Alg

in Wikipedia, die vrye ensiklopedie
Spring na: navigasie, soek
Alge
Laurencia, 'n Rooi see-alg vanaf Hawaii
Wetenskaplike klassifikasie
Domein: Eukaryota
Koninkryk: Alge

Alge (enkelvoud alg) is 'n groep eenvoudige, tipies outotrowe organismes, met 'n groot verskeidenheid wat wissel van eensellige tot meersellige vorme. Die grootste en mees komplekse vorme is die seewiere. Hulle fotosinteer net soos plante en is eenvoudig omdat hulle nie die organe bevat wat tipies in landelike plantegroei aangetref word nie. Die prokariotiese sianobakterieë (dikwels na verwys as die blougroen alge) was tradisioneel ingesluit in die groep "alge" in ouer handboeke, maar word nie langer as sodanig deur moderne wetenskaplikes geklassifiseer nie[1][2] en hulle beperk die term alge tot eukariotiese organismes.[3] Alle ware alge het daarom 'n kern wat deur 'n membraan omsluit is en bevat chloroplaste in een of meer membrane.[1][4]

Alge vorm saam 'n parafiletiese en polifiletiese groep aangesien hulle nie almal afstam van 'n enkele algevoorsaat nie, al wil dit voorkom asof hulle chloroplaste 'n enkele oorsprong mag hê.[5]

Alge het nie die verskeidenheid strukture wat kenmerkend is van landelike plante nie, soos die filliede en risoïede in plante sonder are of die blare en ander organe wat in die trageofiete aangetref word nie. Hulle kan onderskei word van protosoë deurdat hulle kan fotosinteer. Baie is foto-outotrowe, alhoewel sommige groepe lede insluit wat miksotrofies is en hul energie verkry vanaf beide fotosintese asook die opname van organiese koolstof deur osmotrofie, misotrofie of fagotrofie. Sommige van die eensellige spesies maak uitsluitlik staat op eksterne energiebronne en het beperkte of geen fotosintetiese apparate nie.

Alle alge het fotosintetiese meganismes wat oorspronklik van sianobakterieë afkomstig is en vervaardig suurstof as 'n neweproduk van fotosintese, anders as fotosinterende bakterieë soos pers- en groenswaelbakterieë.

Verwysings[wysig]

  1. 1,0 1,1 Nabors, Murray W., 2004. Introduction to Botany. Pearson Education, Inc., San Francisco, CA.
  2. The American Heritage Dictionary of the English Language, Fourth Edition, 2000. Algae: [1].
  3. Allaby, M ed. 1992. The Concise Dictionary of Botany. Oxford University Press, Oxford
  4. Round, F.E. 1981. The Ecology of Algae. Cambridge University Press, London. ISBN 0-521-22583-3
  5. Patrick J. Keeling (2004). “Diversity and evolutionary history of plastids and their hosts”. American Journal of Botany 91: 1481–1493. DOI:10.3732/ajb.91.10.1481.