Heropwekkingremme

Meganisme vir die heropwekkingremme op die dak van 'n Škoda Astratrem

Die S7/8 Stock op die London Underground kan tot 20% van sy energieverbruik aan die netwerk terugbesorg.

Heropwekkingremme is 'n energieherwinningsmeganisme wat 'n voertuig vertraag of rem, deur sy kinetiese energie om te skakel in 'n ander vorm, wat óf onmiddellik gebruik kan word of gestoor kan word totdat dit benodig word. Dit is in teenstelling met konvensionele weerstandsremme, waar die oorskot kinetiese energie direk via wrywing of indirek via elektriese weerstand in hitte omgeskakel word, en dus vermors word.

Heropwekkingremme is die herwinning van gestoorde kinetiese energie in 'n bewegende voertuig wanneer dit vertraag. Hierdie herwonne energie word teruggelewer aan die kragbron waaruit dit gevoed word.

Heropwekkingremme word hoofsaaklik toegepas by elektriese traksie (treine, trems en metro), en by hysbakke en hyswerktuie. Moderne elektriesaangedrewe voertuie en hibriedmotors gebruik ook heropwekkingremme.

Beginsel

Heropwekkingremme maak gebruik van die beginsel dat 'n elektriese motor ook as kragopwekker gebruik kan word. Deur die aandryfmotor tydens die voertuig of werktuig se remming as 'n generator in te skakel, word die kinetiese energie omskep in elektriese energie. Die opgewekte energie kan dan gestoor word vir toekomstige gebruik, soos in akutreine, of teruggevoer word aan die elektrisiteitsnetwerk. Deurdat die kragopwekker 'n bykomende belasting vorm vir die voertuig sal die spoed hiervan afneem.

Gebruike

Hierdie stelsel is veral belangrik in België, tussen die lae Vlaandere en die hoogliggende Wallonië waar andersins baie energie verlore sou gaan deur aanhoudende remming op die trajekte van suid na noord. Die elektriese toerusting is reeds deur ACEC in die sestigerjare ingespan – die eerste in Europa – en ontwikkel vir 'n klassieke motorstel in België en die tiristorwaens van die Haagse PCCcar in Nederland en die daaropvolgende Brusselse metro. Later is baie elektriese stelle, lokomotiewe en trems, soos die groot GTL8-materieelserie met heropwekkingremme toegerus.

In motorsport se Formule 1 is die stelsel in die 2009-seisoen toegepas onder die naam "Kinetic Energy Recovery System" (KERS).

Hierdie artikel is in sy geheel of gedeeltelik vanuit die Engelse Wikipedia vertaal.