Tom Jenkinsrylaan

in Wikipedia, die vrye ensiklopedie
Jump to navigation Jump to search
Tom Jenkinsrylaan
Spuitsement op die rand bo Tom Jenkinsrylaan
Uitsig oor Rietondale en omstreeke vanaf Tom Jenkinsrylaan met klipmuur wat deur Italiaanse krygsgevangenes gebou is in die voorgrond.

Tom Jenkinsrylaan is 'n pad aan die noordelike hang van Meintjieskop tussen Arcadia en Rietondale in Pretoria. Die pad sluit in die suide, aan die bokant van Meintjieskop, by Eastwoodstraat aan, en eindig aan die voet van die koppie in 'n T-aansluiting met Soutpansbergweg. Die pad is vernoem na Pretoria se burgemeester in 1944, mnr. Tom Jenkins. Dit is tydens die Tweede Wêreldoorlog deur Italiaanse krygsgevangenes gebou om Arcadia met Rietondale te verbind.[1][2]

Bouwerk aan die pad het in 2008 die onderwerp van 'n geskil tussen die Tshwane-departement van openbare werke (DOW) aan die een kant en plaaslike inwoners, die Tshwane Bouerfenis Vereniging en die Gautengse Erfenishulpbronowerheid, aan die anderkant geword. Die DOW het in 2007 begin met werk aan die pad om dit te stabiliseer. Die DOW voer aan dat die bogemiddelde reënval vroeg in 2008 skade aan die rotswand veroorsaak het, terwyl inwoners die blaam plaas op die veiligheidsmuur wat om die Bryntirion-landgoed, wat die Presidensiële ampswoning insluit, gebou word.

Die DOW het nie ’n erfenis-impakstudie laat doen voordat met werk aan die pad, wat ouer as 60 jaar is, begin is nie. Die werk, wat deur die DOW gedoen word, behels die spuit van beton oor die rotswande langs die pad. Die inwoners is bekommerd oor die estetiese impak van die werk op die geskiedkundige rylaan. Op 29 Februarie 2008 het die Rietondale/Riviera/Rietfontein/Deerness/Gezina (RRRDG)-gemeenskapsvereniging 'n dringende aansoek ingedien om ’n hofbevel teen die DOW te vekry om die werk aan die pad te staak. Op Vrydag 7 Maart 2008 het die hof die stakingsbevel van die hand gewys.[3][1][4]

Die plaaslike gemeenskapsvereniging het ’n Vriende van die Tom Jenkinsrylaan-trust gestig om vir die regskoste en konsultante te betaal in hulle stryd met die DOW.[5]

Verwysings[wysig | wysig bron]