Clive Sinclair

in Wikipedia, die vrye ensiklopedie
Spring na: navigasie, soek
Clive Sinclair
’n Beeld van die betrokke persoonlikheid.
Clive Sinclair gesels in 1992 met jong uitvinders in Bristol, Engeland

Geboortenaam Clive Marles Sinclair
Gebore 30 Julie 1940
naby Richmond, Surrey, Engeland
Nasionaliteit Vlag van Verenigde Koninkryk Verenigde Koninkryk
Ouers George William Carter Sinclair
Thora Edith Ella Marles
Beroep entrepreneur en uitvinder
Huweliksmaat Ann Trevor-Briscoe (1962–1985)
Angie Bowness (2010–hede)
Kind(ers) Belinda, Crispin, Bartholomew
ZX Spectrum (1982)
ZX Spectrum 128K, 'n 8 bis-rekenaar van 1986

Sir Clive Marles Sinclair (* 30 Julie 1940 naby Richmond, Surrey) is 'n Engelse entrepreneur en uitvinder wat veral in die laat 1970's en vroeë 1980's met sy ontwikkelings op die gebied van verbruikerselektronika bekendheid verwerf het, waaronder die eerste sakrekenaar, die Verenigde Koninkryk se eerste digitale horlosie, tuisrekenaars en draagbare televisietoestelle.

Nadat hy enkele jaar lank as assistentredakteur van Practical Wireless en Instrument Practice werksaam was, het Sinclair in 1961 sy eie onderneming, Sinclair Radionics, gestig waar hy in 1972 met die Sinclair Executive die eerste plat sakrekenaar ter wêreld ontwikkel en vervaardig het. Sinclair het hom later op die vervaardiging van tuisrekenaars toegespits en die Sinclair ZX80 ontwikkel, die Verenigde Koninkryk se eerste tuisrekenaar wat op die massamark gemik is en vir minder as £100 verkoop is. Dit is opgevolg deur Sinclair Research se ZX81 en ZX Spectrum-rekenaars. Die laasgenoemde sou in die vroeë dae van die Britse tuisrekenaarbedryf 'n beslissende rol speel. Sinclair het in 2010 opgemerk dat hy self nie van rekenaars gebruik maak nie en die telefoon bo e-pos verkies.

Sinclair, wat in 1983 tot die ridderstand verhef is, het later Sinclair Vehicles gestig en die Sinclair C5 ontwikkel, 'n battery-aangedrewe elektriese motor waarmee hy egter geen kommersiële sukses kon behaal nie. Sinclair het hom sedertdien op persoonlike vervoermiddels toegespits en onder meer die A-fiets ontwikkel, 'n voubare fiets vir pendelaars met 'n gewig van 5,5 kg wat maklik gevou en in openbare vervoermiddels saamgeneem kan word.