Gaan na inhoud

Vlag van Litaue

in Wikipedia, die vrye ensiklopedie
Vlag van Litaue
Vlag van Litaue
Vlag van Litaue
Bynaam (lt) Lietuvos vėliava
Gebruik Nasionale vlag en Burgerlike vaandel Nasionale vlag en burgerlike vaandel
Verhouding 3:5
Goedgekeur 25 April 1918 (vir die eerste keer amptelik in gebruik geneem)
18 November 1988 (tweede keer in die verhouding 1:2)[1]
8 Julie 2004 (huidige weergawe)
Ontwerp ’n Horisontale driekleur in geel, groen en rooi.
Ontwerp deur Jonas Basanavičius
Tadas Daugirdas
Antanas Žmuidzinavičius
Wisselvormvlag van Litaue
Wisselvormvlag van Litaue
Gebruik Staatsvlag Staatsvlag
Verhouding 3:5
Goedgekeur 2004, eerste gedokumenteerde gebruik in 1410
Ontwerp ’n Rooi veld met die Vytis in die middel.

Die nasionale vlag van Litaue (Litaus: Lietuvos vėliava) is op 18 November 1988 amptelik in gebruik geneem. Die vlag vertoon ’n horisontale driekleur in geel, groen en rooi.

Dit is op 25 April 1918 vir die eerste keer amptelik in gebruik geneem tydens Litaue se eerste tydperk van onafhanklikheid (1918–1940) wat beëindig is eers met die besetting deur die Sowjetunie en daarna deur Nazi-Duitsland (1941–1944). Tydens die naoorlogse, tweede Sowjetse besetting van 1945 tot 1988 is die vlag van die Litause Sosialistiese Sowjetrepubliek gebruik bestaande uit ’n generiese rooi Sowjetse vlag met die naam van die republiek op wat in 1953 verander is in die rooi vlag met wit en groen bane onder.

Daarna is die Litause vlag op 18 November 1988 amptelik weer in gebruik geneem, sowat een en ’n half jaar voordat Litaue sy onafhanklikheid herwin het en byna drie jaar voor die Ontbinding van die Sowjetunie. In 2004 is die laaste verandering aan die vlag aangebring, toe die verhouding verander is van 1:2 tot 3:5.

Geskiedenis

[wysig | wysig bron]

Historiese staatsvlag

[wysig | wysig bron]

Die vroegste bekende vlae met ’n Litause identiteit is gedokumenteer in die 15de-eeuse Banderia Prutenorum geskryf deur Jan Długosz. Tydens die Slag van Tannenberg in 1410 was twee verskillende vlae teenwoordig. Die meeste van die 40 regimente het ’n rooi vaandel met ’n berede, agtervolgende ridder op gedra. Dié vlag, Vytis genoem, het uiteindelik die Litause oorlogsvlag geword en in 2004 weer die staatsvlag. Die ander regimente het ’n rooi vaandel met die pilare van Gediminas gedra. Diegene met die Vytis was deel van die Groothertogdom Litaue se leër, terwyl dié met die pilare van Gediminas Litause adellikes was. Tot aan die einde van die 18de eeu, toe dit deur die Russiese Ryk geannekseer is, het die Groothertogdom Litaue die Vytis as sy vlag gebruik.[2]

Ontwerp van die huidige vlag

[wysig | wysig bron]
Die Vilnius-konferensie in 1917 met die Vytis
Die Litause driekleur by die Kultuurkongres in Kaunas, 1927

Die oorsprong van die geel-groen-rooi-driekleur val in ’n tydperk waar ander Europese republieke hul vlae verander het. Een voorbeeld wat die driekleur geïnspireer het, was die vlag van Frankryk in blou, wit en rooi wat ná die Franse Rewolusie in 1789 aangeneem is. Die enigste driekleur wat voorheen in Litaue gebruik is, was die groen, wit en rooi van Klein-Litaue.[2]

