Chinyingi-brug
Die Chinyingi-brug is ‘n hangbrug slegs vir voetgangers oor die Zambezirivier in ‘n afgeleë deel in die noorde van Zambië.
Die brug is by 13° 21′ 11″ suid, 23° 0′ 44″ oos, 30km noordnoordwes van die dorp Zambezi en effens meer suid van die grens met Angola. Dit is die naaste brug aan die oorsprong van die rivier. Chinyingi, die dorpie en die sendingstasie, is op die westelike oewer. Langs die brug is ‘n klein pont net-net geskik vir ‘n motorvoertuig.
Na ‘n ongeluk met ‘n boot waarin ‘n pasiënt van die sendinghospitaal omgekom het, het Crispin Valeri, ‘n priester van die Kapusyner-orde van die Franciskane in die Rooms-Katolieke Kerk, in 1977 die inisiatief geneem om die voetbrug te bou. Met die hulp van ongeskoolde arbeiders het Crispin die brug met ‘n lengte van 300m uit staalpype en ander oorskietmateriaal van die nabysynde kopermyne opgerig. Ongeveer 500 mense gebruik daagliks die brug op pad na hul skole en op soek na mediese dienste.