Bedryfsproses

'n Bedryfsproses is 'n stel aktiwiteite wat saamwerk om bepaalde uitsette af te lewer, wat een of ander waarde toevoeg vir 'n onderneming. Die uitset word soms verkry deurdat insette getransformeer of vervoer word deur die stel aktiwiteite. Beheermaatreëls word ingestel wat verseker dat daar die nodige kontrole is om te verseker dat 'n bedryfsproses konsekwente uitsette lewer. Beheermaatreëls bestaan onder andere uit beleid, sakebeginsels, riglyne en sakereëls. Meganismes, is die komponente wat aangewend word ten einde die bedryfsproses tot uitvoer te bring en verwys na hulpbronne soos mense, toerusting, masjinerie, tegnologie, voertuie ens.

Bedryfsprosesse kan op verskeie maniere geklassifiseer word:

• Kernprosesse wat direk waarde toevoeg tot 'n waardekanaal wat 'n kliënt van die waardekanaal bedien.
• Ondersteuningsprosesse wat die kernprosesse ondersteun deur hulpbronne te verskaf wat die kernproses tot uitvoering kan bring.
• Bestuursprosesse wat beheer en kontrole verskaf aan die kernprosesses sodat die kernprosesse gekoördineerd en volgens bepaalde beginsels en sakereëls funksioneer.
• Moniteringsprosesse wat die uitsette van 'n bedryfsproses meet en terugvoer verskaf sodat aanpassings gedoen kan word binne die proses of in 'n proses wat insette verskaf aan die proses.
• Logistieke prosesse wat se primêre waardetoevoeging is om die materiaal, goedere of mense van een geografiese punt na 'n ander te vervoer
• Vertragingsprosesse wat geen waarde toevoeging byvoeg nie, maar wat materiaal of goedere bewaar in 'n bepaalde statiese kondisie totdat tyd gereed is om die materiaal of goedere te gebruik.