Dit is nie bekend deur wie die kleure geel, groen en rooi voorgestel is nie, maar dié idee word gewoonlik toegeskryf aan Litauers wat in die 19de eeu in ballingskap êrens in Europa of in die Verenigde State gebly het. Hierdie drie kleure kan dikwels in volksweefskuns en die tradisionele kleredrag gevind word.[3] Tydens die Groot Seimas van Vilnius in 1905 is hierdie vlag bo die Vytis as die vlag van die Litause nasie gekies. Die Vytis, waarvan Jonas Basanavičius ’n sterk voorstander was, is om drie redes nie gekies nie: die eerste was dat die Seimas as deel van die strewe na nasionale identiteit afstand wou doen van die Groothertogdom Litaue se vlag omdat dit ook afsonderlike lande soos Belarus en Oekraïne ingesluit het. Die tweede rede was die gebruik van die rooi kleur deur rewolusionêres wat hulleself vereenselwig het met Marxistiese of Kommunisme. En laastens was die vlag Vytis te ingewikkeld om maklik herkenbaar te wees.[4]

Tydens die Vilnius-konferensie in 1917 het die vlagdebat weer opgekom. Die twee kleure groen en rooi is gekies weens hul voorkoms in die volkskuns. Die kunstenaar Antanas Žmuidzinavičius het die konferensiesaal met klein rooi en groen vlaggies versier. Die afgevaardigdes het egter nie van die ontwerp gehou nie aangesien dit te donker en mistroostig was.[4] Toe het Tadas Daugirdas voorgestel om ’n smal geel baan by te voeg (om die son te verteenwoordig) tussen die rooi (wolke wat deur die oggendson verlig word) en groen (velde en woude).[5] Die afgevaardigdes het egter daarop besluit om dié saak aan ’n spesiale kommissie te oorhandig, bestaande uit Basanavičius, Žmuidzinavičius en Daugirdas. Op 19 April 1918 het hulle hul finale protokol aan die Raad van Litaue voorgelê. Die voorgestelde vlag was ’n driekleur (bo geel, groen in die middel en onder rooi) met die Vytis in die skildhoek of in die middel.[4] Die raad het die voorstel aanvaar, maar die 1922-grondwet van Litaue noem nie die wapen nie. Dit het die nasionale vlag aangeneem wat vandag gebruik word. Enige van die debatte kon nie ’n historiese vlag oplewer nie.[4] Die debat oor die nasionale vlag het voortgegaan; sy teenstanders het goud as ’n onvanpaste kleur beskou, aangesien die kombinasie van geel, groen en rooi nie aan die bestaande reëls van heraldiek voldoen het nie. In die tussenoorlogse tydperk is egter geen veranderinge aan die vlag aangebring nie.

Sowjetse besetting

[wysig | wysig bron]
Die hoofartikel vir hierdie afdeling is: Litause Sosialistiese Sowjetrepubliek.

Tydens die Tweede Wêreldoorlog is Litaue beset deur die Sowjetunie (1940–1941 en 1944–1990) en Nazi-Duitsland (1941–1944). Die gebruik van die nasionale vlag in hierdie tydperk is verbied en vervolg. Tydens die Sowjetse besetting (1944–1988) is twee vlae gebruik: onmiddellik ná die oorlog het die vlag bestaan uit ’n rooi veld, goue hamer en sekel met die Latynse karakters LIETUVOS TSR (Litause SSR in Litaus) daarbo in ’n goue sans-serif-lettertipe.[4] Dié vlag is in 1953 vervang deur die laaste vlag wat deur die Litause Sosialistiese Sowjetrepubliek gebruik is — ’n rooi vlag met die hamer en sekel en ster in die skildhoek. Onderaan die vlag was ’n horisontale baan in wit en groen.[2] Die vlag se rooi veld was 2⁄3 van die vlag se hoogte, die wit baan 1⁄12 en die groen baan 1⁄4.[4] Sedert Litaue Sowjet-simbole in 2008 verbied het, is dit onwettig om die Litause SSR-vlag in die openbaar te hys of andersins te gebruik.[6]

Restourasie

[wysig | wysig bron]

In 1988, toe die Litause onafhanklikheidsbeweging momentum verkry het, het die Litause Opperste Sowjet weer die driekleur as die nasionale vlag erken deur artikel 168 van die Litause SSR se grondwet te wysig.[7] Die vlag is bepaal as ’n horisontale driekleur bestaande uit drie ewe bane: die boonste is geel, die middel is groen, die onderste is rooi; die vlagverhouding is 1:2 (soos dié van Sowjet-vlae). Dié vlag is bevestig deur die voorlopige grondwet op 11 Maart 1990 artikel nr. I-10.[8]

