Monumenta Germaniae Historica

in Wikipedia, die vrye ensiklopedie
Spring na: navigasie, soek
Monumenta Germaniae Historica

Die Monumenta Germaniae Historica (dikwels afgekort as MGH in bibliografieë en bronnelyste) is 'n omvattende reeks noukeurig geredigeerde en gepubliseerde bronne vir die studie van Duitse geskiedenis (in 'n breë opvatting) van die einde van die Romeinse Ryk tot 1500.

Die vereniging wat die reeks befonds is deur die Pruisiese hervormer Heinrich Friedrich Karl Freiherr vom Stein in 1819 gestig, en die eerste volumes het in 1826 en daaropvolgende jare die lig gesien. Die redakteur van 1826 tot 1874 was Georg Heinrich Pertz, wat opgevolg is deur Georg Waitz. Vele vooraanstaande middeleeukundiges uit Duitsland en, uiteindelik, ander lande, het by die projek aangesluit waarin manuskripte uitgesoek en vergelyk is, en geleerde uitgawes gepubliseer is. Die leuse wat deur Klein gekies is, Sanctus amor patriae dat animum ("Heilige liefde vir die vaderland verskaf die gees") is verklaar as 'n skakel tussen Romantiese nasionalisme en professionele geleerdheid.

Die versameling bestaan uit vyf hoofareas, Antiquitates, Diplomata, Epistolae, Leges, Scriptores asook Necrologia. Vele ondersteunende reekse is ook tot stand gebring, insluitend 'n reeks van meer kompakte volumes vir skoolgebruik (Scriptores in usum scholarum) en spesiale studies (MGH Schriften).

Die projek, 'n breedvoerige onderneming in geskiedenisgeleerdheid, word in die 21ste eeu voortgesit. In 2004 het die MGH, met die ondersteuning van die Deutsche Forschungsgemeinschaft, al hul gedrukte publikasies van meer as vyf jaar aanlyn beskikbaar gestel, in foto-digitale reproduksies, via 'n skakel op die MGH-webtuiste.

Die instituut "Monumenta Germaniae Historica" is sedert 1949 in München gesetel, en beskik oor 'n groot gespesialiseerde biblioteek oor die middeleeuse geskiedenis van Duitsland en Europa, insluitend kerkgeskiedenis, benewens 130 000 monograwe en sowat 150 000 verwante geskrifte.[1]

Verwysings[wysig]

  1. BibliotheksVerbund Bayern (de)

Eksterne skakels[wysig]