Township-kuns

Township-kuns is 'n kunsrigting eie aan die politieke en sosiale struktuur van die Swart gemeenskap in Suid-Afrika en is deur Swart kunstenaars soos Mslaba Dumile, Andrew Motjouadi, Julian Motau en Leonard Matsoso ontwikkel. Township-kuns lewer sosiale kommentaar op die lewe van die Swartman.

Dit is 'n ekspressiewe idioom waarmee elke faset en luim van die lewe in 'n Swart woonbuurt (die township) gewoonlik op 'n baie sensitiewe en sprekende manier weergegee word. Soms is dit 'n regstreekse aanklag teen die politieke bedeling vir Swartes in Suid-Afrika, en soms is dit blote kommentaar op die lief en leed van die alledaagse lewe van die Swart stedeling. Township-kuns het gedurende die vyftigerjare in die Polly Street Art-Sentrum in Johannesburg ontstaan.

In die tyd was dit die enigste opleidingsentrum vir Swart kunstenaars in Gauteng en die beeldende kunste was boonop 'n relatief nuwe uitingsvorm vir Swart kunstenaars in Suid-Afrika. Die ervaringsveld waaruit feitlik al die kunstenaars inspirasie vir hulle kuns kon put, was die stedelike woonbuurte waar hulle gewoon of grootgeword het.

Township-kuns het egter nie tot die Polly Street-sentrum beperk gebly nie, maar het tot 'n volwaardige kunsrigting ontwikkel. Weliswaar word die kunssoort soms net om die politieke implikasies daarvan beoefen en waardeer, en gevolglik word township-kuns van 'n swak gehalte soms gelewer.

Bronnelys

• Wêreldspektrum, 1982, ISBN 0908409680, volume 27, bl. 138