Adirondackstoel
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Die Adirondackstoel is 'n Amerikaanse buitelewe-gemakstoel met breë armleunings, 'n lang skuins rugleuning en 'n sitplek wat hoër aan die voorkant is as by die aansluiting by die rugleuning.[1] Dit is vernoem na die Adirondack-gebergte in die noordooste van New York, Amerika. Die oorspronklike ontwerp het uit 'n klein aantal plat houtplanke bestaan; die agterste gedeelte van die sitplek, wat skuins na onder hel, is tegelykertyd ook die agterste pote van die stoel. Die stoel is gewild as gevolg van die basiese, rustieke ontwerp en gemak.
Die Westport-plankstoel, vernoem na Westport, New York, in die Adirondack-gebergte, waar dit in 1903 deur Thomas Lee vir sy somerhuis ontwerp is, was die voorloper van die Adirondackstoel.[2] Die Westportstoel was 'n baie eenvoudige ontwerp, en het uit net elf stukke hout bestaan.
Die Adirondackstoel word gekenmerk deur die hellende rugleuning en diep skuins sitplek. Hierdie ontwerp was reeds in die bergagtige Adirondacks bekend, en dit was moontlik om, wanneer die stoel teen 'n steil heuwel gestaan het, dit in 'n regop sitposisie te stel.[2]
Lee het die ontwerp van die stoel aan sy vriend, 'n plaaslike skrynwerker, Harry Bunnell gegee. Bunnell het dit as 'stoel', sonder enige verwysing na 'Adirondack', gepatenteer. [3] Bunnell het vir die daaropvolgende twintig jaar of langer, "Westport-stoele" van 'n inheemse hout gemaak. [4] Lee het nie omgegee dat Bunnell wins uit sy ontwerp gemaak het nie, omdat Lee reeds finansieel welvarend was en geen belangstelling in stoelvervaardiging gehad het nie.[2]
In 1938 het Irving Wolpin 'n soortgelyke ontwerp vir 'n buitelewe-stoel, met 'n geboë rug en sitplek, gepatenteer. Die woord 'Adirondack' is weereens nie genoem nie.[5]
Adirondackstoele is oor die algemeen redelik duur omdat dit van duur, skaars houtsoorte soos kiaat, seder, bloekom en ander spesiale houtsoorte gemaak word. Hierdie houtsoorte is sterk en bestand teen die son en reën; dit verweer nie maklik nie. Dit is ook bestand teen roes, muf en insekskade. Goedkoop variasies van dennehout is beskikbaar, maar dit is gewoonlik nie bestand teen langdurige blootstelling aan die elemente van die natuur nie.
Moderne weergawes van die stoele kan egter ook van ander materiale, byvoorbeeld 100% herwinde plastiek en vlekvrye staal gemaak word. As sulks is dit ook in 'n groot verskeidenheid kleure, sowel as variasies van die basiese ontwerp, beskikbaar.
Verwysings[wysig | wysig bron]
- ↑ "Adirondack chair". Merriam-Webster (in Engels). Geargiveer vanaf die oorspronklike op 1 November 2016. Besoek op 3 Oktober 2019.
- ↑ 2,0 2,1 2,2 Sauter, Sarah. "Adirondack icon: How the Westport Chair came to be". The Sun Community News (in Engels). Geargiveer vanaf die oorspronklike op 25 Januarie 2018. Besoek op 3 Oktober 2019.
- ↑ "Chair". Google Patents (in Engels). Geargiveer vanaf die oorspronklike op 1 Mei 2017. Besoek op 3 Oktober 2019.
- ↑ "The Storied History of the Adirondack Chair". Guild of Vermont Furniture Makers. Besoek op 3 Oktober 2019.
- ↑ "Design for a lawn-chair or similar". Google Patents (in Engels). Geargiveer vanaf die oorspronklike op 16 Mei 2020. Besoek op 3 Oktober 2019.