Suiwer stof

Goud is een van die min suiwer stowwe wat in die natuur voorkom.

'n Suiwer stof is 'n stof wat nie fisies in twee of meer stowwe geskei kan word nie. Wanneer stowwe fisies geskei word, word dit gedoen met behulp van byvoorbeeld handsortering of filtrasie. Suiwer stowwe kan chemiese elemente òf chemiese verbindings wees. Chemiese elemente is in hul eenvoudigste vorm en kan nie deur chemiese metodes in eenvoudiger stowwe opgebreek word nie. Chemiese verbindings is op molekuulvlak en kan deur middel van chemiese metodes verder opgebreek word totdat ál die elemente tot in hul eenvoudigste vorme ontbloot word. Voorbeelde van suiwer stowwe sluit in O₂, NaCl (tafelsout) en water (H₂O).