Wards of the City of London

in Wikipedia, die vrye ensiklopedie
Jump to navigation Jump to search
Orals in die City of London se wards is kennisborde van hout aangebring (in elke ward word ten minste een van dié borde aangetref) waarop die Alderman, die Common Councilmen (van wie een as vise-Alderman fungeer) en die ward se stadsklerk genoem word

Die Wards of the City of London is die 25 kieswyke waarin die historiese middestad van Londen, die City of London (kort City genoem), vir verkiesingsdoeleindes verdeel is. In teenstelling met ander dele van die Britse hoofstad het die City sy eie historiese stelsel van plaaslike regering bewaar en is 19de en 20ste eeuse munisipale hervormings hier nie toegepas nie. So bestaan die City of London Corporation, die munisipale regeringsliggaam van die City, uit twee raadsliggame: die Court of Aldermen, wat tans hoofsaaklik seremoniële funksies vervul, en die Court of Common Council as hoof besturende liggaam.

Die wards in die City of London het hul oorsprong in 'n middeleeuse regeringstelsel waarbinne baie klein buurte as selfregerende eenhede binne Londen kon bestaan.[1] Hulle dien as kiesafdelings en politieke onderafdelings en is permanente seremoniële, geografiese en administratiewe entiteite binne die City of London. Hul grense is in 2003 en nog eens in 2013 nuut getrek, alhoewel die aantal wards ewemin verander is soos hul oorspronklike name.

Verwysings[wysig | wysig bron]

  1. M.I.C. Borer: The City of London - a history. New York: D. McKay Co. 1978, bl. 112