Wynie Strydom

Wynie Strydom
Gebore	5 Desember ~1951
Nasionaliteit	Suid-Afrika
Beroep	Spanbestuurder
Bekend vir	Blou Bulle-ondersteuner
Eggenoot	Marlene
Kinders	Marelie Gerhard Divan

Wynie Strydom was die spanbestuurder van die Blou Bulle, 'n pos wat hy sedert 1997 beklee het. Sy ywerige ondersteuning en manewales langs die rugbyveld het aan hom die bynaam Hartaanval Wynie besorg.

Strydom speel al van sy skooldae af rugby en hy was die kaptein van sy skool se tweede span, al was hy die kleinste matriek-leerling. Hy speel vanaf 1976 tot 1978 vir die Blou Bulle se B-span rugby, waarvan hy 45 keer op die bank moes uitsit. Hy het ook vroeër jare die Noord-Transvaal se o.13 Cravenweek-span afgerig en mettertyd ook die o.20's.

In 1992 aanvaar hy 'n voltydse betrekking by die Blou Bulle Rugbyunie en word in 1997 as die spanbestuurder aangestel. Langs die veld trek sy spontane ondersteuning vir die Bulle aandag en word hy 'n bekende gesig tydens die beeldsend van rugbywedstryde op TV.

Hy het aangekondig dat hy na die Curriebeker-seisoen van 2013 gaan uittree.