Benjamin Britten

in Wikipedia, die vrye ensiklopedie
Spring na: navigasie, soek
Benjamin Britten
Benjamin Britten, London Records 1968 publicity photo for Wikipedia.jpg
Benjamin Britten in 1968
Geboorte 22 November 1913
Lowestoft, Suffolk, Engeland
Afsterwe 4 Desember 1976
Aldeburgh, Suffolk, Engeland
Beroep(e) Komponis, dirigent en pianis
Genre(s) Kontemporêre klassieke musiek
Aktiewe jare 1921 - 1976
Webwerf http://www.brittenpears.org
Portal.svg Musiekportaal

Edward Benjamin Britten, Baron Britten, OM, CH (* 22 November 1913, † 4 Desember 1976) was 'n Engelse komponis, dirigent en pianis. Hy was 'n sentrale figuur in 20ste eeuse Britse klassieke musiek en word met 'n groot verskeidenheid musikale werke verbind, waaronder operas, orkeswerke en kamermusiek. Sy bekendste werke sluit die opera Peter Grimes (1945), die War Requiem (1962) en die orkesstuk The Young Person's Guide to the Orchestra (1945) in.

Britten is as die seun van 'n tandarts in Suffolk gebore en het al vroeg sy musikale talent gewys. Hy het sy musikale opleiding by die Royal College of Music in Londen en privaat lesse van die komponis Frank Bridge ontvang. In 1934 het hy met die a cappella-koorwerk A Boy Was Born vir die eerste keer die publiek se aandag getrek. Elf jaar later het die première van Peter Grimes internasionale bekendheid an hom besorg. In die volgende 28 jaar het veertien verdere operas uit sy pen gevloei en van Britten een van die leidende 20ste eeuse komponiste in dié musiekgenre gemaak. Naas grootskaalse operas, wat in Sadler's Wells en Covent Garden opgevoer is, het hy ook "kameroperas" vir kleiner opvoerlokale geskep, waaronder The Turn of the Screw (1954) wat wye bekendheid verwerf het. 'n Wederkerende tematiek in sy operawerke is die stryd van buitestaanders teen 'n vyandelik gesinde samelewing en die korrumpering van onskuld. As oortuigde pasifis en gay man het Britten homself as buitestaander beskou.

Britten se ander werke sluit orkes- en koormusiek, instrumentale en werke vir solostem asook filmmusiek in. Die komponis het steeds groot belang daarin gestel om stukke vir kinders en amateurmusici te skryf, waaronder die opera Noye's Fludde, 'n Missa Brevis en die sangbundel Friday Afternoons. Sy komposisies was dikwels op bepaalde musici gemik. In sy lewensmaat en professionele vennoot, die tenor Peter Pears, het Britten sy gewildste en belangrikste muse gevind. Ander bekende persoonlikhede, met wie hy saamgewerk het, was Kathleen Ferrier, Jennifer Vyvyan, Janet Baker, Dennis Brain, Julian Bream, Dietrich Fischer-Dieskau en Mstislaf Rostropowitsj.

Britten was 'n gevierde pianis en dirigent wat baie van sy eie werke opgevoer en opgeneem het. Daarnaas het hy ook werke van ander bekende komponiste gedirigeer, soos Johann Sebastian Bach se Brandenburgse Konserte, Wolfgang Amadeus Mozart se simfonieë en liedsiklusse uit die pen van Schubert en Schumann.

Saam met Peras en die librettis en vervaardiger Eric Crozier het Britten die musiekfees Aldeburgh Festival in die lewe geroep wat sedert 1948 jaarliks gehou word en het in 1967 'n sentrale rol by die ontstaan van Snape Malting se konsertsaal gespeel. In sy laaste lewensjaar was hy die eerste komponis wat met 'n lewenslange lidmaatskap in die Britse Hoërhuis vereer is.