Baguette

in Wikipedia, die vrye ensiklopedie
Spring na: navigasie, soek
Franse stokbrood ("baguette")

Baguette (Frans: pain de baguette of kort baguette, "stok") is die mees bekende soort van Franse witbrood, wat vanweë sy lang, dun vorm in Afrikaans ook Franse stokbrood genoem word. Tipiese kenmerke van hierdie sagte witbrood is sy bruin kors en die kruim se growwe en ongelykmatige porieë, wat danksy 'n spesiale kniemetode teen laer temperature en die byvoeging van net 'n klein hoeveelheid gis verkry word. Die stokvorm van die brood verseker dat ook die maksimum hoeveelheid kors verkry word. Baguettes het gewoonlik 'n lengte van een meter, 'n ovale deursnee van vyf tot ses sentimeter en 'n gewig van 250 gram.

Baguettes word in Frankryk slegs deur besondere bakkers, die sogenaamde boulangers (letterlik: "bakkers van bolvormige brode"), gebak.

Metode[wysig]

Baguettes word in Frankryk oorwegend van die Franse meelblomtipe T65 (Frans: farine blanche T65, 'n witmeel wat tussen 0,62 et 0,75 persent minerale bevat) gebak, maar die meeste bakkerye het hulle eie resepte en spesiale metodes. Baguettes van hoë gehalte word van meelblom met 'n hoër persentasie gluten, water, gis en sout gebak, en hulle spesiale deeg neem langer om ryp te word as dié van ander soorte brood.

Baguette in Frankryk[wysig]

Vars gebakte baguette

Die tipiese struktuur van die tradisionele Franse baguette het in die laaste dekades duidelik verander. Die kruim het helderder geword en die porieë fyner. Bakkerye het begin om stywe deeg vir hulle baguettes te gebruik, wat deur bakmasjiene makliker gehanteer kan word. Daarnaas is ook bakmiddels by die deeg gevoeg. Die stokbrode word ook nie meer op stoofplate gebak nie, aangesien die moderne oonde die gebruik van bakplate noodsaaklik maak.

Die tipiese deegsoorte vir baguettes is:

  • "Levain de pâte" (gefermenteerde deeg)
  • "Poolisch" ('n gegiste voordeeg) en
  • "Levain" ('n suurdeeg, wat van graanmeelblom berei word).

Levain de pâte was vroeë die mees gebruiklike deegsoort, maar Poolish en Levain het intussen meer gewild geraak. In Frankryk word dikwels nog meel van bone of mieliemeel bygevoeg - tydens die Eerste Wêreldoorlog is hierdie bestanddele gebruik, om broodgraan in te spaar. Die smaak van Franse baguettes is afhanklik van die deegresep en kniemetode.