Tjololo

in Wikipedia, die vrye ensiklopedie

Tjololo is ’n luiperdmannetjie wat eertyds in die Mala Mala Natuurreservaat in die Mpumalanga-provinsie van Suid-Afrika gelewe het. Hy was die spil waarom die National Geographic feitefilm, "Stalking Leopards”, gedraai het.

Hy is op sesjarige ouderdom deur Kim Wolhuter, natuurlewe-kameraman en -rolprentmaker, in 1999 opgemerk, terwyl die groot kat nuwe grondgebied vir homself wou afbaken. Die naam Tjololo is ’n samestelling van woorde uit Swazi en Sjangaans, wat "die een wat alleen staan” beteken.

Tjololo was kleiner as die meeste luiperdmannetjies gebou, maar het tog daarin geslaag om ’n groot gebied, wat amper die hele Mala Mala beslaan het, te beheer. Hy het telkens sy rieme met groter mannetjies styfgeloop, maar het telkens as wenner uit die stryd getree. Hierdie luiperd het op die voorblad van die Oktober 2001-uitgawe van die National Geographic-tydskrif gepryk, asook in ander dokumentêre programme van Kim Wolhuter.

In Oktober 2007 is hy deur veldwagters beseerd in Mala Mala opgespoor. Die luiperd is verdoof en na die Nasionale Krugerwildtuin se veeartsenykundige afdeling vir behandeling gestuur. Met die afloop van die mediese behandeling is die teëmiddel toegedien, waarna Tjololo op veertienjarige ouderdom gesterf het.

Eksterne Skakels[wysig | wysig bron]

Hierdie artikel is in sy geheel of gedeeltelik vanuit die Engelse Wikipedia vertaal.