Ná onafhanklikheid van die Sowjetunie is die driekleurvlag ingeskryf in die nuwe grondwet van Litaue wat deur ’n 1992-referendum aangeneem is.[2] Dié grondwet het nie die vlagverhouding bepaal nie, waarvolgens dit tot in 2004 1:2 gebly het, toe die 1991-wet “op die nasionale vlag en ander vlae” op 8 Julie 2004 deur wet nr. IX-2331 hersien en die vlagverhouding in 3:5 verander is.[9]

Vorige vlae

[wysig | wysig bron]
  • Veldteken met die pilare van Gediminas, 1410
    Ontwerp is in verlede gebruik maar sedertdien laat vaar Veldteken met die pilare van Gediminas, 1410
  • Veldteken met die Vytis, 1410
    Ontwerp is in verlede gebruik maar sedertdien laat vaar Veldteken met die Vytis, 1410
  • Vlag van die Pools-Litause Gemenebess, 1569 tot 1795
    Ontwerp is in verlede gebruik maar sedertdien laat vaar Vlag van die Pools-Litause Gemenebess, 1569 tot 1795
  • Vlag van die Duitse Orde (1226 tot 1561) en die Verenigde Baltiese Hertogdom (1918)
    Ontwerp is in verlede gebruik maar sedertdien laat vaar Vlag van die Duitse Orde (1226 tot 1561) en die Verenigde Baltiese Hertogdom (1918)
  • Vlag van Klein-Litaue sedert 1660
    Normale of de jure weergawe van vlag, of voorkant Vlag van Klein-Litaue sedert 1660
  • Driekleur van die Huis van Romanof (Keiser van die Hele Rusland, Prins van Samogitië, 1721 tot 1917), nasionale vlag van die Russiese Ryk, 1858 tot 1896
    Ontwerp is in verlede gebruik maar sedertdien laat vaar Driekleur van die Huis van Romanof (Keiser van die Hele Rusland, Prins van Samogitië, 1721 tot 1917), nasionale vlag van die Russiese Ryk, 1858 tot 1896
  • Vlag van Litaue, 1918 tot 1940
    Ontwerp is in verlede gebruik maar sedertdien laat vaar Vlag van Litaue, 1918 tot 1940
  • Vlag van Nazi-Duitsland, 1935 tot 1945
    Ontwerp is in verlede gebruik maar sedertdien laat vaar Vlag van Nazi-Duitsland, 1935 tot 1945
  • Vlag van die Litause Sosialistiese Sowjetrepubliek, 1940 tot 1953
    Ontwerp is in verlede gebruik maar sedertdien laat vaar Vlag van die Litause Sosialistiese Sowjetrepubliek, 1940 tot 1953
  • Vlag van die Litause Sosialistiese Sowjetrepubliek, 1953 tot 1988
    Ontwerp is in verlede gebruik maar sedertdien laat vaar Vlag van die Litause Sosialistiese Sowjetrepubliek, 1953 tot 1988
  • Agterkant van die vlag van die Litause Sosialistiese Sowjetrepubliek, 1953 tot 1988
    Ontwerp is in verlede gebruik maar sedertdien laat vaar Agterkant van die vlag Agterkant van die vlag van die Litause Sosialistiese Sowjetrepubliek, 1953 tot 1988
  • 1:2 Vlag van Litaue, 1988 tot 2004
    1:2 Ontwerp is in verlede gebruik maar sedertdien laat vaar Vlag van Litaue, 1988 tot 2004

Ontwerp

[wysig | wysig bron]
Die vlag van Litaue op die Grootvorstepaleis van Litaue
’n Wapperende Litause vlag

Die Litause vlag het die volgende tegniese ontwerp:

Konstruksietekening
Konstruksietekening

Simboliek

[wysig | wysig bron]

Die Wet van die Republiek Litaue oor die Litause staatsvlag (Wet Nr. I-1497) is op 26 Junie 1991 goedgekeur en bepaal die ontwerp, grootte en gebruik van die staatsvlag. Dié wet is op 8 Julie 2004 (Wet Nr. IX-2331) gewysig en die mees noemenswaardige verandering sluit in die verandering van die nasionale vlag se verhouding van 1:2 tot 3:5 en die amptelike goedkeuring van ’n historiese vlag as die staats- (regerings-) vlag. Die wysiging het op 1 September 2004 in werking getree, nadat dit deur president Valdas Adamkus onderteken is.[10]

