Blue Lagoon (Ysland)

in Wikipedia, die vrye ensiklopedie
Spring na: navigasie, soek

Die Blue Lagoon (Yslands: Bláa Lonið) is 'n geotermiese warmbad naby Grindavík, 'n dorp op die Yslandse skiereiland Reykjanes. Dit is naby die hoofstad Reykjavík en die internasionale lughawe in Keflavík geleë en het tot een van die gewildste toeristebestemmings in die suidweste van die land ontwikkel.

Die kunsmatige meer met 'n oppervlakte van 5 000 vierkante meter is 'n "neweproduk" van die nabygeleë geotermiese kragsentrale Svartsengi waar 'n mengsel van see- en soetwater vanuit 'n diepte van sowat 2 kilometer na die oppervlakte gepomp en vir kragopwekking ingespan word. In hierdie diepte styg die watertemperatuur tot by 240 °C. Die water vloei later in die omliggende lawaveld waar geleidelik 'n soutwatermeer met sy kenmerkende blou-wit kleur ontstaan het.

Die plaaslike bevolking het die meer aanvanklik as 'n baaiplek benut totdat die huidige warmbad-fasiliteite opgerig is. Die warmbad, wat ook in die winter baie gewild is, pomp tans ook sy eie warmwater na die oppervlakte. Blue Lagoon se warmwater het 'n temperatuur van tussen 37 en 42 °C en bevat mineraalsoute, kieselaarde en alge. Die kieselaarde reflekteer onder meer die blou strale van die sonlig en skep ook die blou kleur van die meerwater.

Die meerwater hou 'n heilsame effek vir lyers van psoriasis en ander velsiektes in. Blue Lagoon bied naas sy warmbad ook saunas, massages en stoombaddens aan. Blue Lagoon se kosmetiese produkte soos stortbadgel en sjampoe bevat onder meer soute en alge uit die warmwaterbronne en word plaaslik en via die warmbad se aanlynwinkel bemark. In 1999 is die Yslandse Prys vir Omgewingsbewaring aan Blue Lagoon toegeken.

Eksterne skakels[wysig]

Commons
Wikimedia Commons het meer media verwant aan:
Blue Lagoon (bladsy)