Zeitz Museum van Kontemporêre Kuns Afrika

in Wikipedia, die vrye ensiklopedie
Jump to navigation Jump to search
Gevestig 2017
Ligging V&A Waterfront, Silo-distrik, South Arm-weg, Waterfront, Kaapstad, 8002, Suid-Afrika
Koordinate 33°54′30″S 18°25′23″O
Tipe Kunsmuseum, Ontwerp/tekstielmuseum, Historiese perseel
Stigters V&A Waterfront en Jochen Zeitz
Webtuiste www.zeitzmocaa.museum
Zeitz MOCAA gedurende die eerste stappe van die omskepping van die gebou.

Die Zeitz Museum van Kontemporêre Kuns Afrika (Zeitz MOCAA) is 'n kontemporêre kunsmuseum geleë by die V&A Waterfront in Kaapstad, Suid Afrika. Dit is die grootste museum van kontemporêre Afrikakuns in die wêreld.[1]

Die museum is op 22 September 2017 geopen.[2]

Ontstaan en ontwikkeling[wysig | wysig bron]

Die openbare nie-winsgewende museum is in gebruik geneem te danke aan 'n openbare/privaatvennootskap tussen die V&A Waterfront en die Duitse sakeman, Jochen Zeitz.[3] Die Waterfront het meer as R500 miljoen belê vir die bou en infrastruktuurontwikkeling. Zeitz besit nie 'n aandeel in die museum nie, maar leen sy uitgebreide kunsversameling uit aan die museum vir sy leeftyd. Zeitz se versameling word deur baie beskou as een van die wêreld se voorste versamelings van kontemporêre kuns uit Afrika en Afrikadiaspora. Zeitz se versameling bevat werke van vooraanstaande kunstenaars soos Chris Ofili, Kudzanai Chiurai, Kehinde Wiley, Glenn Ligon, Marlene Dumas, Wangechi Mutu en Julie Mehretu.

Die Waterfront het 'n aantal voorstelle ondersoek oor wat om met die historiese graansilo te doen nadat dit in 2001 buite werking gestel is. [3] Volgens hul uitvoerende hoof, David Green, sou die besluit om die gebou vir die nuwe museum te transformeer en op te knap "lewe in die Silo-distrik inasem en as 'n trekkrag dien vir 'n onderneming wat niekommersieël van aard is... spesifiek vir die genot van al die burgers van die kontinent". [4] Ander het weer opgemerk dat die strategiese vennootskap met Zeitz ook dien om die bestaande eiendomme van die Waterfront-eienaars (Growthpoint Properties en die Pensioenfonds vir Staatsamptenare) met die ontwikkelende finansiële distrik in die onderste sakekern van Kaapstad te verbind. Die omskepping van die Silo-gebou het in 2014 onder leiding van die Londense ontwerper, Thomas Heatherwick begin. William Kentridge het in 2020 sy apartheid-era werk in die museum uitgestal.[5]

Ligging en argitektuur[wysig | wysig bron]

Die museum is geleë in die V&A Waterfront, aan die oewer van Tafelbaai, met 'n uitsig oor die Atlantiese Oseaan . Die Waterfront word as 'n gesogte kleinhandel- en gasvryheidseiendom beskou en ontvang reeds ongeveer 24 miljoen besoekers per jaar.[4] Daar word ook tans beplan om die onmiddelike area rondom die museum, die Silo-distrik, verder te ontwikkel.

Die museumgebou het ontstaan uit die omskepping van die 57 m hoë historiese Graansilo, wat oorspronklik in 1921 gebou is en in 2001 uit gebruik gestel is.[3] Die argitekte, Heatherwick Studio, het gemik om die industriële erfenis van die oorspronklike struktuur te bewaar en te vier, maar terselfdertyd die struktuur oop te maak en te vernuwe. Die Graansilo het oorspronklik bestaan uit 42 diggepakte betonsilinders. Om die spasie meer effektief te benut, was dit noodsaaklik om van die mure weg te sny.[6] Met behulp van 'n verskeidenheid betonsnytegnieke is die binnekant van die gebou uitgekap om 'n aantal galerye asook 'n groot sentrale atrium te skep. Meningsverskille tussen die argitekte en hoofkurator Mark Coetzee oor die aantal galerye wat die museum moes bevat, het gelei tot wat die Suid-Afrikaanse kunskritikus Sean O'Toole beskryf het as "potsierige galerye met lae plafonne wat dikwels sukkel om die ambisie van die uitstallende kunstenaars te hou of te weerspieël". [7] Die oorblywende betonskagte is met versterkte glas bedek om natuurlike lig binne te laat en 'n "katedraalagtige" binneruimte te skep. Aan die buitekant was die opvallendste verandering aan die oorspronklike struktuur die toevoeging van kussingglaspanele in die boonste verdiepings van die gebou.