Die vlag se geel kleur verteenwoordig die son en voorspoed, groen die woude, landskap, vryheid en hoop, en die rooi die bloed en dapperheid van diegene wat vir Litaue gesneuwel het.[2] Die presiese kleurskakerings van beide die nasionale en staatsvlag is bepaal volgens die ooreenstemmende Pantone-stelsel, spesifiek die Pantone-tekstielpapier (TP). Die verhouding van beide die nasionale en staatsvlag moet 3:5 wees en die standaard vlaggrotte 1,0 by 1,7 meter. Verskeie grottes van die vlag mag vervaardig word, maar hulle moet aan die vereiste kleurkodes en verhouding voldoen wat in die wet bepaal word.[10] Die amptelike Pantone-kleure word sedert 2004 gepubliseer; die lys hieronder toon die amptelike kleure en hul voorgestelde ekwivalente:

Kleure

[wysig | wysig bron]

Die kleurskema word hieronder gelys:


Kleurskema 		Geel Groen Rooi[11]
Pantone[12][13] 15-0955 TP / 1235 c/u 19-6026 TP / 349 c/u 19-1664 TP / 180 c/u
RGB[13] 253, 185, 19 0, 106, 68 193, 39, 45
Webkleure[13] #FDB913 #006A44 #C1272D
CMYK[13] 0, 30, 100, 0 100, 55, 100, 0 25, 100, 100, 0

(Historiese) staatsvlag

[wysig | wysig bron]
Gehyste vlae by die Huis van die ondertekenaars op 16 Februarie 2007
Die staatsvlag (bo) en die nasionale vlag tydens EuroBasket 2011 in Litaue

In 2004 is, saam met die wet wat die wysiging van die vlagverhouding gemagtig het, ’n staatsvlag aangeneem. Dié vlag toon die nasionale wapen in ’n vaandelvorm. Die vlagverhouding is dieselfde as dié van die nasionale vlag, d.w.s. 3:5. Die staatsvlag, in die wet historiese nasionale (heraldiese) vlag genoem,[14] is voorgestel deur Česlovas Juršėnas, die adjunkspeaker van die Seimas, en deur Edmundas Rimša, die voorsitter van die Kommissie vir Heraldiek. Hierdie vlag is ook gelyktydig met die groot wapen voorgestel; albei is bedoel om die 750ste herdenking van Mindaugas se kroning in 1253 te herdenk (dié herdenking was in 2003). Tydens die strewe na nasionale onafhanklikheid was dit een van die min vlae wat beskou is om die nasionale vlag te word. Verskeie ander lande, waaronder Finland, Spanje, Venezuela, Duitsland en Thailand, het ’n amptelike nasionale vlag vir burgerlike gebruik en ’n staatsvlag vir regeringsgebruik.

In 2008 is die projek vir die opstel van die staatsvlag deur die Kommissie van Heraldiek begin en dit het in 2010 sy werk voltooi. Die ontwerper van die (historiese) staatsvlag is Arvydas Každailis wat ook die wapen ontwerp het.[15] Op 17 Junie 2010 is hierdie staasvlagvoorstel aangeneem.[16][17]

Kragtens die nasionale vlagwet word die staatsvlag permanent op drie plekke gehys: die Grootvorstepaleis van Litaue, die Trakai-kasteel en die Vytautas-Magnus-militêre museum.[18] Daarbenewens word die staatsvlag op sekere dae by die volgende plekke gehys:[15][18]

  • 16 Februarie – by die Huis van die ondertekenaars in Pilies-straat in Vilnius
  • 11 Maart – by die Seimas-paleis in Vilnius
  • 6 Julie – by die Presidentspaleis in Vilnius
  • 15 Julie – by die Departement van Verdediging
  • 25 Oktober – by die Seimas-paleis, die Presidentspaleis en die Litause Regeringsgebou in Gediminaslaan

