Dubbelster

Die dubbelster Eta Andromedae A en B.

’n Dubbelster of tweelingster is twee sterre wat om hul gemeenskaplike middelpunt wentel. Die helderste ster word die primêre ster genoem en die ander een die sekondêre ster.

Uit navorsing tussen die 19de eeu en vandag blyk dat baie sterre deel van ’n dubbelster- of veelster-stelsel is – vermoedelik sowat 60% van hulle. Die ster naaste aan die son, Proxima Centauri, is deel van ’n driedubbele ster; Alpha Centauri A en B, die ander twee sterre in die groep, is nog nouer verbind.