Tony Smit

Tony Smit (née Robertson) was 'n Suid-Afrikaanse Springbok-atleet. Sy begin haar atletiekloopbaan in 1934 met 'n OP hoogspringrekord. Daarna verbeter sy verskeie spiesgooi-rekords. Sy was die enigste vrou in die Suid-Afrikaanse span wat aan die Rykspele van 1938 in Sydney deelgeneem het. In 1987 begin sy om aan veterane-atletiek deel te neem. In 1990 en 1995 kry sy Springbok-kleure. Daarna verbeter sy die wêreldrekord in spiesgooi 'n verdere twee keer. Sy het in 1996 uit atletiek uitgetree.

Biografie

A. H. (Tony) Robertson is op 19 Desember 1916 in die George-distrik gebore. Sy begin haar skoolloopbaan in 'n plaasskool en gaan later na die meisieskool op George. Haar ouers, mnr. en mev. Jimmy Robertson, verhuis gedurende 1930 na Middelburg en vestig hulle op Ravensbourne. Tony voltooi haar skoolopleiding hier op Middelburg.

Tony tree in 1943 in die huwelik met mnr. Piet Smit van Barrydale. Piet Smit was 'n boer, winkelier en ook die burgemeester van Barrydale. Hy is in 1976 oorlede.

Haar loopbaan as atleet begin op Rosmead. Die skoolhoof daar was mnr. J.J. Bruwer. Hy was 'n eertydse WP-atleet, toe onderwyser op Colesberg en sedert Julie 1932 skoolhoof op Rosmead. Hier stig hy die Rosmead-atletiekklub en 'n atletiekbaan word in 1933 aangelê. Tony en ander atlete van die omgewing sluit by die klub aan. Vanaf 1934 tot 1937 word die Oostelike Provinsie se jaarlikse atletiekkampioenskappe op Uniedag (31 Mei) op Rosmead aangebied. Hier lei Tony se sportprestasies haar tot groot hoogtes:

• 1934: Tydens die OP-kampioenskappe op Rosmead wen sy die 80-meter hekkies en die spiesgooi vir dames.

• 1936: Tony stel 'n nuwe Britse Ryksrekord op deur die spies oor die 130 vt. te slinger. Die ou rekord was 123 vt. en 1 duim. Sy wen ook die hoogspring, die 100-treë, die 80-meter hekkies en die diskus (voorgee).

In hierdie jaar word sy 'n Springbok. Sy verteenwoordig Suid-Afrika by die Britse Rykspele in Sydney, Australië, en is saam met Wally Hayward die enigste twee verteenwoordigers vir die OP. Sy en Wally ontmoet mekaar op Rosmead onderweg na Australië waar sy tweede gekom het in spiesgooi en Wally die ses myl wedloop wen. Haar S.A.-rekord vir spiesgooi is eers 16 jaar later deur 'n onderwyseres van Pretoria, mej. Swanepoel, verbeter.

Op 73-jarige ouderdom het sy steeds aan atletiek deelgeneem. Sy was lid van die S W D Meesters Atletiekvereniging (70 - 74 jaar groep). In 1988 stel sy die SA-rekord in spiesgooi en gewigstoot op. Sy wen ook die diskusgooi. Sedert 1987 het sy 18 medaljes in die Meesters-Atletiek verower.