Tobea Brink

Tobea Brink is ’n Afrikaanse skrywer en vrou van Chris Brink, voormalige rektor van die Universiteit van Stellenbosch.

Lewe en werk[wysig | wysig bron]

Tobea Brink (gebore Du Preez) is op 18 Mei 1962 op Riversdal in die Kaapprovinsie gebore, waar sy op die plaas Windsor in die distrik groot word. Op hierdie dorp ondergaan sy ook haar skoolopleiding en sy matrikuleer in 1979 aan die Hoërskool Langenhoven. Sy studeer vanaf 1980 verder aan die Universiteit van Stellenbosch, waar sy ’n B.A.-graad verwerf met Afrikaans-Nederlands, Engels en Sielkunde as hoofvakke. Hierna verwerf sy die B.A. Honneurs-graad in Afrikaans-Nederlands met lof. Op universiteit is sy lid van die Letterkunde Laboratorium onder leiding van eers Lina Spies en daarna Sheila Cussons. Sy ontmoet in hierdie tyd haar man, Chris Brink, wat destyds lektor was aan die Universiteit van Stellenbosch. Aan die einde van haar Honneursjaar raak sy swanger, waarna sy verder studeer deur die Universiteit van Suid-Afrika vir ’n Hoër Onderwysdiploma. Saam met haar man bly sy dan ’n jaar in Canberra in Australië, waarna hulle ook in die Verenigde State van Amerika tyd deurbring voordat hulle na Kaapstad terugkeer.

Aan die Universiteit van Kaapstad werk sy as sekretaresse by die Fakulteit Opvoedkunde en voltooi ook ’n multidissiplinêre nagraadse diploma in African Studies. Hierna neem sy ’n posisie op as medeskrywer in die laerskoolafdeling van die “Ruimteland”-reeks van Afrikaans skoolhandboeke. Haar man aanvaar dan ’n pos as vise-rektor (navorsing) aan die Universiteit van Wollongong in Australië. Hier skryf sy in vir ’n meestersgraad in Sielkunde, wat sy met onderskeiding behaal met ’n verhandeling oor Jungiaanse Studies, met spesifieke verwysing na Kulturele Sielkunde. Tussen 2002 en 2007 is haar man rektor van die Universiteit van Stellenbosch en hy neem dan ’n posisie op as rektor van die Newcastle Universiteit in Engeland, waarna die gesin na Engeland verhuis. Hier woon hulle in Newcastle upon Tyne. Hulle het twee dogters, Carmen (wat met Down-sindroom gebore is) en Hestia, en ’n seun, Peter.

Skryfwerk[wysig | wysig bron]

Die hoofkarakter in “Die hemelklip”^[1] is Anna. Haar tweelingbroer, Adam, word met Down-sindroom gebore.^[2] Haar pa is in ’n ongeluk met ’n trekker oorlede en haar ma en oom hou die plaas aan die gang, sodat sy van kleinsaf die verantwoordelikheid op haar moet neem om vir Adam op te pas. Hierdie verantwoordelikheid het ’n diepgaande impak op haar lewe, sodat haar kinderdrome geeneen verwesenlik word nie en sy op 34 steeds ongetroud is. Die novelle word in twee dele verdeel, met die eerste deel wat die verhaal vertel van Anna en haar verhouding met Adam uit haar perspektief. Die tweede deel word in die derdepersoon vertel en speel af twaalf jaar na die einde van die eerste, met Adam wat nou reeds oorlede is. Hierdie roman word ook in Nederlands vertaal. “Die hemelklip” is in 2008 op die kortlys vir die Jan Rabie-prys vir vernuwende prosa.