Oos-Friesland

in Wikipedia, die vrye ensiklopedie
Spring na: navigasie, soek
'n Kaart van Oos-Friesland
Oos-Friese vlag met wapen

Oos-Friesland (Duits: Ostfriesland, Oos-Friese Platduits: Oostfreesland) is 'n streek in Nedersakse in die uiterste noordweste van die Bondsrepubliek Duitsland en behels die administratiewe distrikte Aurich, Leer en Wittmund asook die selfregerende stad Eemden (Duits: Emden). Die huidige streek kom grootliks ooreen met die historiese Vorstedom Oos-Friesland wat tot in die jaar 1744 bestaan het.

Oos-Friesland is aan die Noordsee geleë en behels naas sy vastelandse gedeelte ook die Oos-Friese eilande Borkum, Lütje Hörn, Memmert, Juist, Norderney, Baltrum, Langeoog en Spiekeroog. Met 'n oppervlakte van 3 144,26 vierkante kilometer en 'n bevolking van sowat 465 000 mense is Oos-Friesland in vergelyking met ander Duitse streke yl bevolk. Kenmerkend vir die gebied is die ontbreking van 'n groot stedelike sentrum. Vyf middelgroot stede - Eemden, Aurich, Leer, Norden en Wittmund - en vyf kleiner stedelike nedersettings gee naas 'n groter aantal dorpe 'n besondere demografiese struktuur aan Oos-Friesland.

Die streek is eeue lank deur landbou, vissery en - in sy klein aantal stede - ook handel oorheers. Seehandel het 'n belangrike rol in die Oos-Friese hawestede gespeel. Die bou van seedyke en grondverbetering het die landboukundige gebruik van die uitgestrekte, moerasagtige oorgangsgebiede tussen land en see langs die kus en die binnelandse moerasgebiede moontlik gemaak. Alhoewel die landbousektor nog steeds 'n beduidende rol in Oos-Friesland speel, lewer intussen ook toerisme (veral op die eilande en in die nedersettings langs die kus) en enkele nywerheidsgebiede 'n belangrike bydrae tot die plaaslike ekonomie. Die streek gaan nogtans onder strukturele probleme gebuk. 'n Hoë werkloosheidsyfer en die afhanklikheid van 'n klein aantal ekonomiese sektore en 'n handjievol groot ondernemings is kenmerkend vir die Oos-Friese ekonomie.

Oos-Friesland is eeue lank deur die uitgestrekte moerasgebiede in sy suide van ander Duitse streke geskei en het sodoende 'n selfstandige, seewaartse ontwikkeling getoon. Die streek probeer sy karakter in kulturele en politieke opsig steeds handhaaf en is vandag een van die hoofsaaklike Nederduitse taalgebiede in Duitsland. Volgens skattings praat sowat die helfte van die bevolking nog Oos-Friese Plat- of Nederduits as huistaal.