Wikipedia:Vandalisme

in Wikipedia, die vrye ensiklopedie
Spring na: navigasie, soek

Vandalisme is die toevoeging, verwydering of verandering van artikelinhoud wat met opset gedoen word om die integriteit en akkuraatheid van Wikipedia te skaad.

Die algemeenste vorm van vandalisme is die byvoeging van kru of vulgêre taal, die verwydering van die artikel se inhoud of enige toevoeging tot 'n artikel wat blote nonsens is. Gelukkig word hierdie soort vandalisme maklik raakgesien en is dit eenvoudig om te verwyder.

Enige goed-bedoelde poging om die ensiklopedie te verbeter, selfs al is dit goed deurdink, is nie vandalisme nie: wanneer iemand sy eie persoonlike en subjektiewe opinie by 'n artikel voeg is dit nie vandalisme nie. Dit is bloot onbehulpsaam en moet verwyder of herbewoord word.

Blatante vandalisme is egter 'n oortreding van die Wikipedia se beleid: sodra die vandalisme raakgesien is moet dit verwyder word, of, as u dit nie self kan doen nie, kan een van die administrateurs gekontak word vir hulp.

Nie alle vandalisme is voor-die-hand-liggend nie, ook is nie alle massiewe of kontroversiële veranderings vandalisme nie. Daar moet aandag gegee word om seker te maak of veranderings voordelig, nadelig (maar goed-bedoeld), of blatante vandalisme is.

Verwydering van vandalisme[wysig]

Dit word in alle gevalle aangeraai om verskillende weergawes van 'n artikel te vergelyk, sodat daar gesien kan word of die vandalisme slegs bygevoeg is en of daar miskien ook inligting uit die artikel verwyder is. Bo-aan die artikel kan u kliek op "geskiedenis" (regs van "wysig") en sodoende die redigeringsgeskiedenis van 'n artikel besigtig. Die weergawes word van die nuutste tot die oudste gelys, met die tyd en datum van elke wysiging asook die naam van die gebruiker wat die artikel telkens gewysig het. (Soms is dit 'n anonieme gebruiker en sal daar slegs 'n IP-adres wys.)

U kan die nuutste weergawe (die weergawe wat die vandalisme bevat) met 'n ouer weergawe vergelyk deur die nuutste weergawe te kies (kliek in die kolletjie links van die tydstempel) asook 'n ouer weergawe, gewoonlik dié direk onder die huidge wysiging. Kliek dan op "Vergelyk gekose weergawes" en die twee weergawes sal langs mekaar geplaas word vir vergelyking (let op die tyd en datumstempels bo-aan elke weergawe, die nuwer weergawe is telkens aan die regterkant). Enige data wat gewysig is sal rooi vertoon soos u hier kan sien. Om die artikel terug te rol na die vorige wysiging, hoef u slegs op undo langs die tyd- en datumstempel van die huidige wysiging te kliek. Dit sal 'n redigeringsvenster oopmaak wat die inhoud reeds na die vorige wysiging teruggerol het en het ook reeds 'n opsomming daarvan in die redigeringsopsomming geplaas. U kan u rede vir die terugrolling daar byvoeg en dan op "Stoor bladsy" kliek.

Waarskuwings[wysig]

U kan ook 'n waarskuwing op die vandalis se gebruikersblad plaas: waak egter daarteen om summier na hom of haar as 'n vandalis te verwys, die moontlikheid bestaan dat die wysings goedertrou gemaak is en die gebruiker nie besef het dat dit as vandalisme beskou sal word nie. Laat 'n vriendelike dog ernstige boodskap waarin u u besware omtrent die gebruiker se wysigings opper en lig hom of haar in dat u die wysigings verwyder het. U kan die gebruiker ook na die Wikipedia:Gebruikersportaal verwys, waar daar skakels na die sandput en die beleid van die Afrikaanse Wikipedia is. Indien die vandalisme blatant gedoen word, plaas die sjabloon {{subst:bv}} ~~~~ op die gebruiker se besprekingsbladsy. Om 'n skakel na die gevandaliseerde artikel by te voeg, plaas {{subst:bv|Artikelnaam}} ~~~~ op die gebruiker se bladsy.

Wanneer 'n anonieme gebruiker, m.a.w. 'n IP-adres, 'n bladsy vandaliseer, is dit raadsaam om die sjabloon {{subst:waarskuwing}} ~~~~ by dié adres se besprekingsblad te voeg, asook die skakel (moontlik 'n permanente een of een wat die gewysigde inligting uitlig) onderaan, sodat daar gemerk kan word wanneer 'n IP-adres meer as een keer die bron van vandalisme is. As 'n anonieme gebruiker, aanhou om 'n artikel of artikels te vandaliseer kan u dit aan een van die administrateurs rapporteer, sodat die adres geblokkeer kan word.