Voorbaai

Voorbaai is ‘n nywerheidsgebied by Mosselbaai.

SAR Klas 7BS 1056 in Voorbaai, 1997

Dit lê by nagenoeg 34° 9′ suid, 22° 6′ 30″ oos, noord van Diasstrand, suid van Hartenbos en ‘n 6 km uit die middedorp van Mosselbaai.

Daar is verskeie ligte nywerhede gevestig, waarvan die melkpoeierfabriek die bekendste is. Op die terrein van die destydse Langeberg-vrugte-inmaakfabriek is nou ‘n winkelsentrum. Aan die noordekant is ‘n groot spoorwegrangeerwerf. Die brandstofopslagtenks is met ‘n ondersese pyplyn aan tenkskepe wat in in die baai vasgemeer is, verbind.

Die huurplaas Zevenfontein is in 1732 aan Gerrit Oosthuizen toegeken. In 1803 was John Murray, ‘n sakeman van Kaapstad, die plaas se eienaar. Hy open die eerste winkel langs die hoofroete na Kaapstad. Na 1846 het die poskoetse hul perde hier omgeruil. Metterjare het die plaas as Voorbaai bekend geword en die toegangspoort met die naam Voorbaai daarop staan nog langs die pad.