Vlagprotokol

[wysig | wysig bron]
Vertikale vertoning van die Litause vlag

Die vlag mag vertikaal of horisontaal gehys word op openbare geboue, privaat huise, maatskappye, skepe, stadspleine of tydens amptelike seremonies. Wanneer die vlag horisontaal gehys word, moet die geel baan bo wees; wanneer die vlag vertikaal gehys word, moet die geel baan links wees en die rooi baan regs. Terwyl die vlag van sonop tot sononder gehys moet word, moet regeringsgeboue in Litaue en oorsee die vlag 24 uur laat wapper. Die vlae moet aan die wetlike standaarde voldoen en mag geensins vuil of beskadig wees nie.[10]

Vir roudienste kan die vlag op een van die volgende maniere gehys word. Die eerste metode is om die vlag halfstok te hys, waarby die vlag kort tot volle hoogte gehys en daarna tot een derde van die vlagpaal laat saak word. Die ander metode is om ’n swart lint by ’n vlag aan te heg wat permanent aan ’n vlagpaal vasgebind is. Die lint is tien sentimeter in lengte en dit word aan die vlagpaal vasgebind sodat die einde van die lint aan die einde van die vlag raak. Tydens ’n begrafnisdiens mag die vlag gebruik word om die doodskis van regeringsamptenare, soldate, ondertekenaars van die Wet van die Herinstelling van die Staat Litaue en persone wat deur die president aangewys word te bedek; hierdie vlae word later gevou en voor die begrafnis aan die naasbestaandes oorhandig.[10]

Wanneer die Litause vlag saam met ander vlae gehys word, is die korrekte rangorde soos volg: die nasionale vlag van Litaue, die (historiese) staatsvlag, vlae van ander lande, die vlag van Europa, internasionale nieregeringsorganisasies, die presidentsvlag, militêre en regeringsvlae, provinsievlae, stadsvlae en enige ander. Wanner buitelandse vlae saam met die Litause vlag gebruik word, word die vlae gesorteer volgens die landsname in Litaus. Die enigste uitsondering is wanneer die kongres of die byeenkoms in Litaue daarop besluit om vir die rangskikking ’n ander taal te gebruik. Die vlag van Europa word gehys sedert Litaue se toetreding tot die Europese Unie. Hoewel die nie eksplisiet in die wet genoem word nie, mag die vlag van die NAVO ook in Litaue gehys word aangesien dit ook ’n lidland van dié organisasie is. Dit is ook algemene gebruik om by sekere geleenthede die vlae van Estland en Letland te hys, veral tydens onafhanklikheidsvierings van die drie Baltiese lande. Die “wet van die Republiek Litaue op die nasionale vlag en ander vlae” bepaal die reëls, gebruik, protokol en vervaardiging van die nasionale en ander vlae wat in die land gebruik word.[10]

Nasionale vlagdae

[wysig | wysig bron]

As deel van die vlagprotokol word die daaglikse vertoon van die Litause vlag aangemoedig, maar dit word sterk aangemoedig of wetlik vereis op die volgende dae:[10][19]

Datum Naam Opmerkings
1 Januarie Vlagdag Herdenk die dag in 1919 toe die nasionale vlag vir die eerste keer op die Gediminas-toring gehys is
13 Januarie Vryheidsverdedigersdag Herdenk die Januarie-gebeurtenisse in 1991
16 Februarie Dag van die Heroprigting van die Staat Litaue (van die Russiese Ryk in 1918) Gehys saam met die Estlandse en Letlandse vlae
24 Februarie Estlandse onafhanklikheidsdag Gehys saam met die Estlandse en Letlandse vlae
11 Maart Dag van Litaue se onafhanklikheidsherwinning (van die Sowjetunie in 1990) Gehys saam met die Estlandse en Letlandse vlae
29 Maart NAVO-dag Herdenk Litaue se aansluiting by NAVO in 2004; gehys saam met die vlag van die NAVO
1 Mei Europese Unie-dag Herdenk Litaue se aansluiting by die Europese Unie in 2004; gehys saam met die vlag van Europa
9 Mei Europadag Herdenk die 1950-stigting van die Europese Steenkool- en Staalgemeenskap deur die Schumanverklaring
15 Mei Dag van die grondwetgewende Seimas se byeenroeping Herdenk die Grondwetgewende Vergadering van Litaue
14 Junie Dag van Rou en Hoop Merk die datum van die eerste massadeportasie van Litauers na Siberië in 1941; die vlag dui rou aan
15 Junie Dag van Besetting en Volksmord Merk die begin van die Sowjetse besetting van Litaue in 1940; die vlag dui rou aan
6 Julie Staatskapsdag Herdenk die kroning van die eerste koning, Mindaugas, in 1253
15 Julie Dag van die Slag van Tannenberg Herdenk die oorwinning van die Koninkryk Pole en die Groothertogdom Litaue oor die Duitse Orde in 1410
23 Augustus Dag van die Swart Lint Herdenk die ondertekening van die Molotof-Ribbentrop-verdrag tussen die Sowjetunie en Nazi-Duitsland in 1939; die vlag dui rou aan
23 September Dag van die Volksmoord aan Litause Jode Herdenk die vernieling van die Vilnius-ghetto deur Nazi-Duitsland in 1943
25 Oktober Grondwetdag Herdenk die aanvaarding van die nasionale grondwet in 1992
18 November Uitroeping van die Republiek Litaue Gehys saam met die Estlandse en Letlandse vlae
23 November Gewapende Magte-dag Herdenk die stigting van die Litause Gewapende Magte in 1918

