Wat Phnom

	Wat Phnom
Plaaslike naam	វត្តភ្នំ
Land	Kambodja
Soort	Tempel
Streek	Stad Phnom Penh
	Geskiedenis
Stigter	Lady Penh
Gestig	1373

Wat Phnom (Khmer: វត្តភ្នំ; "Bergpagoda") is ’n Boeddhiste tempel (wat) in Phnom Penh, Kambodja. Dit is in 1372 gebou en rys 27 m bo die grond uit. Dit is die hoogste godsdiensstruktuur in die stad. Die pagoda het die naam Wat Preah Chedey Borapaut. Wat Phnom is in die middel van Phnom Penh geleë.

Geskiedenis[wysig | wysig bron]

Volgens legende het ’n ryk weduwee Penh (algemeen Daun Penh, of "ouma Penh", genoem in Khmer) ’n groot boom in die rivier gesien. In die boom het sy vier bronsbeelde van die Boeddha gekry. Sy het ’n klein heiligdom op ’n kunsmatige heuwel opgerig wat deur die dorpenaars gebou is om die heilige beelde te beskerm. Eindelik het dit ’n heilige terrein geword waarheen mense gekom het om te bid.

In die Jaar van die Slang 1437 het koning Ponhea Yat gelas dat die grond verder verhoog word nadat hy die nuwe koninklike paleis in die nuwe stad laat bou het. Hy het dit toe "Krong Chaktomok Mongkol", of eenvoudig bekend as Phnom Penh, genoem. Die opvallende stoepa net wes van die heiligdom bevat die as van die koning en sy familie.

Wat Phnom is die middelpunt van die viering van die Kambodjaanse Nuwejaar en Pchum Ben.

Argitektuur[wysig | wysig bron]

Die heiligdom self is in die 19de eeu verskeie kere herbou en weer in 1926. Die binnekant bevat ’n sentrale altaarkompleks met ’n groot bronsbeeld van ’n sittende Boeddha, omring deur ander beelde, blomme, kerse en voorwerpe van aanbidding. Die mure is bedek met skilderings, veral van stories oor die Boeddha se vroeëre reïnkarnasies voor sy verligting. Die nuwer muurskilderings is ’n kombinasie van tradisioneel en modern.

In die suidwestelike hoek van die tempel en stoepa is ’n klein heiligdom wat aan lady Penh opgedra is. Gelowiges bring hul gebede en kosofferandes na die vrou wat beskou word as die stigter van die tempel.