Vladimir Petroff Steyn

in Wikipedia, die vrye ensiklopedie
Jump to navigation Jump to search

Vladimir Petroff Steyn, voormalige Sekretaris van Verdediging en voorsitter van Satoer,[1] is op 14 April 1913 in Richmond, Kaapprovinsie, gebore. Hy was die vierde kind van William Herbert (Willie) Steyn en Aletta Johanna (geb. Van Zyl) Steyn.

Hy is in 1941 getroud met Augusta Millicent Clark. Uit die huwelik is drie kinders gebore: Petrovna Millicent (geb. 24 Desember 1943), Helga (geb. 19 Augustus 1947 en Vladimir Van Zyl (geb. 27 September 1951). Nadat V.P. (soos hy ook genoem is) Steyn in Calvinia gematrikuleer het, het hy aan die Universiteit van Stellenbosch gegradueer, waar sy broer, Izak Van Zyl Steyn, professor in regte was. Hy het ’n loopbaan in die staatsdiens in die departement volkswelsyn begin. V.P. Steyn het bekend geword toe hy as sekretaris van die departement verdediging kontrakte onderteken het vir die aankoop van militêre vliegtuie, waaronder Mirage vegvliegtuie en Alouette helikopters. Hierdie pos is afgeskaf nadat hy gevalle van korrupsie binne staatsdiens- en regeringskringe bekendgemaak het. Hy is daarna aangestel as sekretaris van toerisme en voorsitter van Satoer.

Vladimir Steyn se uitsonderlike voorname is te danke aan die waaghalsige ontsnapping van sy pa tydens die Anglo-Boereoorlog. Willie Steyn en vier makkers het in die hawe van Ceylon van ’n Britse skip ontsnap en op ’n Russiese vlootskip skuiling gevind. Hy het later sy jongste seun genoem na die Russiese offisier wat hom uit die see gered het. Hierdie verhaal is in drie boeke beskryf: Terug na kommando, Die vyf swemmers (Johan Barnard) en Die groot Boere-ontsnapping.

Vladimir Steyn was ’n bekende grootwildjagter en kenner van vuurwapens. Hy is in November 1991 oorlede en in Franschhoek begrawe.[2]

Verwysings[wysig | wysig bron]