Gaan na inhoud

Vier Asiatiese Tiere

in Wikipedia, die vrye ensiklopedie
Vier Asiatiese Tiere
Die Vier Asiatiese Tiere, van noord na suid:  Suid-Korea,  Republiek China,  Hongkong en  Singapoer
Die Vier Asiatiese Tiere, van noord na suid:
Vlag van Suid-Korea Suid-Korea, Vlag van Republiek China Republiek China, Vlag van Hongkong Hongkong en Vlag van Singapoer Singapoer
Name (taalvariante)
Tradisionele Chinees   亞洲四小龍
Vereenvoudigde Chinees   亚洲四小龙
Pinyin Yàzhōu sì xiǎolóng
Wade-Giles Ya4-chou1 szu4 hsiao3 lung2
Betekenis Asië se Vier Klein Drake
Vier Asiatiese Tiere
Name (taalvariante)
Hangul   아시아의 네 마리 용
Hanja   아시아의 네 마리 龍
Hersiene Koreaanse Romanisering Asiaui ne mari yong
McCune-Reischauer Asiaŭi ne mari yong
Betekenis Asië se vier drake

Vier Asiatiese Tiere (oftewel die Vier Asiatiese Drake of Vier Klein Drake in Chinees en Koreaans) is 'n term wat gebruik is om na die vier Oos-Asiatiese lande Suid-Korea, Hongkong, die Republiek China op Taiwan en Singapoer te verwys, veral tydens die groot ekonomiese opswaai wat hierdie lande in die periode tussen 1950's en 1990's ervaar het.[1] Die term volg die voorbeeld van die sogenaamde Baltiese Tier, d.i. Estland, Letland en Litaue, en die Keltiese Tier wat verwys na die Republiek Ierland, almal vinnig groeiende ekonomieë.

Die term het later ook ander Suidoos-Asiatiese lande soos Thailand, Maleisië, Indonesië en Filippyne ingesluit.[2] Na dié vier Suid-Asiatiese ekonomieë word in Chineestalige ekonomiese gebiede letterlik verwys as die "vier klein Asiatiese drake" (Tradisionele Chinees: 亞洲四小龍; Vereenvoudigde Chinees: 亚洲四小龙; Pinyin: Yàzhōu sì xiǎolóng); hierdie term word deesdae ook in Koreaans, Japannees en Frans gebruik. Die term, wat in die 1980's geskep is, verwys daarna dat hierdie ekonomieë danksy hul hoë ekonomiese groei van ontwikkelende lande in ontwikkelde lande ontwikkel het. Die naam is gebaseer op die kragtige energie van 'n tier wat op die punt is om te spring en dui op die hoë dinamika van die ekonomiese opswaai.

Teen die begin van die vroeë 21ste eeu het hierdie ekonomieë volgens die Wêreldbank in hoëinkomstelande ontwikkel wat hulle spesialiseer in gebiede van mededingende voordeel. Hongkong en Singapoer het vername internasionale finansiële sentrums geword, terwyl Suid-Korea en die Republiek China leiers in die vervaardiging van elektroniese komponente en toerusting geword het; Suid-Korea het ook tot 'n groot wêreldwye wapenvervaardiger ontwikkel. Groot instellings het daarop aangedring om hulle as rolmodelle vir baie ontwikkelende lande te laat dien, veral die Tiger Cub-ekonomieë van Suidoos-Asië.[3][4][5]

In 1993 het 'n Wêreldbankverslag, The East Asian Miracle, neoliberale beleide gekrediteer vir die ekonomiese oplewing, insluitende die handhawing van uitvoergerigte beleide, lae belasting en minimale welsynstate. Institusionele ontledings het bevind dat daar 'n mate aan staatsinmenging betrokke was.[6] Volgens sommige ontleders het nywerheidsbeleid en staatsinmenging 'n baie groter invloed gehad as wat dit in die Wêreldbankverslag voorgestel word.[7][8]

Al die vier lande is lede van beide die Wêreldhandelsorganisasie en APEC, terwyl slegs Suid-Korea 'n lidland is van die Groep van 20 en die OESO; beide Singapoer en Suid-Korea is lede van ASEAN (laasgenoemde saam met Japan en die Volksrepubliek China van ASEAN+3). Al vier die lande is volgens die Internasionale Monetêre Fonds,[9] Menslike-ontwikkelingsindeks[10] en Wêreldbank[11] ontwikkelde lande.

