Vanes-Mari du Toit
Vanes-Mari du Toit (gebore 2 Augustus 1989) is ’n professionele netbalspeler wat al in 38 wedstryde vir die Proteas (2010-2017) en 36 wedstryde vir die SA Fast5 Netbal (2011-2015) span uitgedraf het.[1] Sy het internasionale erkenning ontvang toe sy klubnetbal in Australië en Engeland se Topligas gespeel het.
Netballoopbaan[wysig | wysig bron]
Sy het haar netballoopbaan in Gauteng begin en het op skool by die Afrikaanse Hoër Meisieskool in Pretoria haar liefde vir netbal ontdek. Vanes-Mari se provinsiale verteenwoordiging het in Gauteng-Noord (2005-2007) begin, waarna sy in Bloemfontein gaan studeer het en die Vrystaat netbalspan verteenwoordig het (2008-2009). Sy het teruggekeer na Tukkies en het Gauteng-Noord en Tukkies verder verteenwoordig (2010-2015), waarna sy Stellenbosch toe is waar sy Senior Wes-Kaap kleure (2015-2017) verwerf het.
Vanes-Mari het ook haar Senior Wes-Kaap Dames-kleure in Aksienetbal in 2019 verwerf. Sy het haar SA kleure verwerf op die ouderdom van 16 vir die SA o/17 (2006) netbalspan en het verder elke jaar agtereenvolgens ’n Suid-Afrikaanse span verteenwoordig: SA skole o/19 (2007), SA Universiteite o/19 (2008), SA o/21 (2009-2010), en toe die Senior Nasionale span ’n jaar later (2011) tydens die Netbal Wêreldbeker in Singapoer.[2] Haar laaste wedstryd vir die Proteas was in 2017. Sy het ook vir die Suid-Afrikaanse Fast5 Netbalspan gespeel (2011-2015).[3]
Vanes-Mari was altyd anders as die norm en veral haar netballoopbaan spreek boekdele daarvan, sy is baie bevraagteken as speler omdat sy soveel verskeie posisies op die netbalbaan kon behartig. Sy het Suid-Afrika op Hoofdoel (GS), Hoofdoelverdediger (GK), Hulpdoel (GA) en Hulpdoelverdediger (GD) verteenwoordig, wat tot vandag nog ongehoord is. Haar veelsydigheid het soms in haar guns getel en was ander kere nadelig as dit by die kies van die span gekom het.
Vanes-Mari is in 2013 aangewys as die beste speler in Afrika nadat sy die MVP (Most Valuable Player) toekennig ontvang het tydens die Afrika Kampioenskappe in Malawi.
Kort daarna het versoeke om in die buiteland te gaan speel ingestroo en sy is toe einde 2013 na die Adelaide Thunderbirds en het in Suid-Australië gebly. Die Thunderbirds was gesien as die beste netbalklub ter wêreld nadat hul die vorige jaar die ANZ (Australië en Nieu Seeland se professionele Netbalkampioenskap) gewen het vir die tweede keer en wat as die Topliga in die wêreld beskou word.
Die spanne in die ANZ het net een internasionale speler toegelaat en dit was ’n eerste dat ’n Suid-Afrikaanse netbalspeler genooi was.
Studies[wysig | wysig bron]
Sy het 'n graad in BCom Menslike Hulpbronbestuur aan die Universiteit van Pretoria voltooi in 2014 en verder honneurs in Industriële Sielkunde aan die Universiteit van Stellenbosch studeer in 2015.
Beserings[wysig | wysig bron]
Begin 2015 het Vanes-Mari geen keuse gehad as om ’n enkelherkonstruksie te ondergaan as gevolg van herhaardelike beserings.
Sy is einde 2015 na Engeland waar sy vir die Yorkshire Jets in die Engelse Premier Super Liga gespeel het en met ’n hele paar “Speler van die wedstryd” toekennings weggestap. In 2016 het Vanes-Mari weer haar buiging in die Protea Netbalspan tydens die vierhoekige reeks teen Australië, Nieu-Seeland en Engeland gemaak onder Norma Plummer.
Sy moes egter weens herhaaldelike beserings haar internasionale loopbaan tydelik opsy sit en dit is toe waar haar loopbaan as SuperSport netbalkommentator begin het.
Televisieloopbaan[wysig | wysig bron]
Vanes-Mari het verdere bekendheid verwerf toe sy die halfeind gehaal het tydens die bekende realiteitsprogram, Dancing With The Stars, op M-Net in 2018. Sy het die Suid-Afrikaanse publiek, en veral die Afrikaanse publiek, betower met haar suiwer Afrikaanse uitlatings en opregte geaardheid.
As gevolg van Vanes-Mari se gemaklikheid voor die kamera en spontane persoonlikheid het haar gewildheid toegeneem en sy is deur verskeie TV-programme genader om haar TV-loopbaan voort te sit. Vanes-Mari is tans op KykNet as Kwêla se nuutste TV-aanbieder te siene en is ook ’n gas op verskeie mediaplatforms.
Getroude en persoonlike lewe[wysig | wysig bron]
Vanes-Mari is op 21 Desember 2017 met die Springbokrugbyspan se assistentafrigter, Matthew Proudfoot, getroud. Hulle is tans uitmekaar.
Vanes-Mari is die direkteur van haar eie besigheid met die naam Proudfit, wat onder andere sportspesifieke onderklere ontwikkel vir vroue in verskeie sportsoorte.
Sy bied ook netbalafrigtingsklinieke en toernooie landswyd aan onder Proudfit en tree op as motiveringsspreker en seremoniemeester by talle sport- en korporatiewe geleenthede.
Sy het ’n groot passie vir liefdadigheid en tree op as die Kaapstad Hoofdame van die Caring Daisies Organisasie wat liefdadigheidsprojekte aanpak in die gemeenskap en gesinne in nood help. Sy is ook die Direkteur van Netbal vir The Barefoot Project wat aandag aan verskeie sportspesifieke behoeftes by ontwikkelende skole lewer en bystand verleen aan afrigters en sportorganiseerders in minderbevooregte gebiede.
Vanes-Mari is ook die ambassadeur van Project Braveheart wat ’n anti-boelieveldtog in skole van stapel stuur, met die oog op bewusmaking.
Verwysings[wysig | wysig bron]
- ↑ Netball South Africa official player profile Geargiveer 22 April 2012 op Wayback Machine.
- ↑ Vanes-Mari Du Toit player profile, Netball England website Geargiveer 9 Junie 2012 op Wayback Machine.
- ↑ Netball South Africa site Geargiveer 14 Januarie 2013 op Wayback Machine.