Afgesien van hierdie dae word die vlag tydens verkiesings by stemlokale gehys. Die nasionale regering het kragtens artikel 4, afdeling 7 van die vlagwet die bevoegdheid om die nasionale vlag te laat hys en om spesiale voorwaardes bepaal soos om rou aan te dui.[10]

Ander Litause vlae

[wysig | wysig bron]

Sedert 25 Mei 1992 gebruik Litaue ’n vlootvaandel. Dié vaandel vertoon ’n wit agtergrond met ’n blou kruis op met die nasionale vlag in die skildhoek. Die breedte van elke kruisarm is 1/10 van die vaandel se breedte en die vlagverhouding is 3:5.[20] Die vlootgeus is identies aan die historiese staatsvlag van Litaue. ’n Vlagpaalwimpel is aangeneem deur die Litause vloot vir gebruik op sy skepe.[21]

Op 26 Januarie 1993 is deur die Seimas aan die president van Litaue amptelik ’n vlag gegee en die kleure is op 18 Februarie bepaal. Die vlag toon die wapen van Litaue met ’n griffioen en ’n eenhoring in die middel op ’n rooi agtergrond.[22] Kragtens die staatswet is die agtergrondkleur pers, maar in die praktyk is die kleur donkerrooi. Die vlagverhouding is 1:1.2.[23][24]

Elke provinsie van Litaue het ’n eie vlag aangeneem wat elkeen aan ’n patroon voldoen: ’n blou reghoek met tien uitbeeldings van die Vytis-kruis (’n goue kruis van Lotaringe) wat dien as ’n fraiing vir die sentrale kenmerk van die vlag wat deur elke provinsie self gekies is. Die meeste van die sentrale ontwerpe is ontneem van elke provinsie se wapen.[25]

Vlagvoorstelle

[wysig | wysig bron]

Alhoewel alle lede van die Raad van Litaue met die vlagvoorstel saamgestem het, was sommige ontevrede met die aangenome nasionale vlag en hulle het beweer dat dit te soortgelyk was aan die nasionale vlae van Colombia en Ethiopië. Ernstige beraadslagings om die Litause vlag te verander het in 1936 begin.[26] Een van die voorste ondersteuners in die tussenoorlogse tydperk was die bekende kunstenaar Mstislav Dobuzhinsky wat van mening was dat die vlag van Litaue nie aan die heraldiese standaarde voldoen het nie. In 1938 het Dobuzhinsky beraadslaag met die Litause filosoof Vydūnas wat aan hom inligting verskaf het oor die historiese vlag van Klein-Litaue.[27] Dobuzhinsky het die president Antanas Smetona daarvan oortuig dat die vlag verander moet word. Volgens die joernalis en versamelaar Vilius Kavaliauskas was die verduideliking eenvoudig: “die kleure van die vlag moes ooreenstem met dié van die wapen. Daar was geen groen op die wapen nie. Interessant genoeg was Smetona oortuig en hy het moontlik op 8 Mei 1940 ’n vergadering gehad met die Kommissie van Heraldiek waar besluit is om die Litause vlag te verander.” Enige verdere oorwegings rakende die vlagverandering is beëindig met die besetting van Litaue deur die Sowjetunie in Junie 1940.[28]

