Bevellyn

in Wikipedia, die vrye ensiklopedie
(Aangestuur vanaf Opdraglyn)
Spring na: navigasie, soek
'n DOS opdraglyn.
Die "pause" bevel word uitgevoer.

Sommige rekenaars en rekenaarprogramme bied aan gebruikers 'n opdrag- of bevellyn (Engels: Command Line) waarop bevele met behulp van 'n sleutelbord ingetik kan word vir uitvoering. Nadat die opdrag uitgevoer is, kry die gebruiker weer die kans om 'n volgende bevel op die opdraglyn in te sleutel. Die proses hou aan tot die gebruiker al die nodige take uitgevoer het, waarna die aparaat afgeskakel of die program beëindig word.

Bedryfstelsels soos DOS (command.com) en Unix (bash) maak algemeen van opdraglyne gebruik. Naas bedryfstelsels is daar ook ander programme wat met 'n bevellyn kan werk. Die FTP-kliënt en die Telnet-kliënt van Microsoft in Windows 2000 en Windows XP gebruik byvoorbeeld opdraglyne. Linux het ook talle opdraglyn-programme.

'n Opdrag of bevel word tipies met die 'Enter'-sleutel afgesluit, terwyl sommige programme vereis dat bevele met 'n punt of kommapunt afgesluit moet word. So 'n opgrag kan byvoorbeeld 'n opdrag vir die bedryfstelsel wees, of die naam van 'n program wat afgeskop moet word. Allerlei opsies kan saam met bevele gegee word om die uitvoering daarvan te beinvloed. Om agter te kom watter bevele en opsies beskikbaar is, word 'n hulp-bevel gewoonlik beskikbaar gestel. So 'n bevel is tipies: "help", "info", "man" of "?".

'n Program wat reageer op bevele is eenvoudig om te programmeer. Dit word dikwils gebruik tydens die ontwikkeling van apparate en programme, en word soms ook gebruik as elektroniese aparate gediens moet word. Programme met opgraglyne kan ook maklik geoutomatiseer word deur 'n reeks opgragte saam te groepeer in 'n skrip wat gesamentlik volgens skedule uitgevoer kan word.