Lucy

in Wikipedia, die vrye ensiklopedie
Spring na: navigasie, soek
Lucy
'n Beeld van die fossiel.

Algemene naam Lucy
Katalogusnommer AL 288-1
Spesie Australopithecus afarensis
Ouderdom 3,2 miljoen jaar[1]
Plek ontdek Afar-driehoek, Ethiopië
Datum ontdek 24 November 1974
Ontdek deur Donald Johanson
Maurice Taieb
Yves Coppens
Tom Gray[2]

Lucy is die gewilde naam van AL 288-1, ’n paar honderd stukke been wat omtrent 40% van die geraamte van ’n vroulike Australopithecus afarensis uitmaak. Dit is in 1974 in die Afar-driehoek in Ethiopië ontdek. In paleoantropologie word gewoonlik net fossielfragmente ontdek, en selde skedels of ribbes; dus was dit ’n groot ontdekking wat ’n enorme hoeveelheid wetenskaplike inligting verskaf het. Lucy is na raming sowat 3,2 miljoen jaar oud[1] en word geklassifiseer as ’n hominied.[3]

’n Rekonstruksie van Lucy in die Natuur-Historiese Museum in Washington, Amerika.

Die geraamte toon Lucy het ’n klein breinkapasiteit gehad, soos ape, en regop geloop, soos mense, en dit steun die teorie van sommige geleerdes dat die mens se voorouers al regop geloop het voor hul breingrootte begin toeneem het.[4]

Kritiek[wysig]

Die historikus Londa Schiebinger bevraagteken die feit dat die ontdekkers besluit het Lucy is vroulik na aanleiding van die grootte van die geraamte.[5] Hulle het ook gemeen "die bekkenopening in hominiede moet proporsioneel groter in wyfies as in mannetjies wees vir die geboorte van kinders met groter breine." Die ontdekking dat breine eers later groter geword het, weerspreek dié feit.

Daar is ook besware teen die klassifikasie van Lucy as ’n menslike voorouer. Sy het gekrulde vingers en tone gehad, wat geskik is vir boom klim, sy was korter as 1,2 meter (so groot soos moderne aapspesies) en die grootte van haar kop, kakebeen en tande stem meer ooreen met dié van ape as van uitgestorwe mensverwante spesies. ’n Ondersoek van die heupbeen deur Charles E. Oxnard het verder onthul Lucy kon waarskynlik net vir kort rukkies op twee bene loop, soos moderne aapspesies.[6] Sommige wetenskaplikes meen Lucy is eerder die een of ander uitgestorwe soort aap.

Sien ook[wysig]

Verwysings[wysig]

  1. 1,0 1,1 Mother of man - 3.2 million years ago”. BBC Home. URL besoek op 2008-10-10.
  2. Institute of Human Origins: Lucy's Story”. URL besoek op 2014-02-15.
  3. Rak, Y.; Ginzburg, A.; Geffen, E. (2007). "Gorilla-like anatomy on Australopithecus afarensis mandibles suggests Au. Afarensis link to robust australopiths". National Academy of Sciences 104 (16): 6568. doi:10.1073/pnas.0606454104
  4. Stephen Tomkins (1998). The Origins of Humankind. Cambridge University Press. ISBN 0-521-46676-8. 
  5. Schiebinger, Londa (2001). Has Feminism Changed Science?. Harvard University Press, 126-127. ISBN 978-0-674-00544-0. 
  6. Oxnard, C. (1987). Fossils, teeth and sex. Seattle: University of Washington Press.

Eksterne skakels[wysig]