  • (3:5) Vlootvaandel van Litaue
    (3:5) Vlootvaandel Vlootvaandel van Litaue
  • Militêre vaandel met die pilare van Gediminas
    Ander Militêre vaandel met die pilare van Gediminas
  • (5:6) Presidentsvlag
    (5:6) Presidentsvlag
  • Die hoofvoorstel om die Litause vlag te verander, 1940[29]
    Ontwerp is voorgestel in die verlede maar nooit amptelik aanvaar nie Vlag het verskillende ontwerpe aan voor- en agterkant Die hoofvoorstel om die Litause vlag te verander, 1940[29]
  • Skandinawiese kruisvoorstel vir Litaue, 2001
    Ontwerp is voorgestel in die verlede maar nooit amptelik aanvaar nie Skandinawiese kruisvoorstel vir Litaue, 2001

Galery

[wysig | wysig bron]
  • Die presidentsvlag word gehys tydens die inhuldiging van die Litause president Dalia Grybauskaitė op 12 Julie 2009
    Die presidentsvlag word gehys tydens die inhuldiging van die Litause president Dalia Grybauskaitė op 12 Julie 2009
  • Die vlag van Litaue tydens die Singende rewolusie in 1989
    Die vlag van Litaue tydens die Singende rewolusie in 1989
  • ’n AirBaltic Airbus A220-300 in die nasionale kleure van Litaue met die doopnaam “Vilnius”.
    ’n AirBaltic Airbus A220-300 in die nasionale kleure van Litaue met die doopnaam “Vilnius”.

