Msjatta-fasade

in Wikipedia, die vrye ensiklopedie
Spring na: navigasie, soek
Die Msjatta-fasade

Die Msjatta-fasade is die reliëf-versierde fasade van die Jordaanse woestynkasteel Msjatta wat teen die middel van die 8de eeu n.C. ontstaan het. Die fasade het deel uitgemaak van die paleis van Msjatta, waarvan die bouvalle sowat dertig kilometer suid van die Jordaanse hoofstad Amman geleë is. Oorblyfsels van die gebou kan nog steeds op die terrein van Amman se lughawe besigtig word.

Die paleis het oorspronklik as Oemajadiese winterkwartier gedien, en boubedrywighede het waarskynlik tydens die regentskap van kalief Al-Walid II (743-744) begin. Ná vdie moord op die kalief het die paleis onvoltooi gebly en is 'n kort tyd later deur 'n aardbewing verniel. Die benaming Msjatta is van plaaslike Bedoeïne oorgeneem aangesien die oorspronklike naam nie oorlewer is nie.

Die bouvalle van die paleis is in 1840 ontdek. Weens vrese dat waardevolle dele van die kasteel vir die bou van die Hedjas-spoorweg gebruik sou kon word, is die Osmaanse soeltan Abdülhamit II oorreed om die fasade aan die Duitse keiser Wilhelm II te skenk. Groot dele daarvan is in 1903 na die Kaiser-Friedrich-Museum (tans Bodemuseum) geneem wat destyds nog in aanbou was. In 1932 is die fasade in die Pergamonmuseum opgebou. Tydens die Tweede Wêreldoorlog is die boukunswerk ernstig beskadig.

Die Msjatta-fasade is tans naas die Aleppo-kamer een van die hooftrekpleisters in die Museum vir Islamitiese Kuns, 'n afdeling van die Pergamonmuseum te Berlyn. Die fasade is hier oor 'n lengte van 33 meter en 'n hoogte van vyf meter met twee torings heropgebou en is 'n goeie voorbeeld van vroeë Islamitiese boukuns.

Eksterne skakels[wysig]

Commons-logo.svg
Wikimedia Commons het meer media verwant aan:
Msjatta-fasade (kategorie)

Verwysings[wysig]

  • Hierdie artikel, of gedeeltes daarvan, is uit die volgende Wikipedia-artikel vertaal: Mschatta-Fassade