Trein

in Wikipedia, die vrye ensiklopedie
Spring na: navigasie, soek
'n Elektriese trein.
'n Diesel aangedrewe trein.
'n Stoomtrein.

'n Trein is 'n voertuig wat op 'n spoor beweeg en uit een of meer trokke of waens bestaan. Treine word gebruik om mense, diere en goedere te vervoer. Die plek waar treine stop, sodat mense kan op- of afklim, word 'n treinstasie genoem. Die eerste trok van die trein is die lokomotief, wat die kragbron bevat en die res van die trein agterna sleep.

Alle treine word beheer deur 'n bestuurder wat die trein moet versnel en rem. Die bestuurder van 'n trein word die masjinis genoem.

Tipes treine[wysig]

Treine word ingedeel volgens aandryfmetode asook waarvoor dit aangewend word:

Volgens aanwending[wysig]

Goederetrein[wysig]

Goedere- of vragtreine word gebruik om goedere in trokke van een plek na 'n ander te vervoer. As voorbeeld, 'n trein wat steenkool na kragsentrales aanry of na uitvoerhawens vervoer, bv. die Sishen-Saldanha Spoorlyn.

Passasierstrein[wysig]

Passasierstreine gebruik spesiale waens eerder as trokke sodat mense gerieflik tussen stasies daarin vervoer kan word. 'n Voorbeeld hiervan is die Gautrein in Suid-Afrika. Op passasiertreine is daar kondukteurs wat kyk dat elke passasier oor 'n kaartjie beskik.

Volgens aandrywing[wysig]

Stoomtreine[wysig]

Die eerste geslaagde stoomtreindiens is in 1825 in Engeland ingestel. Stoomtreine het 'n stoker aan boord, wat die vuur moet stook om die stoom wat die trein aandryf te lewer. Namate dieseltreine meer gewild begin raak het, het stoomtreine in onbruik verval.

Dieselaangedrewe treine[wysig]

Dieseltreine beskik oor dieselenjins met 'n binnebrandmotor wat die Dieselsiklus gebruik om die trein vorentoe te beweeg. Die tipe treine word by treinstasies hervul.

Tydens die Sokkerwêreldbeker 2010 het die Suid-Afrikaanse owerhede 190 diesellokomotiewe op bystand gehad ingeval iets fout sou gaan met die elektriese lokomotiewe van Metrorail wat toeskouers rondgekarwei het.[1]

Elektriese treine[wysig]

Die eerste elektriese treine het in die 1800's hul verskyning in Europa en Amerika gemaak en word vandag algemeen gebruik. Treine met elektriese aandrywing het oorhoofse kragdrade oor die spore wat die trein se motors van elektrisiteit voorsien.

Sien ook[wysig]

Verwysings[wysig]

Commons-logo.svg
Wikimedia Commons het meer media verwant aan:
Trein (kategorie)