Afname in misdaad

[wysig | wysig bron]
Langtermyn-afname van moordsyfers in Oos-Asiese lande

In baie Oos-Asiatiese lande was daar, veral van die 1960's af, 'n betreklik eweredige en parallele afname in misdaad. Dié lande se misdaadvlak is intussen aansienlik minder as dié van Westerse lande. Volgens die Verenigde Nasies se Kantoor vir Dwelms en Kriminaliteit hou hierdie afname verband met die spesifiek Oos-Asiatiese ontwikkelingsmodel, wat staat maak op nougesetheid en selfdissipline, gepaard met 'n bevordering van algemene opvoeding, 'n hoë vlak aan regulatoriese ingrypings deur die regering in beleggings en ekonomiese ontwikkeling, asook 'n doeltreffende openbare administrasie.[12]

Galery

[wysig | wysig bron]

Verwysings

[wysig | wysig bron]
  1. ↑ (en) Day, Dong-Ching (2021). "Four Asian Tigers' Political and Economic Development Revisited 1998–2017: From the Perspective of National Identity". Asian Journal of Interdisciplinary Research. 4 (4): 54–61. doi:10.54392/ajir2147.
  2. ↑ (de) "Tigerstaaten". Bundeszentrale für politische Bildung. Besoek op 28 Mei 2025.
  3. ↑ (en) "Can Africa really learn from Korea?". Afrol News. 24 November 2008. Besoek op 29 Mei 2025.
  4. ↑ (en) "Korea role model for Latin America: Envoy". Koreaanse Kultuur- en Inligtingsdiens. 1 Maart 2008. Geargiveer vanaf die oorspronklike op 22 April 2009. Besoek op 22 April 2009.
  5. ↑ (en) Leea, Jinyong; LaPlacab, Peter; Rassekh, Farhad (2 September 2008). "Korean economic growth and marketing practice progress: A role model for economic growth of developing countries". Industrial Marketing Management. 37 (7): 753–757. doi:10.1016/j.indmarman.2008.09.002.
  6. ↑ (en) Derek Gregory; Ron Johnston; Geraldine Pratt; Michael J. Watts; Sarah Whatmore, reds. (2009). "Asian Miracle/tigers". The Dictionary of Human Geography (5de uitg.). Malden, Massachusetts: Blackwell. p. 38. ISBN 978-1-4051-3287-9.
  7. ↑ (en) Rodrik, Dani (1 April 1997). "The 'paradoxes' of the successful state". European Economic Review. 41 (3–5): 411–442. doi:10.1016/S0014-2921(97)00012-3. ISSN 0014-2921.
  8. ↑ (en) Chang, Ha-Joon (2006). The East Asian Development Experience. Zed Books. ISBN 978-1-84277-141-9. Geargiveer vanaf die oorspronklike op 11 April 2023. Besoek op 11 April 2023.
  9. ↑ (en) "World Economic Outlook Database – Changes to the Database". Internasionale Monetêre Fonds. April 2025. Besoek op 30 Mei 2025.
  10. ↑ (en) "Human Development Index (HDI)". United Nations Development Programme. Besoek op 30 Mei 2025.
  11. ↑ (en) "World Bank Country and Lending Groups". Wêreldbank. Besoek op 30 Mei 2025.
  12. ↑ (en) "Global Study on Homicide 2019 (Vienna, 2019), Homicide trends, patterns and criminal justice response / Booklet 2" (PDF). Verenigde Nasies se Kantoor vir Dwelms en Kriminaliteit. 2019. p. 40. Besoek op 30 Mei 2025.
Ontsluit van "https://af.wikipedia.org/w/index.php?title=Vier_Asiatiese_Tiere&oldid=2776643"