Klade
'n Klade van die Griekse woord klados "jong tak van 'n boom of plant" is 'n term uit die kladistiek ('n wetenskaplike stelsel om biologiese organismes in te deel). 'n Ander naam vir 'n klade is 'monofiletiese groep'.
'n Klade is 'n skematiese voorstelling van 'n groep organismes, wat alle individue insluit wat sou afstam van 'n bepaalde gemeenskaplike evolusionêre voorvader, plus die voorvader self. 'n Klade kan op verskeie maniere gedefinieer word, afhangende van die wyse waarop die voorouer-soort aangewys word. Streng gesproke is daar 'n onderskeid tussen 'n monofiletiese groep en 'n holofiletiese groep, maar die onderskeid is in die praktyk dof.
'n Klade kan ook gesien word as 'n wetenskaplike hipotese oor die evolusionêre verhouding tussen die organismes wat in die analise teenwoordig is. Hierdie hipotese kom voort uit 'n sekere datastel van die kenmerke van die ge-analiseerde organismes. Die hipotese word getoets deur 'n volgende, verkieslik meer akkurate, datastel wat 'n geheel ander verdeling in klades ('n kladogram) kan oplewer. 'n Klade moet eintlik altyd vergesel word van 'n vermelding van die datastel waarop dit gebaseer is. Dit is nie uitsonderlik dat 'n organisme volgens een analise gebaseer op datastel 1 geklassifiseer word in klade A, terwyl 'n analise gebaseer op datastel 2 lei tot 'n indeling in klade B.
In die praktyk word dikwels verskeie analises gekombineer en slegs as 'n klade robuust is (deur opgawes in verskeie analises) word hulle as geloofwaardig beskou.
'n Klade moet onderskei word van 'n takson, die klassieke taksonomiese klassifikasie wat gebruik word vir 'n klassifikasiesisteem. Die meeste taksa wat deesdae geformuleer word, is egter in essensie identies aan 'n bepaalde klade. Daar bestaan 'n plan vir die oprig van' n amptelike instansie wat deur middel van die sogenaamde Phylo Code 'n prioriteitsregistrasie moontlik sal maak van name en definisies van klades. Die bedoeling is dat hierdie Phylo Code sal toelaat dat 'n klade op verskillende maniere gedefinieer kan word.
| Hierdie artikel is in sy geheel of gedeeltelik vanuit die Nederlandse Wikipedia vertaal. |
