DEFA

in Wikipedia, die vrye ensiklopedie
Spring na: navigasie, soek
Die DEFA-kenteken
Die DEFA-rolprent Nackt unter Wölfen, wat in 1962 onder regie van Frank Beyer gemaak is, is op Bruno Apitz se gelyknamige roman gegrond en behandel die anti-fascistiese verset in die konsentrasiekamp Buchenwald

Die Deutsche Film AG, kort DEFA, was die rolprentateljee van die Duitse Demokratiese Republiek. Die ateljee, wat deur die Oos-Duitse staat genasionaliseer is, het sy hoofkwartier in Potsdam-Babelsberg gehad en was sedert die 1950's ook 'n belangrike inhoudverskaffer vir die nuutgestigte DDR-televisieuitsaaidiens Deutscher Fernsehfunk (later Fernsehen der DDR).

Die DEFA het sowat 700 rolprente, 750 animasiefilms asook 2 250 dokumentêre en kortfilms vervaardig. Sowat 8 000 buitelandse rolprente is van Duitse klankbane voorsien.

Oorhoofse doel[wysig]

Volgens sy stigters sou die DEFA die nuwe bewindhebbers in Oos-Duitsland se voorneme ondersteun "om die demokrasie in Duitsland te herstel, fascistiese houdings te verander en mense tot sosialistiese burgers op te voed." Die politieke suiweringsbeleid van denazifisering in die Sowjet-besettingsone van Duitsland en in die DDR was ook daarop gemik om die rolprentbedryf en die kulturele lewe van "reaksionêre elemente en die ondemokratiese anti-humanistiese nasionaal-sosialistiese ideologie en sy voorstanders te bevry".

Die hoofonderwerp en ideale voorbeeld van die Sosialistiese Eenheidsparty van Duitsland (SED) en DEFA-rolprente was van die begin af die anti-fascisme en die sosialistiese realisme. Denkwyses en uitbeeldings van nihilisme, dekadensie, formalisme, burgerlike bekrompenheid en "burgerlike gedrag" moes deur professionele filmlui liewers vermy of gekritiseer en deur sosialistiese ideale vervang word.

So is veral rolprente vervaardig wat in die tradisie van die werkersklas gestaan het, asook anti-oorlogsrolprente wat die NS-ideologie sou ontmasker. Van DEFA-films is verwag dat hulle die sosialistiese, humanistiese en kommunistiese waardes asook die liefde vir die DDR sou weerspieël.