Gaan na inhoud

Virginia Tech-skietery

in Wikipedia, die vrye ensiklopedie
Virginia Tech-skietery
'n Nagwaak ná die skietery op 17 April 2007 op die Virginia Tech-kampus.
'n Nagwaak ná die skietery op 17 April 2007 op die Virginia Tech-kampus.
Plek Blacksburg, Virginië, VSA
Teiken Studente en personeel by Virginia Tech
Datum 16 April 2007 (2007-04-16)
Soort Massaskietery, selfmoord
Gesterf 33, insluitende die aanvaller
Beseer 23, insluitende 6 wat uit vensters gespring het[1]:92[2]
Aanvaller(s)
Naam/name Seung-Hui Cho
Wapens Twee pistole
Motief Onseker; moontlik mensehaat of wraak vir 'n boeliery

Die Virginia Tech-skietery was twee massaskietaanvalle op 16 April 2007 op die kampus van die Virginia Polytechnic Institute and State University (Virginia Tech) in Blacksburg, Virginië, VSA. Seung-Hui Cho, 'n voorgraadse student aan die universiteit, het 32 mense met twee halfoutomatiese pistole doodgeskiet en 17 ander gewond voordat hy selfmoord gepleeg het. Nog ses is beseer nadat hulle uit vensters gespring het om van Cho weg te kom.

Die eerste skietery was by die West Ambler Johnston Hall, 'n koshuis waar twee mense doodgeskiet is. Die hoofaanval was by Norris Hall, 'n lesinglokaal waar Cho die hoofingang toegeketting en by vier lokale en 'n trap ingeskiet het, waar nog 30 mense doodgeskiet is. Toe die polisie Norris Hall bestorm, het Cho homself in die kop geskiet. Dit was vir nege jaar die grootste massaskietery in die moderne Amerikaanse geskiedenis, tot met die Pulse-nagklubskietery. Dit is steeds die ergste skietery by 'n onderwysinstelling in die Amerikaanse geskiedenis en die grootste massaskietery in Virginië.

Die aanvalle is internasionaal in die media gedek en het groot kritiek van die Amerikaanse vuurwapenkultuur ontlok.[3] Dit het 'n debat ontketen oor wapengeweld, wapenwette, tekortkomings in die Amerikaanse stelsel vir die behandeling van geestesgesondheidskwessies, Cho se gemoedstoestand, privaatheidswette en ander sake.

Skieter

[wysig | wysig bron]

Die aanvaller is geïdentifiseer as die 23-jarige Seung-Hui Cho, 'n senior aan Virginia Tech. Hy was 'n Suid-Koreaanse burger met permanente Amerikaanse verblyfreg en sy hoofvak was Engels.

Op driejarige ouderdom is Cho beskryf as tenger, skaam en teë op fisieke kontak.[4] In graad agt is hy gediagnoseer met erge depressie en selektiewe mutisme, 'n angstoestand wat hom gekeer het om in sekere situasies en/of met sekere mense te praat. Daar was ook bewerings dat hy outisties is,[5][6] dat hy op skool oor sy spraakprobleme geboelie is en dat hy op hoërskool meedoënloos geboelie is vir klas-, lengte- en rasverwante kwessies, maar dit kon nie bevestig word nie.

In die hoërskool het hy terapie en spesiale onderwyssteun ontvang. Ná skool het hy by Virginia Tech ingeskryf. Weens federale privaatheidswette was die universiteit onbewus van Cho se vorige diagnoses. In 2005 is Cho daarvan aangekla dat hy twee vrouestudente bekruip het. Ná 'n ondersoek het 'n regter Cho geestesiek verklaar en hom gelas om as buitepasiënt behandeling te kry. Omdat hy nie in 'n inrigting opgeneem is nie, is hy toegelaat om vuurwapens te koop. Die skietery het gelei tot die aanvaarding van die eerste groot federale wapenbeheermaatreël in Amerika sedert 1994.

Van Cho se junior jaar af is verskeie voorvalle van afwykende gedrag aangeteken wat die agteruitgang van sy geestestoestand illustreer. Cho se geestestoestand tydens die skietery is 'n saak van spekulasie.

Ná die moorde het die polisie 'n selfmoordnota in Cho se koshuiskamer gekry wat opmerkings insluit oor "ryk kinders", "losbandigheid" en "vals charlatans". Op 18 April 2007 het NBC News 'n pakkie gekry wat Cho versend het, met 'n manifes van 1 800 woorde, foto's en 27 video's waarin hy hom met Jesus Christus vergelyk en sê hy haat rykes. Hy verwys na die Bloedbad by die Columbine-hoërskool se aanvallers, Eric Harris en Dylan Klebold, as "martelaars".[7]

Verwysings

[wysig | wysig bron]
  1. ↑ Massengill Report, Chapter VIII, "Mass Murder at Norris Hall".
  2. ↑ "The Warning Signs that Could Have Prevented the Virginia Tech Shootings". School Violence: Weapons, Crime & Bullying. nscc1.org. Geargiveer vanaf die oorspronklike op 14 Oktober 2013. Besoek op 13 Desember 2012.
  3. ↑ Perry, Michael (17 April 2007). "Massacre sparks foreign criticism of U.S. gun culture". reuters.com. Geargiveer vanaf die oorspronklike op 10 Maart 2014.
  4. ↑ Smith, Vicki (30 Augustus 2007). "Cho's problems date to early childhood". Associated Press. Geargiveer vanaf die oorspronklike op 22 April 2008.
  5. ↑ "A Family's Shame in Korea". Time. 22 April 2007. Geargiveer vanaf die oorspronklike op 24 Augustus 2013. Besoek op 16 September 2008.
  6. ↑ "Son of a Bitch: Exclusive: Granddad's anger at uni murderer". Daily Mirror. 20 April 2007. Geargiveer vanaf die oorspronklike op 27 April 2007. Besoek op 21 Mei 2014.
  7. ↑ Johnson, Alex (19 April 2007). "Gunman sent package to NBC News". Massacre at Virginia Tech. NBC News. Geargiveer vanaf die oorspronklike op 10 Februarie 2013. Besoek op 16 September 2008.

Skakels

[wysig | wysig bron]
Ontsluit van "https://af.wikipedia.org/w/index.php?title=Virginia_Tech-skietery&oldid=2775680"