Victor Frankenstein
| Victor Frankenstein | |
| |
Victor Frankenstein vlug van sy skepping.
| |
| Skepping | |
|---|---|
| Geskep deur | Mary Shelley |
| Inligting | |
| Byname | Dr. Frankenstein, Heinrich "Henry" von Frankenstein (1931-rolprent), Mal wetenskaplike, Die Moderne Prometeus |
| Spesie | Mens |
| Geslag | Manlik |
| Beroep | Wetenskaplike |
| Nasionaliteit | Switsers |
Victor Frankenstein is 'n fiktiewe karakter en die hoofkarakter in Mary Shelley se roman van 1818, Frankenstein; or, The Modern Prometheus. Hy is 'n Switserse wetenskaplike (gebore in Napels, Italië) wat, nadat hy chemiese prosesse en die ontbinding van lewende organismes bestudeer het, 'n insig kry in die skepping van lewe. Hy skep sy eie wese (wat dikwels "Frankenstein se monster" genoem word, of verkeerdelik in die volksmond bloot "Frankenstein").
Victor is later spyt dat hy deur sy skepping met die natuur ingemeng het omdat hy sy eie lewe, asook dié van sy familie en vriende, in gevaar stel toe die wese wraak teen hom wil neem. Hy word die eerste keer in die roman bekend gestel toe hy die monster naby die Noordpool wil vang en van 'n sekere dood gered word deur Robert Walton en sy bemanning.
Sommige aspekte van die karakter is vermoedelik geïnspireer deur die 17de-eeuse alchemis Johann Konrad Dippel.
Oorsprong van die karakter[wysig | wysig bron]
Percy Shelley, Mary se man, was 'n groot invloed op die karakter. Victor was 'n skuilnaam van Percy Shelley, soos in die versameling gedigte wat hy saam met sy suster Elizabeth geskryf het: Original Poetry by Victor and Cazire.[1] Daar is bewerings dat Percy een van Mary Shelley se modelle vir Victor Frankenstein was; terwyl hy 'n student aan Eton-kollege was, het hy "met elektrisiteit en magnetisme geëksperimenteer, sowel as met buskruit en verskeie chemiese reaksies", en sy kamer aan die Universiteit van Oxford was vol wetenskaplike toerusting.[2]
Percy Shelley was van adellike afkoms, en Frankenstein se familie is een van die mees vooraanstaande families in die die Geneefse Republiek. Percy Shelley se suster en Frankenstein se aangenome suster is albei Elizabeth genoem. Op 22 Februarie 1815 het Mary Shelley twee maande te vroeg die lewe aan 'n baba geskenk; die kind is twee weke later dood. Die kwessie van Frankenstein se verantwoordelikheid teen oor sy skepping, soos dié van 'n ouer teenoor sy kind, is een van die hooftemas van die boek.
Verwysings[wysig | wysig bron]
- ↑ Sandy, Mark (2002-09-20). "Original Poetry by Victor and Cazire". The Literary Encyclopedia. The Literary Dictionary Company.
- ↑ "Percy Bysshe Shelley (1792–1822)". Romantic Natural History. Department of English, Dickinson College. Geargiveer vanaf die oorspronklike op 16 Augustus 2006. Besoek op 2 Januarie 2007.
Skakels[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
