Seksueel oordraagbare infeksie

in Wikipedia, die vrye ensiklopedie
Spring na: navigasie, soek

Seksueel oordraagbare infeksies (SOI's) word van een persoon na 'n ander deur seksuele kontak versprei. Hierdie infeksies veroorsaak seksueel oordraagbare siektes (SOS'e) wat algemeen voorkom, wat pyn kan meebring en wat onvrugbaarheid en sterfte kan veroorsaak indien dit nie behandel word nie. Van die algemene SOS'e is gonorree, trigomoniase, Chlamydial-infeksie en sifilis. Genitale vratte word deur die menslike papilloomvirus veroorsaak en sommige subtipes hiervan is vir die meeste gevalle van servikale kanker verantwoordelik.

Die meeste SOS'e kan behandel en genees word. Verworwe immuniteitsgebreksindroom (vigs) en die seksueel oordraagbare virus - Menslike Immuniteitsgebrekvirus (MIV) - wat vigs veroorsaak, kan egter nie genees word nie. MIV kan deur seksuele kontak, deur bloed en deur 'n swanger vrou aan haar kind gedurende swangerskap, geboorte, of borsvoeding oorgedra word. Alhoewel MIV nie genees kan word nie, kan die nagevolge daarvan soms vir 'n tydperk gestuit word.

Dit is belangrik om te onthou dat ander SOS'e soos sifilis en vaginale sproei 'n persoon se kanse om MIV te kry of dit aan ander oor te dra, verhoog. Dit is 'n goeie rede vir mense met SOS'e om dadelik behandeling te kry en indien moontlik getoets te word vir MIV en berading te ontvang. Dit kan by alle primêregesondheidsorgklinieke en -sentrums gedoen word.

Mens kan gewoonlik nie merk dat 'n persoon 'n SOS het nie; mense met SOS'e, insluitend MIV-positief, lyk gewoonlik nie siek nie. Dit kan van drie tot tien jaar neem voordat 'n persoon met MIV simptome toon.