Ultras (sokker)
Ultras is ’n tipe sokkerondersteuners wat bekend is vir hul fanatieke steun aan hul spanne. Die term het oorspronklik in Italië ontstaan, maar word wêreldwyd gebruik om meestal georganiseerde ondersteuners van sokkerspanne te beskryf. Die gedrag van ultras-groepe sluit in: die sing van sokkerliedere, speel van musiekinstrumente soos dromme, gebruik van fakkels en rookbomme (hoofsaaklik as deel van tifo-koreografie), gereelde gebruik van uitgebreide vertonings, luidrugtige ondersteuning in groot groepe en die vertoon van vlae en banier by sokkerstadions – alles met die doel om ’n atmosfeer te skep wat hul eie span aanmoedig en teenstanders intimideer. Hierdie groepe reël ook dikwels reise om uitwedstryde by te woon.
Ultras-groepe is verantwoordelik vir baie gevalle van sokkergeweld en hooliganisme, hoewel hulle – anders as hooligan-firmas – nie die uitdruklike doel het om met ander ondersteuners te baklei nie. In sommige gevalle is ultras-groepe ook direk verbind aan ideologieë soos neo-Nazisme en ander vorme van verregse politiek, en soms selfs uiterste linkse politiek.[1][2][3] In sekere gevalle word die ondersteuning van hul span selfs sekondêr aan hierdie gewelddadige of politiese aktiwiteite, maar meestal is die politieke simbole, soos Keltiese kruise of beelde van Che Guevara, bloot maniere om die opponerende groep te provokeer.[4] In Nederland, byvoorbeeld, het ondersteuners van Feyenoord dikwels Hamas-slagspreuke geskree om ondersteuners van Ajax te terg, wat bekend is vir hul Joodse erfenis.[5]
In onlangse dekades het die kultuur ook ’n fokuspunt geword vir weerstand teen die kommersialisering van sokker.[6]
Daar is ook streekvariante en analoë van ultras, soos die casuals in die Verenigde Koninkryk, barra bravas in Spaans-Amerika, en torcidas organizadas in Brasilië.[7][8] ’n Belangrike verskil tussen die Britse casual-kultuur en die algemene ultras-kultuur is dat casuals gewoonlik hul spanidentiteit wegsteek om wetstoepassers te vermy, terwyl ultras-groepe hul klubkleure opvallend dra en in masse na die sokkerstadions marsjeer.
Verwysings
[wysig | wysig bron]- ↑ "The rise of Russia's neo-Nazi football hooligans". The Guardian. 24 April 2018. Besoek op 25 Junie 2025.
- ↑ "Learning from adjacent fields: the relation between extremism and hooliganism" (PDF). home-affairs.ec.europa.eu (in Engels). 26 Oktober 2018. Geargiveer (PDF) vanaf die oorspronklike op 17 Julie 2023. Besoek op 4 Augustus 2023.
- ↑ Jones, Tobias (26 Maart 2020). "1312 by James Montague review – inside the world of football's ultras". The Guardian (in Engels (VK)). ISSN 0261-3077. Besoek op 4 Julie 2023.
- ↑ "Eintracht-Fans stehen zu Che Guevara". Frankfurter Rundschau (in Duits). 4 Februarie 2019. Besoek op 25 Junie 2025.
- ↑ "Pervasive Antisemitism in Dutch Soccer Stadiums". Der Spiegel. 4 Oktober 2013. Besoek op 25 Junie 2025.
- ↑ "Are German fans really turning against the beautiful game?". The Guardian. 7 April 2008. Geargiveer vanaf die oorspronklike op 4 Desember 2013. Besoek op 18 Januarie 2011.
- ↑ "World Cup 2022: Argentina's 'barras bravas' bring the noise – DW – 12/11/2022". dw.com (in Engels). Besoek op 8 Maart 2023.
- ↑ "Torcidas Organizadas: Torcidas Organizadas no Brasil e no Mundo". Brasil Escola (in Portugees). Besoek op 8 Maart 2023.