Sien ook

[wysig | wysig bron]
Vlae en wapensportaal

Verwysings

[wysig | wysig bron]
  1. ↑ (en) "Lithuania". Flags of the World. Besoek op 10 Junie 2025.
  2. ↑ 2,0 2,1 2,2 2,3 2,4 (lt) "History of the National Flag". Seimas. Geargiveer vanaf die oorspronklike op 10 Junie 2020. Besoek op 10 Junie 2020.
  3. ↑ (en) Zdanavičiūtė, Ingrida; Milašius, Vytautas; Katunskis, Jurgis (April–Junie 2006). "The Peculiarities of the Ornamentation of Lithuanian Traditional Woven Textiles" (PDF). Fibres & Textiles in Eastern Europe. 14 (2): 37–40. Geargiveer (PDF) vanaf die oorspronklike op 31 Julie 2020. Besoek op 31 Julie 2020.
  4. ↑ 4,0 4,1 4,2 4,3 4,4 4,5 (en) Rimša, Edmundas (2005). Heraldry: Past to Present. Vilnius: Versus aureus. pp. 82–87. ISBN 9955-601-73-6.
  5. ↑ (de) Volker Preuß. "Flagge Litauens". Flaggenlexikon. Besoek op 10 Junie 2025.
  6. ↑ (lt) "524 straipsnis. Nacistinių, komunistinių simbolių, totalitarinių ar autoritarinių režimų simbolių platinimas ar demonstravimas". Kode van Administratiewe Misdrywe van die Republiek Litaue. 21 April 2022. Besoek op 10 Junie 2025.
  7. ↑ (lt) "18 November 1988 Law of the Lithuanian Soviet Socialist Republic № XI-2660 "On amendments to the articles 168 and 169 of the Constitution of the Lithuanian SSR". Geargiveer vanaf die oorspronklike op 1 Augustus 2013. Besoek op 1 Augustus 2013.
  8. ↑ (lt) Vytautas Landsbergis (11 Maart 1990). "The Provisional Basic Law of the Republic of Lithuania". Litlex. Geargiveer vanaf die oorspronklike op 3 Maart 2016. Besoek op 3 Maart 2016.
  9. ↑ (lt) "Lietuvos Respublikos valstybės vėliavos ir kitų vėliavų įstatymas". Seimas. 8 Julie 2004. Besoek op 10 Junie 2025.
  10. ↑ 10,0 10,1 10,2 10,3 10,4 10,5 10,6 (lt) "Suvestinių redakcijų sąrašas pagal datą". Seimas. Geargiveer vanaf die oorspronklike op 7 November 2017. Besoek op 7 November 2017.
  11. ↑ (lt) "BENDRO LIETUVOS HERALDIKOS KOMISIJOS IR LIETUVOS STANDARTIZACIJOS DEPARTAMENTO PRIE LIETUVOS RESPUBLIKOS APLINKOS MINISTERIJOS POSĖDŽIO". Litause Heraldiese Kommissie. Geargiveer vanaf die oorspronklike op 27 Mei 2020. Besoek op 27 Mei 2020.
  12. ↑ (lt) "1 Dėl Lietuvos valstybės ir Respublikos Prezidento vėliavų spalvų nustatymo". Seimas. Geargiveer vanaf die oorspronklike op 27 Mei 2020. Besoek op 27 Mei 2020.
  13. ↑ 13,0 13,1 13,2 13,3 (lt) "Lietuvos Respublikos valstybinės vėliavos ir herbo vektorizuoti etalonai" (PDF). Litause regering. Besoek op 10 Junie 2025.
  14. ↑ (lt) Artikel 2(2) Wet Nr. I-1497, soos gewysig
  15. ↑ 15,0 15,1 (lt) "Symbols – Historic flag". Seimas. Geargiveer vanaf die oorspronklike op 31 Mei 2019. Besoek op 31 Mei 2019.
  16. ↑ (lt) "Seimas patvirtino Lietuvos valstybės istorinės vėliavos projektą ir etaloną". DELFI. 17 Junie 2010. Geargiveer vanaf die oorspronklike op 20 Oktober 2021. Besoek op 20 Oktober 2021.
  17. ↑ (lt) "Seimas patvirtino Lietuvos valstybės istorinės vėliavos projektą ir etaloną". Seimas. 17 Junie 2010. Besoek op 7 Oktober 2022.
  18. ↑ 18,0 18,1 (lt) "Historical national (armorial) flag of Lithuania". Seimas. Geargiveer vanaf die oorspronklike op 9 Julie 2021. Besoek op 9 Julie 2021.
  19. ↑ (lt) "Flag Days of Lithuania". Seimas. Geargiveer vanaf die oorspronklike op 20 Desember 2012. Besoek op 20 Desember 2012.
  20. ↑ (lt) "Lietuvos heraldikos komisijos 2024 m. veiklos ataskaita" (PDF). Litause Kommissie van Heraldiek. Besoek op 29 Maart 2025.
  21. ↑ (en) "Lithuania – Naval Flags". Flags of the World. Besoek op 10 Junie 2025.
  22. ↑ (lt) Artikel 7(3), Wet I-56, soos gewysig
  23. ↑ (lt) "Law on the Office of President – No. I-56, as amended (e-tar.lt)". Geargiveer vanaf die oorspronklike op 7 November 2017. Besoek op 7 November 2017.
  24. ↑ (en) "The Flag of the President of the Republic of Lithuania". President van die Republiek Litaue. Geargiveer vanaf die oorspronklike op 28 Oktober 2021. Besoek op 28 Oktober 2021.
  25. ↑ (en) "Lithuania". Vexilla Mundi. Besoek op 10 Junie 2025.
  26. ↑ (lt) "Trispalvės ir herbo gimimas". Bernardinai. 14 September 2018. Besoek op 10 Junie 2025.
  27. ↑ (lt) Asta Dykovienė (19 April 2019). "Lietuvos vėliavos spalvų dilema". Kauno diena. Besoek op 10 Junie 2025.
  28. ↑ (lt) "Aistros dėl Lietuvos vėliavos spalvų". Delfi. 12 Maart 2007. Besoek op 10 Junie 2025.
  29. ↑ (lt) Juozas Žilys (16 Februarie 2019). "Valstybės vėliava, herbas ir himnas – kodėl jie tokie?". Vakarų ekspresas. Besoek op 10 Junie 2025.

Eksterne skakels

[wysig | wysig bron]


Hierdie artikel is in sy geheel of gedeeltelik vanuit die Engelse Wikipedia vertaal.
Ontsluit van "https://af.wikipedia.org/w/index.php?title=Vlag_van_Litaue&oldid=2812344"