Nidaros-domkerk

in Wikipedia, die vrye ensiklopedie
Spring na: navigasie, soek
Die Nidaros-domkerk

Die Nidaros-domkerk (Noors: Nidarosdomen of Nidaros domkirke) in Trondheim is een van Noorweë se beduidendste sakrale geboue. Die domkerk, wat in die Romaanse en Gotiese boustyle uitgevoer is, word as 'n nasionale heiligdom beskou en het eeue lank as die land se kroningskerk gedien. Ook die Noorse Grondwet van 1814 het bepaal dat die heersers van die Koninkryk Noorweë in Trondheim bekroon moes word. Die laaste kroning van 'n Noorse monarg, wat hier in 1906 plaasgevind het, was dié van koning Haakon VII. Nadat die Noorse parlement kroningsplegtighede in 1908 afgeskaf het, is Noorse heersers hier geseën. Daarnaas is ook die Noorse kroonregalia hier bewaar. Vandag dien die Nidaros-domkerk hoofsaaklik as Evangelies-Lutherse gemeentekerk.

Gedurende die Middeleeue het die domkerk die bynaam Cor Norvegiae ("Hart van Noorweë") gekry aangesien dit die grafkerk van Sint Olav was. 'n Meer gebruiklike Noorse naam was Kristkirken i Nidaros. Ondanks sy sterk verbintenis met Sint Olav was die kerk nie aan hom gewy nie, maar aan die "Heilige Drieënigheid".