Privaat Skool Swakopmund
Die Privatschule Swakopmund/Private School Swakopmund (PSS) is 'n selfstandige, privaat skool op die Namibiese kusdorp Swakopmund wat onderrig bied in Duits of Engels aan leerders van graad een tot sewe en van graad agt tot twaalf in Engels, maar met Duits hetsy as moeder- of vreemde taal verpligtend.
Die PSS het ontstaan weens 'n behoefte van die Duitssprekende inwoners van die dorp om 'n skool te hê waar hulle kinders steeds in hulle moedertaal onderrig kan word ná die Namibiese regering ná onafhanklikheid in 1990 weggedoen het met alle sekondêre onderwys in tale buiten Engels. Die eertydse Deutsche Oberschule Swakopmund het byvoorbeeld die Engelstalige Namib High School geword en so 'n einde gebring aan die jare lange praktyk dat Duitssprekende leerders tot minstens in hulle negende jaar in hulle moedertaal onderrig kon word. PSS gee onderrig in Duits sowel as Engels tot die sewende skooljaar en daarna net in Engels, hoewel Duits 'n verpligte vak is, hetsy as eerste of as vreemde taal.
Die skool strewe daarna om klasse daar te stel van nie meer nie as sowat 22 leerders elk, sodat veral leerders wat intellektueel benadeel is, individuele aandag kan kry. Die skool tref ook die nodige maatreëls om leerders voor te berei op die uitdagings van die tegnologie wat die samelewing vandag kenmerk.
