Parade

'n Panoramiese foto van die ou Kaapse stadsaal en die Parade

Die Parade tussen Plein-, Buitenkant-, Darling- en Kasteelstraat in Kaapstad word as markplein, parkeerterrein en vir massabyeenkomste gebruik. Hierdie stadsplein is in 1962 tot nasionale gedenkwaardigheid verklaar.

Geskiedenis

In 1652 is 'n tydelike fort, Fort de Goede Hoop, op hierdie terrein opgerig. Na voltooiing van die Kasteel is die fort in 1624 gesloop, die terrein vir gebruik as 'n paradegrond gelyk gemaak en rondom bome aangeplant. Deur die jare heen is strate rondom die Parade gebou, verleng en verbreed asook sake-geboue, die Stadsaal, Drilsaal, Operahuis, poskantoor, die Skiereilandse Universiteit vir Tegnologie en die stasiegebou opgerig. Nou is slegs die helfte van die oorspronklike paradeterrein oop gebied.

Openbare byeenkomste

Belangrike openbare vergaderings het op die Parade plaasgevind. In 1849 was daar 'n reuse-byeenkoms van mense wat gekant was teen die Britse regering se voorneme om van die Kaap 'n strafkolonie te maak. Nelson Mandela het na sy vrylating in 1990 sy volgelinge vanaf die trappies van die Stadsaal in Darlingstraat toegespreek. En op 9 Mei 1994 na sy verkiesing tot president het hy ook die volk van Suid-Afrika vanaf die Parade toegespreek. In 2010 met die Wêreldbekersokkertoernooi was hier byeenkomste van ondersteuners wat die wedstryde op reuseskerms gevolg het.

Monumente

Op hierdie grootste plein in die middestad staan die Koning Edward VII-standbeeld en 'n monument wat die Tweede Vryheidsoorlog herdenk. Dit is regoor die Drilsaal opgerig ter ere van die Kapenaars wat aan Britse kant in die oorlog gesneuwel het. Dit toon 'n gewapende soldaat wat buig oor 'n meisie wat die moederland voorstel. Tonele uit die oorlog versier die basis. Die inskripsie lui deels: Never a king had more loyal subjects. Die beeldhouer was sir W. Goscombe John van Londen.

Fotogalery

• 
  Die Kaapstadse Raadsaal
• 
  Die Koning Edward VII-standbeeld
• 
  Monument wat die Tweede Vryheidsoorlog herdenk

Bibliografie

• Oberholster, J.J.: Die historiese monumente van Suid-Afrika. Kaapstad: Kultuurstigting Rembrandt van Rijn vir die Raad vir Nasionale Gedenkwaardighede, 1972. ISBN 0-620-00191-7

Eksterne skakels

• Wikimedia Commons het meer media in die kategorie Parade.