Sveriges Television

in Wikipedia, die vrye ensiklopedie
Sveriges Television (SVT)
Tipe Aandelemaatskappy
Gestig 1956 (as Sveriges Radio TV)
1979 (as SVT)
Hoofkantoor StockholmSwede
SleutelpersoneGöran Johnsson (voorsitter van die direksie)
Eva Hamilton (hoof uitvoerende beampte)
Gebied bedienSwede
MoedermaatskappyFörvaltningsstiftelsen för Sveriges Radio, Sveriges Television en Sveriges Utbildningsradio
SlagspreukVrye televisie
Webwerfsvt.se

Sveriges Television AB (SVT) is die publieke uitsaaikorporasie van Swede met sy hoofkwartier in Stockholm en produksie-ateljees in verskeie ander Sweedse stede. SVT het 29 streekantore en sowat 2 300 medewerkers.[1]

Die hoofkwartier van Sveriges Television AB in Stockholm. Foto: Holger Ellgaard
Die vlae van SVT buite sy hoofkwartier in Stockholm. Foto: Holger Ellgaard

Sveriges Television word as 'n aandelemaatskappy bedryf waarby die meerderheid aandele in besit van 'n stigting is. Die bestuursraad word deur die Sweedse regering benoem. Sveriges Television word uitsluitlik deur middel van lisensiegelde gefinansieer wat deur die Sweedse parlement (Riksdagen) vasgelê word en in Mei 2009 SEK 2076 (ZAR 2212[2]) per jaar beloop het. SVT saai geen televisie-advertensies uit nie.

Die Sweedse televisie-programme is oorspronklik deur Sveriges Radio (SR), die land se publieke radiodiens, geproduseer, en eers in 1979 het die televisiediens SVT as 'n selfstandige onderneming ontstaan. Die bogenoemde huidige stigting bestaan naas die televisie- en algemene radiodiens ook uit die uitsaaidiens Utbildningsradion (UR). UR beskik egter nie oor sy eie kanale nie, en sy programme word deur SVT en SR uitgesaai.

SVT se huidige televisiekanale sluit SVT1, SVT2, SVTB ('n kinderkanaal), Kunskapskanalen, SVT24 en die internasionale televisiekanaal SVT World in. Die laasgenoemde kan - in teenstelling met die ander programme - ook as betaaltelevisie via satelliet in die buiteland opgevang word. Ander platforms is svt.se met SVT Play en Prima Play, SVT HD, mobil.svt.se en SVT Text & Web (teleteks).

Die programme van SVT en SR word via digitale terrestriële televisie, satelliet, kabeltelevisie, IPTV en televisie vir mobiele toestelle uitgesaai. Sweedse wetgewing verseker dat daar naas lisensiegelde en kragtariewe geen bykomende intekengelde gevra mag word nie - aanbieders van privaat betaaltelevisiekanale wat via satelliet gebeeldsaai word (Canal Digital en Viasat) is verplig om aan Sweedse verbruikers ook gratis toegang tot satelliet-televisie te verskaf. Kabelgebaseerde betaaltelevisie-ondernemings is eweneens verplig om seker te maak dat alle huishoudings, wat oor toegang tot kabeltelevisieprogramme beskik, ten minste die publieke SVT-programme asook dié van Swede se grootste privaat uitsaaikorporasie TV4 kan kyk, selfs al het hulle die maandelikse kabeltelevisie-intekengeld nie betaal nie.

Verwysings[wysig | wysig bron]

  1. "SVT - Fast facts 2009" (PDF). Geargiveer (PDF) vanaf die oorspronklike op 24 Augustus 2009. Besoek op 24 Augustus 2009.
  2. Wisselkoers soos op 13 Mei 2009, bron: www.xe.com