Landadel

in Wikipedia, die vrye ensiklopedie
Mr and Mrs Andrews (1748–49) is 'n skildery deur die Britse kunstenaar Thomas Gainsborough wat lede van die Britse landadel uitbeeld. National Gallery, Londen

Landadel is 'n hoofsaaklik historiese sosiale klas wat, veral in die Britse konteks, uit adellike landeienaars bestaan het wat hul hele inkomste uit hul landgoede getrek het, sy dit regstreeks of deur huur- en paggelde. Hul werksaamhede was dikwels slegs administratief van aard insoverre as hulle hul eie landgoede bestuur het.

In Engeland het die landadel of landed gentry uit vier verskillende groepe bestaan:[1]

  1. Baronette, 'n erflike titel wat oorspronklik in 1611 deur koning James geskep is en aan die draer die reg verleen om as "Sir" aangespreek te word mits hy 'n ridder was.
  2. Ridders, oorspronklik slegs 'n militêre rang wat later toenemend aan burgerlikes toegeken is ter erkenning van hul dienste aan die Kroon. Draers van die titel het die reg om as "Sir" aangespreek te word.
  3. Esquires, oorspronklik mans wat aspirante vir die ridderslag was en as die hoofbediendes van 'n ridder gedien het. Ná die middeleeue het Esquire 'n eretitel geword wat deur die Kroon verleen is. Persoonlikhede wat bepaalde ampte soos dié van advokaat of vredesregter beklee het en hoër range van offisiere in die leër was gewoonlik Esquires.
  4. Gentlemen of Here het 'n hoë status beklee wat in die Statute of Additions van 1413 as afsonderlike titel erken is. Persone van hoë geboorte of rang, wat hoë aansien geniet het en welvarend genoeg was om vir hul lewensonderhoud nie op enige ekonomiese aktiwiteit aangewese te wees nie, is as gentlemen beskou.

Verwysings[wysig | wysig bron]

  1. John Canon: Gentry. In: The Oxford Companion to British History. Oxford: Oxford University Press 1997