. Op vernuftige wyse word erns met humor gemeng om die verhale van hierdie uiteenlopende vroue in die samelewing te vertel. In “Skottelgoed” is ’n gasvrou aan die woord wat vir die soveelste keer op kort kennisgewing vir haar man en sy kliënte aandete moes maak, nadat hy slegs ’n paar versnaperings aangevra het. Wanneer almal weg is, gaan slaap haar man, maar sy moet eers die berg skottelgoed was. Die skottelgoed word ’n metafoor vir wasgoed in die openbaar uitwas, soos sy haar lewe betrag en die rol van die man en vrou in die samelewing uitpluis. Hierdie drama word ook verfilm en op DVD uitgereik. “Bloedsuiker” gaan oor twee ou minnaars wat vasgevang word in die stoorkamer onder die verhoog. Dit is ’n toeganklike stuk oor die posisie waarin kunstenaars hulle in die hedendaagse Suid-Afrika bevind. So word die karakters en alles wat met hulle gebeur metafore van die toestand van die kunste en die mense wat daarmee besig is. “Seuns” debuteer by 2013 se KKNK en handel oor vier ma’s wat hulle seuns bespreek. Ander dramas uit sy pen is “Ek ken hulle nie,Sit vir jou ’n gesig op,Plotseling, papawers!” en “Die Lelike Man”. Hy skryf ook gedigte, waarvan hy sommige op sy persoonlike webtuiste publiseer.

Bronnelys[wysig | wysig bron]

Boeke[wysig | wysig bron]

  • Van Coller, H.P. (red.) “Perspektief en Profiel Deel 3” Van Schaik-Uitgewers Pretoria Eerste uitgawe 2006

Tydskrifte en koerante[wysig | wysig bron]

  • Burger, Kobus “5 vrae aan… Theo Kleynhans” “Beeld” 24 September 2005
  • Coetzee, Terésa “Welkom by Theo se kunsparadys” “Beeld” 2 April 2014
  • Myburg, Johan “Kurator beïndruk met sy eerste Aardklop” “Beeld” 27 September 2013
  • Nieuwoudt, Stephanie “’n Visuele ontploffing” “My tyd Rapport” 23 Oktober 2011
  • Pople, Laetitia “Kunstenaar gebruik alle media, mense” “Beeld” 6 April 2009
  • Swart, Magda “Theo groet Aardklop as kunskurator” “Beeld” 16 Oktober 2014

Internet[wysig | wysig bron]

Ander verwysings[wysig | wysig bron]

  1. Volgens die webwerf Who’s Who South Africa: http://whoswho.co.za/theo-kleynhans-8224. Vele ander bronne gee sy geboortejaar aan as 1966, maar hierdie is die enigste bron wat ’n volledige datum verskaf en is dus waarskynlik korrek.