In geheel bestaan die kompleks van 9 500 m² uit nege verdiepings met 'n 6 000 m² toegewyde wit kubus uitstalruimte. Verder is daar 18 opvoedingsareas op een verdieping, 'n beeldetuin op die laer deel van die dak, sowel as 'n restaurant en winkel.[8] Die hoër gedeelte van die gebou word bedryf as die Silo Hotel, wat sy deure in Maart 2017 geopen het.[9]

Die gebou is op die Royal Institute of British Architects (RIBA) se internasionale lys van 2018.[10]

Bestuur[wysig | wysig bron]

Zeitz MOCAA is 'n geregistreerde openbare welsynsorganisasie.

Die stigter, uitvoerende direkteur en hoofkurator van die museum was Mark Coetzee.[11] Coetzee het in Mei 2018 uit die pos bedank ná 'n ondersoek rakende sy professionele optrede. [12][7]

Vanaf 2018 sluit die raad van trustees Zeitz, Jody Allen, Roger Ross Williams en Albie Sachs, sowel as kunstenaarslede Isaac Julien en Wangechi Mutu in.[13]

In Maart 2019 is daar aangekondig dat die onafhanklike kurator Koyo Kouoh die volgende uitvoerende direkteur en hoofkurator van Zeitz MOCAA sal wees.[14]

Verwysings[wysig | wysig bron]

  1. "How Jochen Zeitz Creates the World's Largest Museum of Contemporary African Art". Larry's List. Besoek op 12 Augustus 2017.
  2. "A Closer Look at Africa's First Contemporary Art Museum". Hyperallergic (in Engels). 2017-09-22. Besoek op 2017-09-22.
  3. 3,0 3,1 3,2 Sean, O'Tool. "Africa to get its own mega-museum". ContemporaryAnd. Besoek op 12 Augustus 2017.
  4. 4,0 4,1 "V&A Waterfront Partners With Jochen Zeitz To Create Africa's First Major Museum Of Contemporary Art". Zetiz Foundation. Geargiveer vanaf die oorspronklike op 12 Augustus 2017. Besoek op 12 Augustus 2017.
  5. "Subscribe to read | Financial Times". www.ft.com. Besoek op 2020-05-19. Cite uses generic title (help)
  6. "Zeitz MOCAA". Heatherwick studio. Besoek op 12 August 2017.
  7. 7,0 7,1 O'Toole, Sean (18 Mei 2018). "A Change in Leadership". ContemporaryAnd. Besoek op 2018-05-18.
  8. "V&A Waterfront unveils architectural plans by Heatherwick Studio for the historic Grain Silo Complex". The V&A Waterfront. Geargiveer vanaf die oorspronklike op 12 Augustus 2017. Besoek op 12 August 2017.
  9. "Zeitz Museum Of Contemporary Art Africa (MOCAA)". The Royal Portfolio. 2017-03-22. Besoek op 12 Augustus 2017.
  10. Tembo, Theolin (8 Januarie 2018). "SA designs on world's best new buildings shortlist". www.iol.co.za.
  11. "Zeitz MOCAA Official Website". Besoek op 12 Augustus 2017.
  12. "Director of Zeitz Museum Quits Following Inquiry into Professional Conduct". Frieze (in Engels). 2018-05-21. Besoek op 2018-07-28.
  13. Raad van Trustees Zeitz MOCAA.
  14. "Koyo Kouoh Appointed Executive Director and Chief Curator of Zeitz Museum of Contemporary Art Africa". www.artforum.com (in Engels). Besoek op 2019-03-05.

Eksterne skakels[wysig | wysig bron]