Dolby Theatre

in Wikipedia, die vrye ensiklopedie
Spring na: navigasie, soek
Die Dolby Theatre voor die 75ste Academy Awards-plegtigheid in 2003

Die Dolby Theatre (vroeër bekend as Kodak Theatre, tydelik ook Hollywood and Highland Center Theatre genoem) is 'n skouburg in die Hollywood-distrik van Los Angeles, Verenigde State. Die teater maak deel uit van die Hollywood and Highland-winkel- en -vermaaksentrum in Hollywood Boulevard en North Highland-laan. Sedert sy opening op 9 November 2001 word die jaarlikse Oscar- of Academy Awards-plegtigheid hier gehou, waarby die eerste Oscar-pryse in Maart 2002 in die teater toegeken is. Die Dolby Theatre is die eerste permanente tuiste vir die Oscar-plegtigheid.

Argitektuur[wysig]

Toe David Rockwell van Rockwell Group en Theatre Projects Consultants die skouburg ontwerp en teen 'n koste van sowat $94 miljoen opgerig het, het hulle veral die Oscar-plegtigheid in gedagte gehad. Die verhoog is een van die grootstes in die VSA, met 'n wydte van 34 m (113 vt) en 'n diepte van 18 m (60 vt) wat gelykstaan aan dié van die Purdue-universiteit se Edward C. Elliott Hall of Music, alhoewel die aantal sitplekke in die Dolby Theatre met 3 332 net half so groot is.

Die teater is danksy sy beplanning en tegniese ontwerp veral geskik vir toneelopvoerings en plegtighede wat regstreeks op televisie uitgesaai word (naas die Academy Awards ook die eindrondte van American Idol). Die argitek en adviseurs het baie leidende spesialiste van Hollywood se televisie- en rolprentvervaardigingsbedryf uitvoerig geraadpleeg sodat hoogs funksionele kabelinfrastruktuurstelsels ontwerp kon word, insluitende 'n ondergrondse kabelbunker net onder die teater wat na vragwaens met tegniese uitrusting in aangrensende strate loop, maklik toeganklike en voldoende kragvoorsiening, asook 'n unieke stuurkajuit in die orkesruimte wat deur Rockwell ontwerp is en van waar kamera, klank en die verhoog beheer kan word.

Aan weerskante van die gang, wat vanuit die front-fasade na die groot traphuis-ingang lei, het winkelfronte asook suile in die Art Deco-styl ontstaan waarop die name van vorige Academy Award-wenners vir beste rolprente vertoon word. Oop spasies verseker dat ook die name van toekomstige pryswenners bygevoeg kan word. Volgens die tradisies van Hollywood se rolprentbedryf word die teatergebou se fasade voor die plegtigheid in rooi gedrapeer en die beroemde rooi tapyt uitgerol wat na die groot trapingang lei.

Die teater maak deel uit van die Hollywood & Highland Center met 'n oppervlak van meer as 640 000 vierkante voet. Dit is sedert Februarie 2004 in besit van CIM Group, 'n Hollywood-gebaseerde onderneming wat in eiendomme belê en hulle ook bestuur. Die sentrum se winkel- en ander ruimte is aan handelsake, 'n verskeidenheid restaurante, nagklubs, 'n ultramoderne rolprentteater met ses skerms naby die wêreldbekende TCL Chinese Theatre (vroeër Grauman's) en Loews Hollywood Hotel met 640 kamers verhuur.

Buiteskakels[wysig]

Commons-logo.svg
Wikimedia Commons het meer media verwant aan:
Dolby Theatre (kategorie)