Uitkyk (wynplaas)
Die geskiedkundige wingerdplaas Uitkyk buite Stellenbosch is van besondere kultuur-historiese belang om sy 18de eeuse woonhuis in die Kaaps-Hollandse styl en die Sauer-familie.
Ligging
[wysig | wysig bron]Die plaas is by 33° 51′ suid, 18° 52′ oos, op ‘n hoogte van 1869 m en langs die die pad tussen Stellenbosch en Klapmuts. Dit is suidoos van Elsenburg en Klapmutskop en aan die oostekant van die plaas Kanonkop.
Geskiedenis
[wysig | wysig bron]In 1712 het die VOC die plaas van nagenoeg 50 ha toegeken aan Jan Oberholzer. Vyftig jaar later word dit verkoop aan Martin Melck, die eienaar van die aangrensende Elsenburg. Toe strek die plaas tot die piek Kanonkop op Simonsberg. In 1776 word Melck se skoonseun, Johan D. Beyers, die eienaar. Die U-vormige dubbelverdiepinghuis met sy binneplaas dateer uit 1788 en daar word vermoed dat die unieke gebouekompleks deels die werk is van Louis Thibault en Anton Anreith. Op die onderste verdieping is die Bataafse vloerteëls, die houtwerk en die muurskilderye nog die oorspronklike. In 1902 word Jacobus Wilhelmus Sauer, en later sy seun Paul Sauer, die eienaar.
Bronnelys
[wysig | wysig bron]- Fransen, Hans: A guide to the old buildings of the Cape. A survey of extant architecture from before c1910 in the area of Cape Town, Calvinia, Colesberg, Uitenhage. Kaapstad: Jonathan Ball, 2004. ISBN 1-86842-191-0